Lơ̆m đei vă jê̆ 1.500 ŭnh hnam đei tơgŭm man hnam ‘nao păng 440 ŭnh hnam đei tơgŭm pơm hơmet ming hnam. Thoi noh truh khei ‘năr âu dêh char Kon Tum hlôi jang đei 2/3 trong tơlĕch jang sut hnam pơgia, hnam hiah hiok. Dêh char tŏk bŏk akŏm rim kon jên vă truh hơtuch khei 6 gô jang đang tơdrong sut 824 tŏ hnam pơgia, hnam hiah hiok uơ oei dơ̆ng. Kon Tum bơ̆ jang kiơ̆ lơ trong jang kơchăng hơmet lê̆ đon tơchĕng răp gô, pơ ‘mơ̆ng lơ̆m jên tơgŭm; tơdrong tơmam ming man khăi păng tŏk yă; ưh kơ măh bơngai jang tơgŭm yua đơ̆ng kon pơlei yak mơ̆t lơ̆m pơyan choh jang sa....

Năr 11-4, Công ty TNHH một thành viên 72 (Binh đoàn 15) hlôi pơgơ̆r pơm lêh iung jang xut xa hnam pơgia, hnam hnăt hnot păng pơjao jên tơgŭm ăn 26 ŭnh hnam ‘noh bơngai kŏng nhân păng kon pơlei lơ̆m apŭng Đư̆k Kơ, dêh char Gia Lai.

Công ty 72 hlôi chă hơvơn đơ̆ng lơ khul vang tơgŭm djru ming man ‘nao 23 pơƀŭng hnam, hơmet 3 pơbŭng hnam hăm kon jên jang hloh 1ti 300 triu hlak jên. Atŭm hăm ‘noh, Công ty hlôi chă hơvơn kang ƀô̆, ƀô̆ đô̆i păng pơjing rơvơn ăn kŏng nhân, bơngai jang iŏk jên khei hơdrol vă tơgop ming man hnam ‘lơ̆ng liĕm hloh dơ̆ng. Hơdrol kơ ‘noh, sơnăm 2024, Công ty 72 jei hlôi chă hơvơn vă tơgŭm djru ming man 11 pơbŭng hnam “Hnam bôl boăl”, “Hnam tơgoăt tơgoăl”, “Hnam Pơbŭng hnam tơnŏ kŏng đoàn” hăm kơjă kơjên 760 triu hlak jên.

Tơ̆ dêh char Đắk Nông, Grŭp jang Kơmăy kơmŏk Ngar - Tơmam drăm kăp gĭt lơ̆m teh đak Việt Nam (TKV) hlôi pơjao asong 350 triệu hlak jên vă man 5 tŏ hnam tơgŭm dôm ŭnh hnam bơngai kon kông dơnuh hin. ‘Nâu jĭ jên TKV ‘măn ăn bơ̆jang kiơ̆ tơdrong jang “Sut hnam pơgia, hnam hiah hiok” tơ̆ Đắk Nông sơnăm 2025. Mĭnh ŭnh hnam kon pơlei đei tơgŭm 70 triu hlak jên vă man ‘nao hnam oei. Dôm ŭnh hnam đei tơgŭm ‘măng âu ‘noh H'Dôi (plei Păng Sim, xăh Trường Xuân, apŭng Đắk Song), Điểu Nguyên (plei Phi lơ te, xăh Đắk Ngo, apŭng Tuy Đức); K'Sét (plei B'Nor, xăh Đắk Som, apŭng Đắk Glong), Thị Nhú (plei Bu sê rê I, xăh Đắk Ru, apŭng Đắk R’lấp) păng Nông Văn Dương (xăh Buôn Choáh, apŭng Krông Nô).