VOV4.Êđê- Mđĭ hĭn bruă ksiêm dlăng, lehanăn hyuă kjăp bruă kiă kriê mnuih mŭt kbiă mơ̆ng ala tač êngao, bi hrŏ tuič hnơ̆ng klei huĭ hyưt mơ̆ng klei ruă tưp covid 19 ñu kma hlăm ala čar drei. Anăn jing 1 hlăm dŭm bruă mjêč ti nôk bi kƀĭn aguah mbrue (14/4) mâo Êpul kiă kriê bruă ala čar gĭt gai, mtă leh kơ dŭm phŭn dhar bruă djŏ tuôm lehanăn dŭm čar, ƀuôn prŏng ngă bruă. K'iăng khua knŭk kna Vũ Đức Đam, Khua êpul kiă kriê ala čar mdrơ̆ng hŏng klei ruă tưp covid 19 kiă kriê klei bi kƀĭn. Khua kiă kriê mñă, klei ruă tưp covid 19 hlăk dôk đĭ lar dleh dưi ksiêm dlăng ti lu ala čar, hlăm anăn mâo ala čar Campuchia, Thailand, Malaysia... hmăi jĕ giăm hĭn hŏng ala čar drei. Wưng anei bi dưn yua jih klei dưi mdrơ̆ng, pioh răng mgang, kyuadah dôk hlăm wưng mdei knăm 30/4, lehanăn 1/5, klei êrô êbat hlăm phung ƀuôn sang jing lu. Tui si Thượng tướng Nguyễn văn Sơn, k'iăng khua phŭn bruă kahan ksiêm, năng bi hyuă kjăp jih jang klei mŭt kbiă, mbĭt hŏng bruă klam mơ̆ng knơ̆ng bruă sang čư̆ êa dŭm čar, ƀuôn prŏng boh nik phung djă akŏ djăp bruă duh mkra mnia mblei, k'iăng khua knŭk kna Vũ Đức Đam lŏ mñă, lŏ dơ̆ng ngă hŏng klei kjăp, mghaih msir phung ñŭ kma hlăm ala čar soh hŏng klei bhiăn./.

Pô mblang: Y-Khem Niê