VOV4.Êđê- Ti anăp klei dleh dưi ksiêm dlăng mơ̆ng klei ruă tưp Covid 19 hlăk dôk tưp lar ktang ti čar Bắc Ninh, Dhar bruă kiă kriê klei ruah khua čar Bắc Ninh mâo leh klei akâo kơ Dhar bruă kiă kriê klei ruah khua ala čar brei mkŏ mjing klei ruah khua hnưm ti đa đa alŭ wăl hlăm dua kdriêk, 1 wăl krah lehanăn 1 ƀuôn prŏng. Wĭt lač kơ klei akâo anei, Dhar bruă kiă kriê klei ruah khua ala tŭ ư leh hŏng klei akâo anei, lehanăn brei klei dưi kơ đa đa alŭ wăl mplĕ hră ti ƀuôn prŏng Bắc Ninh, wăl krah Từ Sơn, kdriêk Tiên Du lehanăn kdriêk Gia Bình dưi mplĕ hră ruah pô bi ala Quốc hội gưl 15 lehanăn pô bi ala HĐND dŭm gưl wưng păn bruă 2021 – 2026 hnưm hĭn sa hrue mkă hŏng hrue ruah khua kluôm ala, jing hrue 22/5. Dhar bruă kiă kriê klei ruah khua ala čar mtă kơ dhar bruă kiă kriê klei ruah khua čar Bắc Ninh kiă kriê klei ruah khua bi ala Quốc hội gưl 15 lehanăn pô bi ala HĐND dŭm gưl wưng păn bruă 2021 – 2026 djŏ hŏng ênoh čuăn hdră bhiăn knŭk kna lehanăn mâo dŭm klei ktrâo atăt mơ̆ng Dhar bruă kiă kriê klei ruah khua ala čar./.

Pô mblang: Y-Khem Niê