Tơbăt 80 sơnăm Kach mang khei 8, Quốc khánh 2/9 păng 80 sơnăm năr joăt joe Kŏng an kon pơlei, gơmăng ‘năr 25/8, tơ̆ Anih bơ̆jang kơ Khŭl kơdră teh đak ,Thủ tướng Phạm Minh Chính tơƀơ̆p muh măt, ƀlŏk hơdơ̆r kơ đe kang ƀô̆ Khŭl pơma dơnuh Kŏng an tơgŭm hơnih tơblăh tơring Pơbăh. Thủ tướng pơma hơdăh Đảng, Teh đak, Kon pơlei ling lang băt bơnê tơdrong hŭt hơkâu tih tên đơ̆ng rơbâu ‘nu kang ƀô̆ kŏng an tơgŭm, lơ̆m noh vă jê̆ 1.000 ‘nu hlôi nuih mơng lôch hơchăng, lơ bơngai đei oei lơ̆m hnam pơnă, teh dong, ƀơm pơnhŭl pơgang, jĭ jăn ưh kơ kĕ klăih, lê̆ hê̆ 1 păh pham lĕch sĕch huŏng tơ̆ hơnih tơblăh sơ̆.

‘Noh jĭ tơdrong chhôk ‘nă, mŭk tơmam kăp gĭt kơ hơdrĕch hơdrŭng păng khŭl lĭnh Kŏng an kon pơlei nuih mơng.  Thủ tướng athei rim anih tơm, anih jang, tơring, mă loi ‘noh jĭ Anih tơm vei lăng Kŏng an hơnơ̆ng hơtŏk tơdrong joăt joe “ƀlŏk bơnê”, vei lăng ŭnh hnam teh đak tơgŭm, bơngai đei kŏng, mă loi ‘noh jĭ kang ƀô̆ kŏng an hlôi năm tơgŭm ăn tơring Pơbăh.