Phường Tiến Thành, dêh char Lâm Đồng jang hơdoi hăm dôm anih tơgŭm păng bơngai đei jơhngâm đon ‘lơ̆ng pơgơ̆r “Gơmăng pơchơt khei pơnil” ăn đe kon mon hơioh đei tơdrong arih xa pơmat tat tơ̆ phường. Lơ̆m tơdrong pơgơ̆r, đe oh hơioh đei lăng hơxoang prao, lăng tơdrong hơri hơxoang kơ đe bôl boăl hŏk hơdai hơri păng mơ̆ng tơdrong tơroi hơ ‘mon ma Cuội hăm Bia Rang khei.

Ƀlep ƀât ‘măng mă âu, bơngai tang măt ăn kơdră chĕp kơ̆l phường Tiến Thành păng dôm anih tơgŭm hơpăh hlŏh 1.550 tơpu tơmam, akŏm đĭ đăng đei kơjă hlŏh 125 triu hlak jên ăn đe oh đei tơdrong arih xa pơmat tat ngôi tơchơt Têt Trung thu. Tơ̆ Hnam trưng jăl mônh Phan Thanh 2 (Anih 2), xăh Hồng Thái, dêh char Lâm Đồng, bơngai tang măt ăn Mũi Né Bay Resort kŭm hơpăh 100 tơpu tơmam Trung thu păng 20 kơsuơ̆t ƀao hiêm pơgang ăn đe ŏh hŏk tro kon kông đei tơdrong arih xa pơmat tat. Dôm tơmam âu jĭ tơdrong pơlung tôch tơtom vă hơtŏk đon adrin hŏk pơhrăm  đơ̆ng đe oh lơ̆m sơnăm hŏk ‘nao.

Anih jang đoàn dêh char, Anih vei lăng jang pơgang dêh char Quảng Ngãi kŭm hăm 1,2 anih jang ‘nao jang hơdai pơgơ̆r tơdrong jang “Chơt hơiă Tết Trung thu 2025” tơ̆ Cham să 16/3, phường Kon Tum. Hloh 130 ‘nu hơioh kơ phường Kon Tum păng Hơnih bơ̆jang kơ đe hơdruh tơdăm hơioh Diên Hồng vang hơri hơsoang, hơnhăk truh lơ ƀai hơri hơsoang 'lơ̆ng hơiă, ƀĕnh tơdrong chơt kơ Tết Trung thu. Dôm ƀai hơri pôk pơ ư kơ Ƀok Hồ, tơdrong ‘mêm ŭnh hnam kŭm hăm dôm tơdra hơsoang chĭng chêng ƀĕnh tơdrong hơiă kon kông kơ tơring pơm đei jing năr chơt hơiă, ‘nă hal.

Tơdrong joăt hơsoang yă grai, tơ̆k ŭnh kơ đeng hơnglŏng păng mă loi ‘noh jĭ pơm tơroi kră sơ̆ kơpal rang khei ‘noh jĭ tơdrong hơiă, sơng đei tơdrong chhôk ‘nă đơ̆ng hơioh păng kon pơlei tơring kơdrơ̆m pơmơ̆t kơ dêh char. Hăm hơnăn “Hơdrŭng ŭnh kơ đeng tơ̆k hơdăh tơdrong hơ pơi ‘meh” tơdrong jang hlôi hơvơn  hloh 800 triệu hlak jên đơ̆ng dôm anih jang, anih mơdro sa pơjao 1.800 tơpu tơmam Trung thu păng 300 kơsuơ̆t jên hŏk ƀŏng asong ăn hơioh yak hloh pơmat tat, hŏk hơgei lơ̆m dêh char.