VOV4.Êđê- Aguah mbrue (27/4), HĐND čar Daknông gưl 3, wưng păn bruă 2016 – 2021 mkŏ mjing leh klei bi kƀĭn thơ̆ng kơ bruă bi klă hdră êlan duh bi liê djăp bruă amrâ ngă wưng thŭn 2022 – 2025, lehanăn kơ bruă dăp mnuih. Ti anôk bi kƀĭn, HĐND čar Daknông trông čhai leh lehanăn mâo klei sa ai hŏng djăp hdră mtrŭn mâo bi klă kơ klei duh bi liê dŭm bruă amra ngă hlăm wưng thŭn 2022 – 2025. Mơ̆ng nâ̆n, ênoh tĭng bi liê jih jang êbeh 11 êbâo 700 êklai prăk, êgao mkrah mka hŏng wưng êlâo.

Tĭng kơ 5 thŭn ti anăp Daknông srăng duh bi liê kơ êbeh 170 mta bruă, boh nik nak dŭm bruă lŏ mkra mđĭ êlan klông hlăm čar, jih jang bruă nah gŭ hlăm ƀuôn prŏng, mkŏ mjing bruă sang čư̆ êa điện tử, lehanăn ƀuôn prŏng thâo mĭn... Ăt ti anôk bi kƀĭn, HĐND trông čhai leh kơ bruă mđĭ kyar klei duh mkra bi nao mđrĭng hŏng bruă răng mgang klei êđăp ênang yang ƀuôn, mdrơ̆ng hŏng klei ruă tưp, lehanăn hyuă kjăp bruă răng kriê ngăn dŏ, lehanăn wăl hdĭp mda. Phung bi ala bi klă kơ bruă lŏ thiăm mbŏ ênoh mnuih ngă bruă hlăm knơ̆ng bruă sang čư̆ êa čar kơ Trần Văn Diêu, khua adŭ bruă knơ̆ng bruă sang čư̆ êa čar Daknông./.

Pô mblang: Y-Khem Niê