VOV4.Êđê- Tlam hruê 3/5, Knơ̆ng bruă kahan ksiêm êlan klông brei thâo, hlăm 4 hruê mdei knăm m’ak, hruê 30/4 truh kơ hruê 1/5, hlăm kluôm ala mâo 111 klei truh hlăm êlan klông, ngă 58 čô mnuih djiê, 64 čô êka. Mkă hŏng 4 hruê mdei knăm m’ak thŭn êlâo, klei truh hlăm êlan klông thŭn anei hrŏ hlăm jih 3 hnơ̆ng čuăn, ênọh klei truh, ênoh mnuih djiê lehanăn mnuih êka. Hlăm 4 hruê mdei, êpul kahan ksiêm êlan klông kluôm ala hmao ƀuh, msir mghaih giăm 33 êbâo boh klei ngă soh hŏng hdră bhiăn răng mgang klei êđăp ênang êlan klông; mă kơ̆ng 207 boh êdeh ôtô, êbeh 7 êbâo boh êdeh mô tô, êdah ph’phŭt, sua mă 2.230 hră dưi mgăt êdeh. Khă snăn, kyua ênoh êdeh lehanăn mnuih găn êrô đĭ lu, ti dŭm ktuê êlan phŭn, boh nik êlan nao mŭt hlăm ƀuôn prŏng phŭn Hà Nội lehanăn ƀuôn prŏng Hồ Chí Minh, hlăk anôk bruă êlan klông đĭ kyar ka năng ôh mkă hŏng hnơ̆ng êdeh êdâo găn êrô khă dah dŭm anôk bruă djŏ tuôm ba nao leh jih êpul ngă bruă, kdrăp mnơ̆ng nao ktrâo lač, mbha mgrông êlan mơ̆ng ưm, ƀiădah ăt mâo lu anôk gŭn kpăk êlan klông./.

                                                    Pô mblang: H’Nêč Êñuôl