Meng tuk hu pok brei angan lac urang hu angan je dalam bhap bini urang Cam daok di xã Bình Sơn, huyện Long Thành, ong Đô Hô Sên tuk halei jeng duah jalan khik ramik akhar haroh di bangsa meng bruk peih tal pato akhar haroh Cam brei ka dom adei sit. Ong ngak bruk nan haong hatai caong lac piah ka akhar haroh saong ilamu di urang Cam oh lahik nao. Kadha vak di My Ni mangaok báo Đồng Nai hu ndom ka ong Đô Hô Sên:

Dom thun jaik di ini, bruk pablei salih menuac biak srau kadau, meng pablei salih tapak tal pablei salih tapa tangin urang karei, atau tapa mạng, tapa web... Urang njauk bala di dom bruk pablei salih menuac saong sang di dom urang nan gaok oh takik kan kandah, hu bruk ba tal metai lahik. Yau nan, bruk pablei salih menuac bhian hu dauk, hu me-om tagok blah kanduh yau habar? Brei ngak hagait piah pacang cakak bruk pablei salih menuac? Urang vak Kim Thanh haong Phương Thoa hu kadha vak ndom ka bruk ini, da-a mikva saong taong abih gauk tui pang:

Dom baoh kadaoh thu jhuk jangaih ginup thaik thaok karei di gauk hu kak kajap haong bhap bini Gia Rai saong Ba Na daok di Tây Nguyên meng kan mai mbiah tal harei ini. Dalam dom harei ngak rija di palei, baoh kadaoh thu hu caik alak piah khik ka nyu pahe bingi yau tamo. Dalam yaok baoh sang, baoh kadaoh thu lac pandap hu pandar yaok harei, saong daok hu khik ramik, hu patoa veik meng rai ini tapa rai karei, hu pandar ka rilo bruk karei di gauk. Kadha “dom bangsa adei sa-ai” adit ini, da-a mikva saong taong abih gauk pang kadha vak di Ngọc Thu mangaok báo Bangsa saong Patagok, brei thau ka bruk pandar saong yaom glaong ilamu di baoh kadaoh thu dalam raidiuk bhap bini Gia Rai, Ba Na:

Peih ngak danak dak “Amaik raong” kayua Trung ương Kapul urang kumei Việt Nam ba tabiak haong makna bak hatai anit ranam, Kapul urang kumei Công an ban Cần Thơ hu padang jalan ngak, brei thau tal taong abih urang jakar, hội viên saong pambuak tal dom kapul nyaom, menuac urang piah hu mbaok, ba tangin tame di taong abih menuac sia, gam daong patrun pandik harao, gam jeng labik pambak tame khang kajap piah ka dom adei metui medar kayua jit COVID-19 khang hatai yam tapa kan kandah, yam tagok dalam raidiuk. Kadha vak di kapul urang vak di rayo sap ndom VN daok di bhum taneran kraong CL:

Dalam thun bac 2022 - 2023, dom anek saih di TPHCM tagok rilo jang labaih 21 rabau di gah công lập saong langiu công lập. Bruk tagok rilo yau nan, lac kayua menuac sia tagok rilo saong pataom rilo di dom quận, huyện daok dalam tuk đô thị hóa, dom labik ngak kong yau ban Thủ Đức, Quận 12, quận Bình Tân, huyện Bình Chánh saong huyện Hóc Môn. Bruk ini nyu kateik trak tagok gah pato megru ban raya. Kadha vak di Đan Phương mangaok báo Tin Tức hu ndom ka bruk ini:

Ấp Phước Quới, xã Phú Tân, huyện Châu Thành lac bhum palei hu rilo bhap bini bangsa Khmer daok di tỉnh Sóc Trăng. Di pak ini hu palei pak kriem laa meng kan mai hu angan je, hu daong ka rilo sang hu jien mek tame tani tanat, tabiak truh kathaot, yam tagok tani tanat raidiuk. Yaom lac bruk pak kriem laa di pak ini rah tapa rilo trun - tagok, min dalam dom thun tapa, meng hu bruk sangka daong ba di Kanja pak ini saong bruk kham marat pato bruk ngak di dom urang nao dahlau bo bruk ngak meng kan ini daok hu khik ramik tal urak ini. Bahrau ini di palei ngak hu sa labik blei pandap pak meng kriem laa, daong ka palei ngak pak ini hu jalan lagaih piah cak rok patagok. Kadha vak di urang vak Thạch Hồng brei thau ka bruk nan:

Kuhria tal abih bilan 7/2022, tuai ravang me-in dalam taneh ia hu labaih 71 triệu mbang, dalam tuk bruk ba tabiak ka abih thun lac labaih 60 triệu mbang. Min, tuai dunya mai tal Việt Nam jeng daok biak takik, bahrau hu 733.000 mbang, nan lac bahrau hu 15% bruk ba tabiak dalam thun lac 5 triệu mbang. Di mbang ndom biai “pambuak veik prein khang du lịch Việt Nam” hu peih tabiak di TP.HCM dalam 2 harei 8 saong 9/8, rilo urang ilamo, doanh nghiệp gah du lịch hu ndem biai nao mai, hu klah rabha saong ginum biai, ba tabiak dom jalan ba gah du lịch Việt Nam siam veik biak samar, khang kajap saong siam kein lagaih jang. Kadha vak di Minh Thắm – urang vak di rayo sap ndom VN daok di TP.HCM hu ndem ka bruk ini.

Vụ ikan Nam meng bilan 5 tal puac bilan 10 lac mbang taong ikan praong dalam thun di urang taong ikan bhum tapen tasik Nam bộ. Mikva palei tasik mayah oh tabiak tasik taong ikan ye oh hu jien mek tame. Langiu di nan, gilai oh tabiak tasik ye dom urang ngak bruk taong ikan nao duah jalan ngak mbang karei, hadei di nan po gilai biak kan piah duah veik saabat nao gilai haong drei. Kayua yau nan ye, yaom xang manyek trun hu ba bui sambai, chreih chrai ka urang taong ikan tabiak tasik dalam dom harei tapa. Kadha vak di nyaom urang vak di mbao SGGP hu khan brei thau ka bruk ini:

Bình Thuận ieu lac sa tinh rilo urang bangsa Cam, pataom rilo abih di nyu daok dom xã dalam huyện Bắc Bình saong huyen Tuy Phong. Urak ini, di dom xã rilo urang bangsa Cam daok hu sang bac biak khang kadang duh ka anek saih pakat bac tiểu học saong THCS. Bruk sangka iek glang dom anek saih nao tal sang bac daok di dom bhum mikva bangsa Cam dak harei dak hu amaik ame caik hatai sangka tal. Kadha cih neh di Jasi – urang vak di rayo sap ndem VN di Ban raya HCM hu ndem mayai ka bruk caga dahlau brei ka thun bac bahrau thun 2022 -2023 di bhum mikva urang bangsa Cam daok di tỉnh Bình Thuận:

Piah rami ramik caga dahlau ka uranaih sit mầm non pakat pabam saong anek saih tiểu học urang bangsa takik di ini hu ginup ilamo dalam bruk pandar puac sap Viet, ba kein laba piah ka dom anek saih bac magru, taduan danak dak magru siammakre jang, UBND tỉnh Bình Thuận hu ba tabiak jalan ngak peih ngak danak dak “Paglaong bruk caga dahlau sap Viet nam ka uranaih mầm non pakat pabam saong anek saih tiểu học di bhum mikva bangsa takik tukvak ka 2, thun 2021 - 2025”. Kadha vak di Đình Hoà hu ba tagok mbao Online Bình Thuận hu ndem tal bruk ini: