Năr hơtuch khei 7, tơgĕch ƀât ‘năr prăng, Thiếu tá Trần Văn Dũng – Phŏ Kơdră vei lăng Công an xăh sơlam Quảng Trực (dêh char Lâm Đồng) kŭm hăm bôl boăl jur tơ̆ plei Bu Prăng 1A lŭk hô, tung tơblô, man dôm tŏ hnam mă hơtuch, vă tơtom pơjao đĭ đăng 66 tŏ hnam ăn mih ma duch nă lơ̆m xăh. Thiếu tá Dũng tơroi, ƀât mă dôm anih jang, khul grŭp oei tơplih trong jang bơ̆ jang kiơ̆ Khul kơdră pơgơ̆r tơring 2 tăl, tơdrong jang tơ̆ anih Công an tŏk tôch lơ. Yoa thoi noh, đe ‘nhŏng hơtŏk hơtŏk jơhngâm vă bơ̆ jang 1 vât 3 tơdrong jang ‘nŏh: Pơm hla ar, vei lăng sơđơ̆ng păng jang ‘lơ̆ng tơdrong sut pơđĭ hnam hiăh hiok tơ̆ tơring trŏ hăm khei ‘năr hơgăt.

“Công an xăh hôp păng pơjao tơdrong jang ăn rim grŭp vă kiơ̆ thơ̆ năm jang tơ̆ rim pơlei pơla đei unh hnam xa yoa tơdrong tơgŭm vă sut pơđĭ hnam hiăh hiok. Nhôn dăr lăng tơdrong ming man vă pơm thoi yơ vă gơ̆h đei tơnăr kơjăp, hơnă hơrăng păng bơbŭng kem kơjăp ‘lơ̆ng. ‘Ngoăih kơ ‘nŏh, chă hơlen năng tơdrong pơjao hnam ăn kon pơlei tŏk oei.” 

Tơ̆ dêh char Gia Lai, tơdrong sut pơđĭ hnam hiăh hiok oei đei lơ tơdrong pơmat tat yoa đei hlŏh 12.500 tŏ hnam kăl đei tơgŭm, lơ̆m noh Công an iŏk man hlŏh 6500 tŏ. Vă jang trŏ năr hơgăt, lơ kăn ƀô̆ lơ̆m khul linh jur chă bơngai jang hơgei, dôm anih pơtruh tơmam chuơh, tơmo… Mĭnh ƀar ‘nu kăn ƀô̆ oei tơgop jên khei đơ̆ng kơdih mong măi lơ̆m lơ sơnăm vă tơgŭm ăn kon pơlei pơm hnam. Trung tá Lê Đình Hải – Phŏ Kơdră vei lăng Công an xăh Ia Pa, dêh char Gia Lai jĭ 1 lơ̆m kơsô̆ ‘nŏh. ‘Nhŏng jĭ tơmoi tôch gĭt kăl lơ̆m năr et tŏk hnam kơ yă Kpă Huê, bơngai kră arih xa hơdrô̆ hơdrăn, jo jăn tơ̆ plei Ma San, xăh Ia Pa.

Yă Rmah H’đa, Yă pơgơ̆r plei Ma San tơroi: “Plei Ma San ‘nao âu đei 2 unh hnam đei tơgŭm sut pơđĭ hnam hiăh hiok. Hơdrô̆ hnam man ăn yă K’pă H’Huê yoa ma Hải tơgŭm đei kơjă 80 triu hlak jên; 1 unh hnam nai đei teh đak tơgŭm 60 triu. Băt hơdăh tơdrong tơgŭm kăp gĭt đơ̆ng Đảng păng teh đak, mih ma duch nă lơ̆m pơlei pơm kiơ̆ ‘lơ̆ng trong jang đơ̆ng Đảng, khôi luơ̆t teh đak; ưh đei mơ̆ng ƀơ̆r bơngai kơnê̆ pơhlŭ, hơnơ̆ng mât 1 ƀơ̆r đon pơjing pơlei pơla roi đunh roi tŏk.”

Trung tá Lê Đình Hải ăn tơbăt, tơdrong kơdih kâu tơgop jên man hnam ăn kon pơlei, 1 păh ‘nĕh ‘mĕh tơgop ‘lơ̆ng ăn tơdrong jang sut pơđĭ hnam hiăh hiok tôch gĭt kăl tơ̆ tơring. Mĭnh păh ‘nŏh, vă mât hơdai hăm pơlei pơla đơ̆ng kăn ƀô̆ công an tơ̆ tơring: “Yă Kpă H’Huê jĭ bơngai tôch pơmat tat, jo jăn dơ̆ng, oei xa hăm sâu, ưh đei tơmam dăh chŭn na, mir roh, oei oăi lơ̆m hnam so hiăh hiok. Yă ưh đei măt lơ̆m hơnăn vă tơgŭm man hnam ‘năi, kơna inh tôch tơtăm đơ̆ng noh vih tơ̆ hnam pơma nuh hăm hơkăn. Inh tơblang tơƀôh, roi hơdăh hăm hơkăn akhan, inh jur jang tơ̆ tơring hăm kon pơlei, đe sư hơnơ̆ng tơgŭm ăn inh bơ̆ jang kơna ‘mĕh tơgŭm ăn yă man hnam vă oei xa truh lôch hơchăng. Mơ̆ng inh pơma hơkăn inh ăn inh tơgŭm hloi păng inh tơroi ăn Khul kơdră chĕp kơ̆l Đảng, chă krao thơ̆ truh man hnam ăn kơ yă.”

Kiơ̆ đơ̆ng chă hơlen năng, tơring Tây Nguyên đei dang 18.000 unh hnam pơmat tat găh hnam oei. Jang kiơ̆ tơdrong jang sut pơđĭ hnam hiăh hiok đơ̆ng Khul kơdră teh đak, dôm dêh char hlôi chih pơjing trong jang tôch hơdăh, mong akŏm jên đơ̆ng teh đak păng tơpôl vă sut pơđĭ hnam hiăh hiok tơ̆ dôm tơring. Khul linh Công an hlôi jing Khul jang tơm lơ̆m tơdrong jang ‘nâu, mưh iŏk jang hơnăp jang mong akŏm jên, chă anih pơtruh chuơh, tơmo păng khul bơngai jang, atŭm hăm ‘nŏh hơnơ̆ng dăr lăng athei bơ̆ jang mă hrĕnh, man mă kơjăp ‘lơ̆ng hăm hlŏh 12.700 tŏ hnam đei tơgŭm. Truh hơtuch khei 7, vă rim hnam ‘nao yoa khul linh công an man ăn, hlôi đei et hơtŏk, pơjao ăn lơ unh hnam tŏk oei. 

Lơ̆m jơhngâm đon chơt hơiă đei tŏk oei tơ̆ hnam ‘nao kơjăp ‘lơ̆ng mŏ H’Miên Ayun tơ̆ dêh char Đắk Lắk pơma: “Inh čhôk ‘nă dêh, ưh băt vă pơma kiơ hloi. Đei hnam ‘nao bơih, ưh pă hli ‘mi hnăt kiơ bơih.”

Pôk pơ ư jơhngâm đon adrin, yoa kon pơlei hiơt kơdih kâu, yoa kon pơlei mă pơvih pơvăn đơ̆ng dôm khul linh công an tơ̆ tơring Tây Nguyên, Trung tướng Phạm Thế Tùng, Phŏ Kơdră tơm vei lăng Công an akhan, ƀât mă rim anih jang chinh trĭ oei hăt hơmet ming khul bơngai jang, khul linh công an tơ̆ tơring athei jang đang ‘lơ̆ng tơdrong vei lăng sơđơ̆ng tơ̆ tơring hai, athei dăr lăng tơdrong jang sut pơđĭ hnam hiăh hiok hai ‘nŏh jĭ tơdrong adrin tôch tih. Tơdrong jang đơ̆ng đe linh công an tơ̆ dôm dêh char Tây Nguyên ưh lăp tơgŭm ăn rơbâu unh hnam kon pơlei đei tơdrong arih xa pơmat tat đei tŏk oei tơ̆ hnam ‘nao đĕch mă oei tơgop pơjing đon lui đơ̆ng kon pơlei Tây Nguyên hăm Đảng, Teh đak, lui kiơ̆ chăl chĕp kơ̆l pơgơ̆r tôch ‘lơ̆ng.

Trung tướng Phạm Thế Tùng pơma: “Anih tơm vei lăng Công an tơchĕng ‘lơ̆ng jơhngâm đon jang tơnăp đơ̆ng Công an dôm dêh char Tây Nguyên păng dôm anih jang găh Anih tơm tơ̆ âu, hăm đon jang tơnăp, bơ̆ jang tôch ai, adrin đĭ jơhngâm “yoa kon pơlei mă pơvih pơvăn”, hlôi jang đang lơ tơdrong jang tih lơ̆m tơdrong man hnam tơgŭm ăn kon pơlei. Inh lui, hăm anih oei xa ‘nao sơđơ̆ng ‘lơ̆ng, rim unh hnam gô sơđơ̆ng jơhngâm jang xa, yak tŏk lơ̆m tơdrong arih, vang vei lăng ‘lơ̆ng tơdrong sơđơ̆ng tơ̆ tơring, tơgop jơhngâm tơiung pơjing păng atŏk tơiung mŭk drăm – tơpôl tơ̆ tơring.”

Tây Nguyên dang ei hlôi tơƀưh hăm đak dơsĭ. Hăm lơ bơbŭng hnam ‘nao đei man ăn, mih ma duch nă tơ̆ pơlei pơla hlôi ƀôh tơdrong arih xa roi ‘lơ̆ng ƀiơ̆ tơ̆ hơnăp kơnh. Tơdrong jang sut pơđĭ hnam hiăh hiok yoa Thủ tướng teh đak tơlĕch hăm dôm tơdrong jang đei tôch hơiă, ưh lăp tơƀôh hơdăh jơhngâm đon ‘lơ̆ng, pơih trong ăn chăl jang tŏk ‘nao đĕch mă oei pơih đei 1 trong krao hơvơn tôch tơnăp đơ̆ng rim anih jang chinh trĭ păng tơpôl vă sek tơlang ‘lơ̆ng tơdrong arih xa tơpôl. Đơ̆ng rŏng kơ tơmât hơdai, dôm dêh char Tây Nguyên hlôi đei bri, đei hloi đak dơsĭ. Tơdrong tơgŭm ăn kon pơlei đei tơdrong arih xa pơmat tat “đei anih oei xa hiôk sơđơ̆ng” ‘nŏh jĭ 1 tơdrong ‘lơ̆ng vă kon pơlei dôm dêh char Tây Nguyên jăh bơ̆ jang tŏk pran hlŏh dơ̆ng./.