VOV4.Êđê - Hrue mbrue (6/4), Phŭnbruă lĭng kahan mkŏ mjing leh klei bi kƀĭn trực tuyến tal 14 Êpul phung truăn kơ bruă răng mgang klei êđăp ênang tuôr tal 4, wưng thŭn 2021 – 2023 dôk hlăm knua bi kƀĭn phung khua phŭn bruă lĭng kahan ASEAN pŏk mlar. Đại tá Mạc Đức Trọng, khua êpul truăn kơ bruă răng mgang klei êđăp ênang Việt Nam lehanăn aduôn Matsuzawa Tokmoko, khua êpul truăn kơ bruă răng mgang klei êđăp ênang Nhật Bản hrăm mbĭt kiă kriê klei bi kƀĭn. Klei bi kƀĭn anei lŏ bi klă bruă klam, k’hưm, klei jing mơ̆ng Việt Nam hlăm klei hgŭm tui si klei bhiăn mguôp lu tĭng kơ bruă răng mgang klei êđăp ênang Liên hợp quốc ti alŭ wăl. Anei jing wưng găl mđĭ hĭng klei hriăm plah wah dŭm ala čar lehanăn Liên hợp quốc hlăm anăn mtrŭt phung mniê nao mguôp hlăm bruă răng mgang klei êđăp ênang. Đại tá Mạc Đức Trọng brei thâo: Klei bi kƀĭn khua phŭn bruă lĭng kahan ASEAN pŏk mlar mâo đru mguôp leh kơ klei hgŭm răng mgang klei êđăp ênang, bruă lĭng kahan kyua klei êđăp ênang, hơĭt kjăp lehanăn mđĭ kyar ti alŭ wăl lehanăn tar rŏng lăn./.

Y Khem pô mblang