VOV4.Êđê - Tlam hruê 7/5, ti anôk bruă Đảng čar Dak Lak, aduôn Trương Thị Mai, khua hlăm bruă kđi čar, khua bruă Đảng gưl dlông, khua êpul mkŏ mkra gưl dlông gĭt gai leh klei kƀĭn trông bi êdah klei bi mklă mơ̆ng phŭn bruă kđi čar kơ bruă knuă phung knuă druh.

Hlăm klei kƀĭn trông anăn Nguyễn Thanh Bình, khua bruă Đảng gưl dlông, k’iăng khua êpul bruă mkŏ mkra Đảng gưl dlông dưi bi êdah leh hdră mtrŭn mrô 84/2021 mơ̆ng phŭn bruă kđi čar kơ bruă tiŏ nao Nguyễn Đình Trung, khua bruă Đảng gưl dlông, k’iăng khua bruă Đảng čar, khua gĭt gai bruă sang čư̆ êa čar Dak Nông srăng mdei ngă k’iăng khua bruă Đảng čar, khua gĭt gai bruă sang čư̆ êa čar Dak Nông čiăng nao hgŭm hlăm êpul khua êmua, êpul kiă kriê bruă Đảng čar lehanăn ngă khua bruă Đảng čar Dak Lak wưng thŭn 2021-2025.

Blŭ hlăm klei kƀĭn trông anăn, aduôn Trương Thị Mai brei thâo, Nguyễn Đình Trung jing sa čô knuă druh mda asei dưi mâo klei mtô mjuăt kluôm ênŭm, mâo klei hriăm mơ̆ng lu bruă ngă mdê mdê, mâo leh 24 thŭn dôk  mă bruă ti krĭng Lăn Dap Kngư, mơ̆ng năn hŏng bruă klam mrâo, Nguyễn Đình Trung srăng lŏ dưi bi lar bruă klam, klei thâo pô čiăng dưi đru kơ bruă mkŏ mkra čar Dak Lak mâo klei đĭ kyar pral lehanăn kjăp ktang.

Y Khem pô mblang