Yak tơ̆ trong man thơ thŭr, rơgoh ‘lơ̆ng, ƀok Y Lisa Niê, Bí thư chi bộ ƀuôn Tung Krăk, tơring Ea Drông, dêh char Dak Lăk tơbăt, ‘nou jĭ tơdrong jơnei lơ̆m tơgoăt pôm nơ̆r ƀơ̆r đon păng vang kơrŭn jơhngơ̆m đơ̆ng kang ƀô̆, đang viên păng kon pơlei. Jăl trong man hơtăih 130m, Teh đak tơgŭm ăn tơmo, xi măng, kon pơlei răt chuơh, chưk tơnă păng vang iung jang 100 năr jang vă pơm keh đang, pơm rơvơn ăn kon pơlei chă yơ yak, chơ tơmam drăm păng pơm tơgop tơplih ‘nao ăn pơlei.“Hăm hơnăp jang jĭ Ƀĭ thư chi ƀô̆, ba hlôi pơgơ̆r hop akom pơma dơnuh hăm kon pơlei vă pơm trong năm tơ̆ chŭn mir, ‘nou jei jing tơdrong pơm rơvơn ăn kon pơlei chă yơ yak hiôk hian. Ba pơgơ̆r hop akom, pơrô̆ pơrôp păng đei kon pơlei pơm kiơ̆, vang chă tơra lơ̆m 1 ŭnh hnam 600.000 hlak jên, hăm 80 ŭnh hnam vang tơra. Gơnơm đơ̆ng noh hăm kon jên đơ̆ng teh đak tơgŭm ăn kơna trong ou mă pơm keh đang”.

Jăl trong man tơ̆ ƀuôn Tung Krăk jĭ mĭnh lơ̆m dôm trong tơlĕch jang trŏ lăp hloh lơ̆m hok pơhrăm păng pơm kiơ̆ nơ̆r Ƀok Hô tơ̆ tơring Ea Drông, dêh char Dak Lăk, tơƀôh hơdăh hơnăp pơm jŭk yŭk trong hơlou đơ̆ng kang ƀô̆, đang viên lơ̆m tơ iung pơjing tơring tơrang ‘nao tơ̆ tơring. Hăm trong plang teh pơm trong păng pơrô̆ hơvơn kon pơlei vang chă tơra, đe sư hlôi pơjing đei jơhngơm đon lui yom păng lăp đon đơ̆ng kon pơlei, tơgŭm ăn trong nơnăm đei tơƀưh dih băl ‘lơ̆ng hơ iă.

Ưh khan lăp hơdrô̆ lơ̆m tơ iung pơjing tơring tơrang ‘nao, tơdrong hŏk pơhrăm păng pơm kiơ̆ jơhngơ̆m đon ‘lơ̆ng kơ Ƀok Hô tơ̆ tơring Ea Drông oei đei tơƀôh hơdăh lơ̆m bơ̆ jang vei lăng năng tông ăn bơngai dơnuh. Tơlĕch rim tơdrong jang tơm teh đak găh tơjur dơnuh, ăn tŏk iŏk jên đơ̆ng hơnih mong jên tơgŭm djru tơpôl. Dôm trong jang tơgŭm djru ou hlôi pơjing rơvơn vă kon pơlei atŏk tơ iung mŭk drăm, hơmet pơ ‘lơ̆ng lơ̆m jang sa iŏk đei. Gơnơm đơ̆ng noh, ŭnh hnam dơnuh kơ tơring hlôi tơjur đơ̆ng 280 ŭnh hnam lơ̆m sơnăm 2024 jur pă 214 ŭnh hnam lơ̆m sơnăm ou. Ƀok Y San Niê Kdăm, Thôn trơng pơlei Ea Kjoh A, tơring Ea Drông, dêh char Dak Lăk tơbăt:“Rim ŭnh hnam dơnuh jei sơng iŏk đei tơdrong lăng ba, tơgŭm djru đơ̆ng khul kơdră tơring vă rong kon tơrong, choh jang sa. Đơ̆ng sơnăm 2023, lơ̆m pơlei Ea Kjoh A đei 16 ŭnh hnam sơng iŏk đei tơgŭm ăn pơbe yŏng, lơ̆m 1 ŭnh hnam 8 tŏ. Đe sư hlôi pơnam chă rong kơna pơbe chek lar char kon. Mưh kon pơbe tih ‘noh đe sư tĕch iŏk jên chă răt sa, mong răk man hnam, rong ‘me kon hơ ‘lơp hŏk pơhrăm. Tơdrong hơrih sa sơđơ̆ng, pơm kiơ̆ kơjăp trong bơ̆ jang, khôi luơ̆t teh đak”.

Tơring Ea Drông hrei ou đei pơjing ‘moi kiơ̆ hơgrop ƀar tơring Ea Drông so hăm Ea Siên, đei 21 pơlei, vă jê̆ 24.000 ‘nu kon pơlei, lơ̆m ou hloh 70% ‘noh bơngai kon kông. Đang ƀô̆ tơring đei vă jê̆ 900 ‘nu đang viên hop akŏm lơ̆m 52 khul.

Hăm jơhngơ̆m đon ‘nao, tơdrong jang ‘nao, tơdrong hŏk pơhrăm păng pơm kiơ̆ jơhngơ̆m đon ‘lơ̆ng, trong bơ̆ jang hơgei kơ Ƀok Hô hlôi jing tơdrong gĭt kăl hloh lơ̆m chĕp pơgơ̆r, pơrô̆ jang, iung jang, đei ƀôh hơdăh lơ̆m tơdrong jang kơ rim bơngai kang ƀô̆, đảng viên. ‘Nhŏng Hoàng Văn Dụng (hơdrung Nùng), kang ƀô̆ bơ̆ jang lơ̆m Jơnŭm vei lăng kon pơlei, Hơnih vei lăng kon pơlei tơring Ea Drông, dêh char Dak Lăk tơbăt:“Hŏk pơhrăm păng pơm kiơ̆ jơhngơ̆m đon ‘lơ̆ng đơ̆ng Ƀok Hô, ưh khan lăp chă pơma đĕch ôh mă lei jang kiơ̆ hloi lơ̆m tơdrong bơ̆ jang. Jĭ mĭnh ‘nu đang viên sơnăm mơlôh, lơ̆m tơdrong bơ̆ jang, hơnơ̆ng chă lăng hŏk pơhrăm dôm tơdrong hle vă druh kiơ̆ tom tơdrong jang, kơrŭn đĭ ai jang keh đang ‘lơ̆ng tơdrong jang đei pơjao”.

Yă H Thúy Mlô, Kơ iĕnh Ƀĭ thư Đảng tơring Ea Drông tơroi tơbăt, tơdrong hŏk pơhrăm păng pơm kiơ̆ jơhngơ̆m đon ‘lơ̆ng, trong bơ̆ jang hơgei đơ̆ng Ƀok Hô tơ̆ tơring hlôi jing tơdrong joăt, pơjing đei hơyak pran kơtang lơ̆m bơ̆ jang tơ iung pơjing Đảng.“Tơdrong hŏk pơhrăm, pơm kiơ̆ nơ̆r Ƀok Hô ‘noh jei tơgŭm ăn pơm hơtŏk jơhngơ̆m đon tơnăp, tơpăt ‘lơ̆ng lơ̆m khul kơdră Đảng. Lơ chi ƀô̆ jei hlôi iung jang ‘lơ̆ng, tơƀôh hơdăh jơhngơ̆m đon iung tơjră kơtang đơ̆ng khul Đảng ‘noh ‘moi kiơ̆ tơdrong ou tơgop lơ̆m tơ iung pơjing chi ƀô̆ roi năr roi rơgoh ‘lơ̆ng, pran kơtang hloh. Hăm Đảng uỷ tơring ‘noh, lơ̆m rim tơdrong jang jĭ tơdrong jang tơm lơ̆m hŏk pơhrăm, jang kiơ̆ jơhngơ̆m đon ‘lơ̆ng, trong bơ̆ jang hơgei kơ Ƀok Hô ‘noh jei đei lơ tơdrong jang hơ iă. Dôm trong jang ou jei hlôi tơgop pơm tơplih kơtang lơ̆m pơđĭ Đang ƀô̆ kơ tơring.”

Hăm dôm tơdrong jang hơdăh, tơpă, trong jang tơchăr hơ iă, tơdrong hŏk pơhrăm păng pơm kiơ̆ jơhngơ̆m đon ‘lơ̆ng, trong jang hơgei kơ Ƀok Hô tơ̆ tơring Ea Drông hlôi tơgop tơ iung pơjing Khul Đảng rơgoh ‘lơ̆ng, pran kơtang, tơƀôh hơdăh jơhngơ̆m đon tơjê̆ hăm kon pơlei, kơ yuơ kơ kon pơlei. Adoi pơm hơtŏk jơhngơ̆m đon hơpơi ‘meh vă atŏk tơ iung, jơhngơ̆m đon tơgoăt tơgoăl pôm nơ̆r ƀơ̆r đon păng jơhngơ̆m đon hơdrin tơ iung pơjing pơlei pơla roi năr roi atŏk tơ iung gơ̆h hơgei, pơdrong ‘lơ̆ng liĕm.