Tang măt ăn Jơnŭm pơgơ̆r teh đak, Ƀô̆ trương Anih tơm Pơtho Pơhrăm Nguyễn Kim Sơn tơroi Pơkăp asong jang kiơ̆ Pơkăp jang kơ teh đak gah pơm 'nao, hơtŏk pơ-'lơ̆ng pơtho pơhrăm jăl sơnăm 2026 – 2035 đei hơvơn tơgŭm jang đơ̆ng lơ hơnih vă pơm kiơ̆ Pơkăp jang jăl sơnăm 2026-2035 hăm kơsô̆ jên pơhlom 580.000 tih hlj.

Hơlen lăng tơdrong mă ou, Anih juăt jang ăn Kuôk hô̆i pơtruh nơ̆r hăm anih chih akŏm athei jô̆ hơlen mă hơdah dôm tơdrong pơkăp jang truh sơnăm 2030 đei 30% anih pơtho pơhrăm đe hơ-ioh, pơtho phôh thŏng tơmơ̆t nơ̆r Anh jing nơ̆r pơma mă 2 păng hơtŏk truh 100% ah sơnăm 2035.

Tơrĕk truh jên hơvơn đei vă pơm kiơ̆ Pơkăp jang lơ̆m 10 sơnăm đơ̆ng  2026-2035 lơ̆m pơhlom kơpal 580 rơbou tih hlj kiơ̆ tơbang đơ̆gn Jơnŭm pơgơ̆r teh đak, Anih juăt jang ăn Kuôk hô̆i athei asong jên jang trŏ hăm pơkăp jang păng kĕ asong jên sơđơ̆ng ăn tơdrong jang đei jơnei. Hơlen hơvơn jên tơgŭm đơ̆ng 'nguaih vă tơjur ƀiơ̆ yua jên mong teh đak, hơtŏk kơtang asong jang hơdoi kŏng tu PPP lơ̆m ming anih jang, tơmam drăm kơmăi kơmŏk.

Tơgop nơ̆r hăm tơdrong tơlĕch jang, Kơdră Kuôk hô̆i Trần Thanh Mẫn akhan, athei pơkăp jang đunh khei năr, pơkăp hơdrol gah trong hơtŏk tơ-iung kơ tơpôl, tơdrong kăl bơngai jang khei năr hơnô̆ hơnăp kơnh, athei đei gah kơmăi kơsô̆, tơdrong hlôh vao vă vei sơđơ̆ng tơdrong pơm jang tơnăp đunh khei năr, tang găn asong jang lang să; akŏm lơ̆m dôm tơdrong jang dơnơm, kăl hloh nhen tơplih kơmăi kơsô̆, pơtho tơdrong jang gơh hơgei, pơtho hŏk tơ̆ tơring hơtaih yaih, tơring kon pơlei kon kông.

Atŭm hăm noh athei băt hơdah pơkăp păng tơdrong kĕ jang kơ pơkăp jang păng dôm tơdrong tơlĕch jang hơnơ̆ng đơ̆ng Anih tơm Pơtho Pơhrăm; sơkơ̆t hơdah anih yơ kăl asong jang hơdrol noh akŏm lơ̆m tơring tơnap tap, tơring kon pơlei kon kông, pơtho pơhrăm đe hơ-ioh, pơtho hŏk đăi hŏk, vă đei trong asong jên jang mă tơgăl. Kơdră Kuôk hô̆i Trần Thanh Mẫn pơtruh nơ̆r pơgơ̆r:  “Pơjing trong jang 'lơ̆ng vă hơvơn rim anih jang mŭk drăm, anih jang tơ-'ngla vang asong jang ăn pơtho pơhrăm. Inh akhan mă oei noh jĭ kăp gĭt hloh, oei gô gơnơm lơ̆m jên mong kơ teh đak ưh đei dôm yơ ôh, mă bơ̆n pơm thoi yơ athei đei trong pơm jang hơdoi kŏng tu PPP lơ̆m ming man anih jang, asong chă răt kơmăi kơmŏk. Đei lơ hnam trưng đơ̆ng teh đak đe asong jang lơ̆m ou, vă hŏk tro lơ̆m teh đak ưh đei năm lĕch tơ̆ teh đak đe. Mưh đei tơdrong 'lơ̆ng noh kon hơ-ioh bơ̆n truh ou kơnh ưh đei pơhuach lơ kon jên”.

Đei băt, tơ̆ 'Măng hop akŏm mă 10, Kuôk hô̆i gô hơmet Pơkăp atŭm kơ teh đak jăl sơnăm 2021-2030, sơkơ̆t lăng truh sơnăm 2050, lơ̆m noh đei tơdrong pơkăp trong jang đơ̆ng Đảng, Teh đak gah pơtho pơhrăm, kiơ̆ Kơdră Kuôk hô̆i noh athei kơchăng vă vei sơđơ̆ng drơ̆ng minh đơ̆ng tơdrong tơlĕch jang hăm pơkăp atŭm kơ teh đak păng rim luơ̆t pơkăp đei tơrĕk truh; atŭm hăm noh athei akŏm pơđĭ 3 tơdrong jang vă tang găn hơlơ̆k hơle le lăi băl gah tơring asong jang, tơdrong asong jang, iŏk jang đei jơnei. Minh 'măng dơ̆ng Kơdră Kuôk hô̆i hơpơi 'meh, tơdrong jang nĕ pơdui lang să athei akŏm lơ̆m dôm tơdrong dơnơm, tơdrong kăl hloh.

Phŏ Kơdră Kuôk hô̆i Nguyễn Khắc Định drơ̆ng lăp hăm tơdrong kăl tơbang pơkăp jang păng akhan, tơdrong pơkăp jang kơ teh đak jĭ dôm tơdrong jang kơ teh đak, athei akŏm asong jang vă pơjing tơdrong tơplih kăp gĭt kiơ̆ khei năr tơchơ̆t: “Lơ̆m ou inh ƀôh đei 3 tơdrong kăl hloh: mă mônh noh gah anih jang, mă 2 noh gah khua hŏk kơmăi kơmŏk 'nao păng tơplih kơmăi kơsô̆, mă 3 noh gah nơ̆r Anh. Mă lei inh lui ngeh minh ƀar tơdrong ưh đei tơbang lơ̆m ou. Noh jĭ dôm tơchơ̆t bơ̆n adoi pơma truh pơtho pơhrăm kon bơngai noh hơtŏk tơ-iung tôm tơdrong. Mă lei hŏk tro glơi noh tam mă băt glơi mơ̆n. Pơtho chư tơguăt hăm pơtho tơdrong jang. Hơ-ioh iĕ atŭm pơm kiơ̆ trŏ 5 tơdrong mă Ƀok Hô pơtho: 'Mêm kơ teh đak, 'mêm kơ kon pơlei, hŏk pơhrăm tơnăp, pơm jang 'lơ̆ng. Mă lei hŏk noh đei oh hŏk tơnăp, đei oh tam mă tơnăp, mă lei pơm jang noh tam mă 'lơ̆ng ôh"

Kơyuơ noh, kiơ̆ kơ Phŏ Kơdră Kuôk hô̆i Nguyễn Khắc Định, atŭm hăm tơdrong pơtho chư, pơtho pơ-'lơ̆ng bơngai adoi hơmet dơ̆ng tơ̆ dôm hnam trưng vă vei sơđơ̆ng ăn dôm hnam trưng pơm kiơ̆ dôm tơdrong jang nai vă pơtrŏ hăm dôm tơdrong pơhrăm tôm tơdrong ăn đe hơ-ioh.

Tơblang gah dôm tơdrong mă rim bơngai jang lơ̆m Anih juăt jang ăn Kuôk hô̆i pơtruh, Ƀô̆ trương Anih tơm Pơtho Pơhrăm Nguyễn Kim Sơn ăn tơbăt, gah jên pơm kiơ̆ pơkăp jang, lơ̆m tơdrong hơlen tơchơ̆t lơ 'măng, tơdrong jô̆ hơlen đơ̆ng jên oei đei, Anih tơm Jên hu athei jô̆ hơlen lăng jên jang păng Jơnŭm pơgơ̆r teh đak hlôi pơtruh ăn Kuôk hô̆i noh athei jô̆ truh tơdrong vei sơđơ̆ng jên asong jang:  "Gah hơlen lăng dôm tơdrong lơ̆m luơ̆t, pơkăp jang kăp gĭt ăn tơchơ̆t tơlĕch jang. Nhôn hơlen lăng, mă lei tơdrong ou mă tơm noh jên asong jang ăn dôm tơdrong pơkăp jang kiơ̆ Tơchơ̆t kơsô̆ 71. Pơtih nhen Tơchơ̆t 71 đei pơkăp trong jang kăp gĭt ou”.

Dôm tơdrong pơma đam ah 'Măng hop akŏm mă 51 ăn ƀôh, dôm tơdrong jang kơ Tơdrong pơkăp jang kơ teh đak gah pơm 'nao 'lơ̆ng pơtho pơhrăm jăl sơnăm 2026 – 2035 tŏk bŏk oei tơrĕk truh lơ tơdrong tơrĕk tih tên đơ̆ng kon pơlei tah hla: tơdrong iŏk yua jên jang hloh 580 rơbou tih hlj đei jơnei, tơdrong tơlĕch jang kiơ̆ pơkăp nhen pơih să pơtho nơ̆r Anh, tơplih kơmăi kơsô̆, dah mă vei sơđơ̆ng anih jang păng dôm tơdrong kăl vă pơtho pơhrăm hŏk tro băt tôm tơdrong.