VOV4.Êđê- Aguah mbrue (28/4) ti Hà Nội, Knơ̆ng kiă kriê êpul hgŭm mnuih mă bruă Việt nam kdrăm k’ah mkŏ mjing klei bi hdơr 135 thŭn hruê mnuih mă bruă tar lăn ala (1/5/1886 – 1/5/2021), mtrŭt mjhar mlan mnuih ngă bruă. Blŭ hrăm ti knăm anăn, Khua lăn čar Nguyễn Xuân Phúc lač, knŭk kna lehanăn phung ƀuôn sang drei mđing nanao dlăng kriê truh kơ gưl mnuih mă bruă lehanăn kơ êpul hgŭm mnuih ngă bruă. Khua lăn čar bi mni kơ djăp gưl bruă công đoàn ngă leh jăk klei Êpul kiă kriê gĭt gai, mă bruă hŏng klei tŭ jing giăm 10 thŭn êgao mơ̆ng mlan mnuih ngă bruă, hlŏng jing leh hrue knăm mơak kơ mnuih mă bruă kluôm ala. Mơ̆ng klei anăn, khua lăn čar mtă kơ êpul hgŭm bruă công đoàn bi pral mkŏ mjing hdră mă bruă mơ̆ng công đoàn Việt Nam hlue ngă djŏ hdră mtrŭn mơ̆ng klei bi kƀĭn prŏng Đảng 13 rơ̆ng bi lmâo klei kreh knhâo, ngă bruă hŏng klei dưi. Ti anôk bi kƀĭn bi ala kơ êpul mkŏ mjing mlan ngă bruă mnuih ngă bruă kơ klei êđăp ênang, kjăp hlăm klei mă bruă gưl dlông, khua phŭn bruă mnuih ngă bruă lehanăn phung knap mñai Đào Ngọc Dung mtrŭn asăp klei mtrŭt mjhar mlan ngă bruă kơ klei êđăo ênang lehanăn kjăp hlăm bruă knuă thŭn 2021, hŏng akŏ jing: “đĭ hĭn klei ksiêm wĭt, kiă kriê bi kjăp huĭdah mâo klei amâo mâo jăk kơ bruă knuă, lehanăn hgŭm bi mă bruă hlăm klei êđăp ênang”/.

Pô mblang: Y-Khem Niê