VOV4.Êđê - Ti anôk bi kƀĭn trực tuyến tlam hruê 16/5 ti Anôk bruă knŭk kna plah wah Anôk kriê dlăng anôk bruă gĭt gai mơ̆ng ala čar hŏng čar Bắc Giang lehanăn Bắc Ninh – 2 alŭ wăl dôk bluh mâo klei ruă Covid 19 pral êdi, hlăk 2 čar anei lŏ mâo dŭm pluh čô djŏ kman Sar CoV2. Gĭt gai klei bi kƀĭn, K’iăng khua knŭk kna Vũ Đức Đam, Khua anôk bruă gĭt gai brei thâo, hlăm 24h ti anăp srăng mkŏ mjing êlan đĭng blŭ mjêč tui ksiêm bruă hưn mthâo klei suaih pral mơ̆ng mnuih ƀuôn sang hlăm boh klei mjêč. Klah čŭn ti anôk bi kƀĭn, K’iăng khua knŭk kna Vũ Đức Đam, lač klă, klei ruă tưp anei bluh mâo pral êdi ti Bắc Giang kyua anei jing čar mâo lu anôk bruă tuh tia mkra mjing kyua anăn mâo lu mnuih ngă bruă, mă bruă hlăm anôk krĭp lehanăn mta kman mrâo mâo hnơ̆ng đĭ lar pral. K’iăng khua knŭk kna bi mklă, čiăng hluê ngă hdră kñăm mdua, knŏng čuăl krĭng hŏng dŭm anôk huĭ srăng bluh mâo klei ruă tưp lu ƀiădah ară anei mâo dŭm anôk amâo kriê dlăng kjăp ôh krĭng kwang dar, brei ƀư̆ mkra mtam. Anôk bruă gĭt gai mơ̆ng ala čar kah mbha leh grăp čô mnuih tui ksiêm kñăm dưi ksiêm dlăng kjăp bruă hluê ngă./.

H Nêč pô mblang