Pơgê năr 26/8 tơ̆ Hà Nội, Thủ tướng teh đak bơ̆n Phạm Minh Chính pơgơ̆r Hop akŏm pơtôch tơdrong jang pơlong "Jơ̆p teh đak atŭm jơhngơ̆m sut lê̆ hnam pơgia, hnam hyah hyok". Truh dang ei jơ̆p teh đak hlôi hlôi sut đei hloh 334 rơbou tŏ hnam pơgia, hnam hyah hyok, hnam ưh đei trŏ nhen tơchơ̆t 3 kơjăp; jê̆ 50 rơbou tih hlj đei asong ăn tơdrong jang, lơ̆m noh jên hơvơn đei 24 rơbou tih hlj. Thủ tướng chơt hơ-iă ƀôh Việt Nam hlôi keh đang tơchơ̆t jang sut lê̆ hnam pơgia, hnam hyah hyok lơ̆m jơ̆p teh đak", jing tơdrong jang đei jơnei hơdah, kăp gĭt vă sơng kơ kuh 80 sơnăm Kăch mạng khei 8, Kuôk khanh năr 2-9.

Mă lei, kiơ̆ kơ Thủ tướng, ou pơtơm tơdrong tơm mă blŭng vă "sơđơ̆ng oei xa" – khei năr truh rim anih jang tơm, rim tơring athei đei tơchơ̆t chă tơgŭm vă rim unh hnam ou  "pơm jang", hơdrin truh sơnăm 2030 Việt Nam pă đei oei unh hnam hin dơnuh. Atŭm hăm noh "sơđơ̆ng oei xa" noh athei "pơm jang", asong tơdrong jang xa ăn kon pơlei.