Kiơ̆ đơ̆ng Kơdră chĕp pơgơ̆r Kuô̆k hô̆i, lăp đơ̆ng rŏng vă jê̆ 4 khei iung jang kiơ̆ khul kơdră chĕp pơgơ̆r tơring ƀar kâp, oei đei lơ tơdrong tim mă ‘lơ̆ng, tim mă lăp nhen tơdrong pơjao gơh jang, tơdrong jang ƀar păh rim hơnih oei tim mă hơtŏ, oei hơgrop, mĭnh ƀar hla bơar tơchơ̆t khôi luơ̆t, hla bơar bơ̆ jang tim mă hơmet ming tơtom, tơbơ̆p tơnap tap lơ̆m rim tơdrong jang groi teh, ming man, cham char, hnam teh, tư pháp, hô̆ tĭch.

Kơdră chĕp pơgơ̆r Kuô̆k hô̆i Trần Thanh Mẫn akhan, tơdrong rơkăh ưh kơ măh kang ƀô̆; hơnih bơ̆ jang tơring hrăt hrot, iĕ ioch, ưh kơ tôm hơnih bơ̆ jang ‘noh đei. Mă lei, Trung ương ăn asong rim tơring hơmet mă trŏ lăp, lơ̆m khei ‘năr tim mă ming man ‘nao hơnih bơ̆ jang, tim mă đei rơvơn, rim hơnih jang kơ tơring gô pơjing tơ̆ rim hơnih phara dih băl. Lơ̆m  jơ ‘năr ‘noh rim tơring kăl iung jang kơtang tơdrong jang tơplih kơsô̆, jang kiơ̆ khoa hŏk kmăi kmŏk vă bơngai tŏ sĕt, mă lei tơdrong jang keh đang koăng.

Kơdră chĕp pơgơ̆r Kuô̆k hô̆i pơtih ăn, tơ̆ ‘măng hop akŏm mă 9 ou ki, Kuô̆k hô̆i pơdrơ̆ng kiơ̆ lơ khôi luơ̆t, tơdăh ưh kơ jang kiơ̆ tơplih kơsô̆, jang kiơ̆ kmăi kmŏk gơh hơgei AI ‘noh bơ̆ jang tơdrong bơ̆jang pơjing khôi luơ̆t ưh kơ kĕ keh đang; adoi pơma hơdăh, ‘nou jĭ ‘măng iung jang kơtang hăm dôm tơdrong tơnap tap, tơdrong long mă rim bơngai bu jang ưh kơ gơh ‘noh pơdơ̆h.

Kơdră chĕp pơgơ̆r Kuô̆k hô̆i akhan, lơ̆m dăr lăng iung jang kiơ̆ tơdrong jang kiơ̆ kơdră tơring ƀar kâp ưh kơ đei tôm trong pơkăp dăr lăng kơjăp, pơm ăn mĭnh ƀar tơdrong ưh kơ trŏ lăp ‘măng mă blŭng, tim mă tơlĕch iung jang kiơ̆ jơnei, mă kăl ‘noh tơ̆ tơring tơrang. Kơ yuơ lơ loh, dêh char kăl dăr lăng hơnơ̆ng tơ̆ tơring, ưh kơ măh yă kiơ tơmơ̆t ăn hloi păng tơdrong mă kăl ‘noh:“Ưh kơ bu ôh ‘ngoăih kơ Khul kơdră chĕp pơgơ̆r Teh đak, Hơnih tơm Nô̆i vŭ, rim tơring tơlĕch jang rim trong jang hrơ̆p mĭnh ‘măng akŏm lơ̆m hơmet pơ ‘lơ̆ng trong bơ̆ jang, pơm hơtŏk kĕ jang tơgŭm djru khul jang. Mă mĭnh ‘noh kăl pơm pơkeh găh khôi luơ̆t, pơtho tơbăt jang kiơ̆.  Mă ƀar ‘noh pơm lơ liơ pơjing đei hla bơar tơplih tơdrong tơchơ̆t khôi luơ̆t mă hơdăh vă pơjao gơh jang nhen hrei ou. Mă pêng ‘noh dăr lăng, hơmet ming ƀiên chê̆ kang ƀô̆, jang kiơ̆ lăng hơlen tơdrong gơh jang kơ kang ƀô̆ vă pơjao jang lơ liơ mă trŏ lăp, ưh kơ gan pôk hơtŏk iŏk bơ̆ jang lơ tơdrong jang, pơjao jang ưh kơ ƀlep tơdrong jang gơh jang”.

‘Ngoăih kơ ‘noh, kăl pơtho tơbăt ăn rim tơring vă jang kiơ̆ dăr lăng tơdrong gơh jang kơ kang ƀô̆, pơjao tơdrong jang mă trŏ lăp; tĕnh koăng pơjing rim hơnih bơ̆ jang kơ teh đak, pơjao tơdrong jang bơ̆ jang teh đak tơ̆ tơring, adoi pơtrŭt hơnih mơdro sa ‘ngoăih kơ teh đak vang iung jang; pơm hơtŏk bơ̆ jang gơh kơ kang ƀô̆, pơgơ̆r pơtho ming tơdrong bơ̆ jang ăn kang ƀô̆; atŏk kơtang kĕ jang Hơnih bơ̆ jang dăr lăng kon pơlei tơ̆ tơring, hơnơ̆ng pơgơ̆r rim ‘măng hop akŏm hăm kon pơlei vă lăng hơlen tơdrong bơ̆ jang, adoi nhen atŏk kơtang bơ̆ jang dăr lăng hơlen.

Mă kăl, đơ̆ng dang ei truh đĭ sơnăm kăl hơvơn rim khul tơmơ̆t jên jang, ming hơmet hơnih bơ̆ jang, mă kăl tơ̆ tơring. Hrei ou oei đei dang 2.000 hơnih bơ̆ jang tim mă ‘lơ̆ng trŏ lăp hăm tơdrong ‘meh vă bơ̆ jang.

Găh trong tơlĕch ăn atŏk tơ iung mŭk drăm-tơpôl, Kơdră chĕp pơgơ̆r Kuô̆k hô̆i Trần Thanh Mẫn akhan, kăl tĕnh koăng tơlĕch kon jên teh đak tơmơ̆t jang; lăng ba kơjăp găh tŏk muk drăm, mă lei kăl kơjăp ‘lơ̆ng; tơdrong jang jên hu, tĕch răt hnam teh, kơjă măih kăl đei vei lăng kơjăp; atŏk kơtang tơplih rơgoh, tơplih kơsô̆, atŏk kơtang jang sa iŏk yoa kơjăp, bơngai jang gơh hơgei vă pơvih pơvăn ăn rim trong tơlĕch jang tŏk muk drăm.

Hăm trong tơlĕch ăn mă Đảng hlôi tơlĕch ăn rim jăl jang hơdăh, kiơ̆ đơ̆ng Kơdră chĕp pơgơ̆r Kuô̆k hô̆i, tơdrong kăl hloh ‘noh kăl sơđơ̆ng mŭk drăm, tŏk mŭk drăm kăl tơklep hăm sơđơ̆ng dơ̆ng kơjăp, vei lăng tơdrong oei sa, jang sa tơpôl ‘lơ̆ng hơ iă; tơplih ‘nao trong tŏk mŭk drăm đơ̆ng găh lơ jing găh ‘lơ̆ng, pơtrŭt kơtang tơplih kơsô̆, atŏk tơ iung muk drăm rơgoh ‘lơ̆ng, mŭk drăm gơh hơgei. Atŭm hăm ‘noh, kăl hơnơ̆ng hơmet ming trong bơ̆ jang muk drăm mă tôm tong, mă tơpă, akom lơ̆m pêng tơdrong jang tơm: hơmet ming dơ̆ng tơdrong jang, tơring jang kiơ̆ trong pơm hơtŏk đei iŏk yoa kơjăp; hơmet ming dơ̆ng khul jang mŭk drăm, atŏk kơtang hơnăp jang chông ba đơ̆ng mŭk drăm teh đak, truh ou kơnh Hơnih tơm Chinh trĭ gô đei Tơdrong tơchơ̆t găh Mŭk drăm teh đak; hơmet ming pơ ‘lơ̆ng groi teh păng teh đak tơmơ̆t jên jang.

Kơdră chĕp pơgơ̆r Kuô̆k hô̆i sơkơ̆t hơdăh, vă iŏk đei trong tơlĕch jang ou kăl atŏk kơtang tơdrong tơchơ̆t, Khul kơdră Teh đak, Kuô̆k hô̆i kăl lăng hơlen, hơmet pơ ‘lơ̆ng tơnap tap, pơm hơtŏk kĕ chĕp pơgơ̆r pơrô̆ jang đơ̆ng hơnih bơ̆ jang Teh đak. Pơma hơdăh mŭk drăm kơ teh đak bơ̆n tŏk ‘lơ̆ng hơ iă, kiơ̆ đơ̆ng Kơdră chĕp pơgơ̆r Kuô̆k hô̆i, hăm dôm tơdrong jang tim mă jang keh đang ‘noh pă đei bơngai bu bơih, rim kang ƀô̆, đang viên kăl atŏk kơtang bơ̆ jang chinh trĭ, jơhngơ̆m đon vă atŭm hăm kon pơlei lui kơjăp ba teh đak bơ̆n atŏk tơ iung.