Jiak 2 adit tapa di ban raya HCM, langik pandiak bhang dui atah ngak ka rilo uranaih njauk dom janih ruak jalan suak yava, jalan tung pruac hu biak rilo.

Urak ini, langik pandiak bhang tua riya dui atah lavik harei yau nan ye rilo taneh glai di tỉnh Tây Ninh daok mbuan apui khuah pakat 5 lac pakat biak nguy hiểm. Yau nan ye dom pakat, dom gah di tỉnh Tây Ninh daok jhuk pakhang bruk peih ngak rilo jalan pacang caga, paglaong jalan sahaneng pacang caga apui khuah glai di bhap bini,jeng yau brei langyah catang dom bruk ngak apui khuah galai.

Bruk dom amaik ame anek saih di Bắc Ninh jak gauk tame Hà Nội piah dut iek sán pabui kayua medil lac anek mbang pandap mbang oh hacih saat ngak ka manuac sia sahaneng mboh suh sah, pandiak hatai, abih di nyu lac dom amaik ame hu anek bac saong daok veik mbang huak di sang bac mboh oh sahanang hatai ka var mbang huak di sang bac. Dom tangi sua tabiak meng dom urang amaik ame lac ngak habar tui iek, duah thau tani tanat jang ka bruk khik pandap mbang hacih sa-at tuk ba tame giang ngak mbang ngak huak di sang bac.

Tỉnh Bình Phước daok dang anak bruk mbuan thu lagu kayua pandiak bhang tua riya lavik harei, ngak kan kandah tal bruk ngak nong jeng yau raidiuk bhap bini. Anak bruk yau nan, gah ngak nong tỉnh Bình Phước daok peih ngak rilo jalan piah palaih njiak khat lahik

Pachreih tui bilan dam dara ngan saong kadha “ Dam dara halan hatian daong bhap bini”, dalam bilan 3 ini, Kapol dam dara Rayo sap ndem VN hu peih ngak rilo bruk lagiah haong bruk di yaok đơn vị.

Bhap bini njauk nao atah jaik pluh km piah likau yaok thung ia, atau mek ia pandar meng dom bingun thu lagu dalam dom mblang hamu, dom baoh craoh oh hacih sa-at. Ini lac bruk daok rah tabiak di huyện Di Linh, tỉnh Lâm Đồng. Pandiak bhang dak thun dak khang ngak ka dom công trình pabak ia pandar oh daok hu ia. Quang Sáng, urang vak di rayo sap ndom VN daok di Tây Nguyên brei thau ka bruk ini tapa kadha vak hadei ini:

Vĩnh Long lac tỉnh ngak nong hu taneh ngak padai labaih 60 rabau ha saong taneh bein phun mbang baoh jaik 50 rabau ha. Kayua daok kreh 2 baoh kraong Hậu saong kraong Cổ Chiên nn ye Vĩnh Long biak mbuan njauk ia mbak njom tame dalam dom bilan pandiak thun ini. Urak ini gah ngak nong saong karja dom puk palei daok ba tabiak rilo jalan ngak piah patrun dom khat lahik tuk ia mbak tame dalam baoh taneh. Chanh Tuy, urang vak di rayo sap ndom VN daok di bhum taneran kraong CL hu kadha vak brei thau.

Pathau mik va song tong abih gauk ; Anak pandiak bhang thu lagu di bilan 3, glai taha di Labik khik ramik thiên nhiên – ilamu Đồng Nai (ieu katut lac Labik khik ramik) dok di tanut cảnh báo pakat 5 – tanut biak mbuan si khuah di abih. Piah pacang caga khuah glai, gah Kiểm lâm song bhap bini salih gauk khik iek hala glai dok thu racam ala pandiak thu. Kadha vak hadei ni di Đoàn Phú angaok harak mbao Đồng Nai pok meyaom dom kham merat khik iek glai ni.

Pathau mik va song tong abih gauk! Tal tuk vak ni, urang njauk ruak sởi di TPHCM dok trun min trun biak suai song dok mbuan njom bak dalam bhap bini. Bruk bhap bini palih ruah klauk jru di dịch vụ piah pacang caga ruak sởi lac bruk njauk ngak dalam tuk jit ruak dok rah tabiak yau urak ni. Min bruk klauk jru sởi di dịch vụ dok rilo tavak tavaiy njauk samar pasiam veik, piah pabak ka bruk klau jruk, patrun bruk njauk ruak. Kadha vak di Kim Dung, urang vak di rayo sap ndom VN dok di ban raya TPHCM hu ndom tal bruk ni :

Pathau mik va song tong abih gauk! Yam tapa dom kan kandah dalam rai duik, song dak harei dak brei mboh ka rup drei , rilo urang kamei khang hatai nao tui hatai takre di drei piah hu ba drei tame yaok harei haniem phol. Tuk hu haniem phol dalam hatung hatai, urang klah rabha dom siam mekre nan tal bhap bini meng rilo bruk karei di gauk.jalan pabam haniem phol ni hu Mỹ Dung, urang vak di rayo sap ndom VN dok di ban raya HCM ndom tal tapa dalikan chreih chrai di urang kamei siam binai Việt Nam 2017 H’Hen Niê, blogger du lịch Đinh Hằng atau tác giả Trương Lê Na – dom urang kamei khin salih bahrau , khang hatai yam tagok piah gaok tal tanut njauk hadar dalam rai duik. Daa mik va song tong abih gauk tui pang