Hu menyim haong dom sambo màu jaik haong langik tasik, dom blah khan bai haong dom bingu la gheih mekre, lac bruk ngak brei hadah mbaok meta, lac ilamu siam mekre meng kan mai di bhap bini bangsa Êđê. Yaom lac oh daok ngak abih meng tangin takai yau dahlau daih, min dom blah khan bai di bhap bini Ê Đê daok di tỉnh Đắk Lắk jeng daok khik hu rilo bingu la klak meng kan. Yaok bingu la hu sa makna karei, hu urang Ê Đê patoa veik ka anek taco tui jalan gam bac gam ngak, gam sahneng duah bahrau tui hatai sahneng di urang menyim. Kadha vak: “Khan bai – brei mboh tangin gheih ngak, tari taring di urang kumei Ê đê” di kapul urang vak di rayo sap ndom VN daok di bhum Tây Nguyên.

Khan bai Ê Đê brei mboh bruk gheih tangin, tari taring di urang kumei Ê Đê meng kan. Harei ini, rilo adei sa-ai kumei thau pambuak pagam dom gheih mekre di bingu la, di sambo màu khan bai Ê Đê haong dom janih bahrau, menyim jeng dom blah khan bahrau piah pablei mek jien tame. Menyim khan bai daok hu tamuh veik di rilo puk, palei Đắk Lắk, oh lac khik ramik dom bingu la meng kan, bo daok duah hu jien, sa jalan ngak piah ka urang kumei Ê Đê brei mboh bruk sahneng duah dalam raidiuk bahrau. Kadha vak “Khan bai ba jien tame rilo ka rahra” di urang vak di rayo sap ndom VN daok di Tây Nguyên. Da-a mikva saong taong abih gauk tui pang.

Dalam dom thun tapa hu bruk sanka buh jien tame ngak di Kanja, dom taha palei, urang hu angan je dalam bhap bini di dom huyện bhum tapen negar di tỉnh Kon Tum kham merat pathau khan jak ba bhap bini salih janih phun pala, anthur raong piah yam tagok tabiak truh kan kathaot. Kadha vak di urang vak Thu Hòa hu ndem ka dom bruk ngak di taha palei, urang hu angan je cak rok patagok kinh tế di bhum glaong tapen negar Kon Tum.

UB bhap bini tỉnh Bà Rịa - Vũng Tàu birau taduan brei angan Palei ngak tapei racam meng kan An Ngãi, huyện Long Điền. Lac pandap meng lavik mai, hu bhap bini patoa veik tapa rilo rairah, bruk ngak pei racam An Ngãi daok daong jhul salih bruk ngak mbang, ba bruk ngak, tagok jien mek tame ka urang ngak di palei pala. Da-a mikva saong grauk ayut tui pang kadha vak di Lưu Sơn, urang vak di Rayo sap ndem VN daok di Ban raya HCM hu khan ka bruk ini:

Bruk ngak nong pandar công nghệ glong piah ngak tabiak kaya nong di Cần Thơ dak harei dak patagok, hu rilo bruk ngak ba jien tame yaok rituh trieu đồng, gaok mai hu tal yaok tỷ đồng sa thun. Kadha vak di Phạm Hải ndem ka bruk ngak nong công nghệ di Cần Thơ.

Dalam dom bruk ngak di “Labik ilamu Ho Chi Minh” daok peih tabiak di Ban raya HCM, mbang akok meti di dom Sang megik, Surao Islam di Phường 15, 17, quận Phú Nhuận hu padang “Labik ilamu Ho Chi Minh brei ka bhap bini Cam”. Di labik nan hu parang tabiak rilo tapuk, harak gar, thaot binguk ka raidiuk saong bruk ngak cách mạng di Chủ tịch Ho Chi Minh. Dom baoh tapuk hu lang tapa sap Cam piah ka bhap bini mbuan thau. Bruk njauk biai nan lac, bhap bini mai labik ini daok hu Mban Khik iek Samegik dak dalikan ka Wa Ho saong jalan diukrai di Wa, meng nan daong ka urang hu thau jang saong mboh anit ranam Wa Ho jang, njom tame dalam rup jalan sahaneng di Wa Ho piah bac megru saong ngak tui Wa. Kadha vak “Pambak tabiak labik ilamu Ho Chi Minh ngan haong bhap bini bangsa Cam” di Hoàng Liên, urang vak di Rayo sap VN hu khan ka bruk nan.

Tân Hồng lac huyện bhum taphia negar gah angaok hahlau ia di tỉnh Đồng Tháp, bruk ngak mbang kak kajap haong bruk ngak nong. Labaih 1 thun dahlau, meng Danak dak “Padang bruk raong pabe rilow di dom tỉnh Bhum taneran kraong Cuu Long” hu daong ka dom baoh sang di huyện Tân Hồng hu bruk ngak mbang, patagok jien mek tame, jhul patagok kinh tế labik bhum taphia negar. Kadha vak di Phạm Hải daok di ĐBSCL ndem ka bruk raong pabe ba jalan ngak mbang birau ka bhap bini daok di tỉnh Đồng Tháp. Da-a mikva saong grauk ayut tui pang:

"Kan kathaot rilo gah Việt Nam 2021" meda hu gac 10 triệu urang hu mbang tui meng dom sarak song danak dak pakat negar di rajaei ka bảo trợ xã hội song patrun kan kathaot dalam tuk vak 2021-2025. Gam song bruk patruh iek patrun kathaot, abih di nyu nan lac di dom bhum atah bayah, meng thun 2020, Rajaei hu sa danak dak pakat negar brei ka bhum bhap bini bangsa takik song bhum ceik. Tapa 2 thun pambuak gauk di 10 jabat, mintri, gah, yaok pluh tỉnh ban dalam taneh ia, danak dak hu peih ngak dom jalan ngak prong piah ngak bruk “Oh caik ka urang halei njauk klak veik di gah likuh” . Kadha vak di Sỹ Đức, urang vak di roya sap ndom VN.

Mai palei Cam Tịnh Mỹ, xã Phan Thanh, huyện Bắc Bình, tỉnh Bình Thuận, sua tangi tal urang pal akaok palei saai Đồng Thanh Viên ye thei thei jeng thau. Kayua saai Viên tuk halei jeng lac yau baoh kreih camin, tuk halei jeng halain hatain ba abih drei saong bruk ngak, hu mikva anit ranam. Kadha cih vak patui hadei ini di Jasi – urang di rayo sap ndem VN daok di Ban raya Ho Chi Minh, daong ka khol drei thau cambac jang dom bruk ngak siam makre di urang pal akaok palei di labik ini, daa mikva saong taong abih gauk tui pang:

Hu mai tal palei An Nhơn, xã Xuân Hải, huyện Ninh Hải, tỉnh Ninh Thuận, dom siam gheih di sa bhum palei bahrau yau caik kreih camin brei ieik, yau ye binguk thaot di mblang main pasak palei – drei yau ye dom binguk thaot siam makre mboh di kapul urang đảng dalam chi bộ saong kapul urang đảng daok ngak bruk di pak ini halain hatain, eng drei saong bruk rik prein yawa tame, sa hatung hatain di bhap bini. Kadha vak di Công Thử hu ba tagok mbao Tin Tức Online hu ndem tal bruk ini, daa mikva saong taong abih gauk tui pang: