VOV4.Êđê - Anôk bruă lông ba yua, knơ̆ng bruă ksiêm duah kơ klei ruă tưp gưl dlông mâo bi leh gưl tal sa lông tlŏ mgang vaccine Covivac hlăm 120 čô mnuih čŏng brei lông tlŏ. Tui si nai prŏng, nai prĭn Vũ Đình Thiểm, khua anôk bruă lông tlŏ mgang, hrue 15/5 leh êgao mâo 120 čô mnuih akâo lông tlŏ mâo tlŏ leh ênŭm dua aruăt vaccine Covivac. Tui si tĭng truh hrue 29/5, êpul ksiêm duah srăng mă jih jang mta ksiêm dlăng ai kdơ̆ng hŏng klei ruă leh 14 hrue mâo tlŏ aruăt tal 2 mơ̆ng 120 čô mnuih anăn. leh kơ anăn mă êrah êlâo kơ tlŏ aruăt tal 1, êlâo kơ tlŏ aruăt tal 2, lehanăn 14 hrue leh tlŏ aruăt tal 2 srăng mơĭt kơ Canada ksiêm bi mklă hnơ̆ng ai dưi kdơ̆ng hŏng klei ruă hlăm êrah, êlâo lehanăn êdei kơ tlŏ. Tơdah leh ƀuh boh tŭ dưn mâo ai dưi kdơ̆ng hŏng klei ruă, mbĭt hŏng boh tŭ dưn klei êđăp ênang mơ̆ng caccine, êpul ksiêm dlăng srăng mâo klei hâo mdah hŏng phŭn bruă mdrao mgŭn lŏ lông ngă ti gưl tal 2. Tui si tĭng gưl tal dua srăng ngă hlăm mlan 7. Covivac jing vaccine Covid 19 mơ̆ng knơ̆ng bruă ksiêm duah Vaccine lehanăn mnơ̆ng mdrao mgŭn IVAC ksiêm duah mkra mjing. Vaccine ară anei hlăk dôk lông ba yua ti sa boh sang hră Đại học Y Hà Nội. IVAC ba yua kdrăp mkra mjing vaccine mơ̆ng mta boh mnŭ, jing kdrăp mkra mjing vaccine đưm đă, dưi ba yua mkra mjing vaccine hdrak mnŭ./.

Y Khem pô mblang