VOV4.Êđê - Mkra, mkăp leh anăn kiă kriê hră kak asei jih jang mnuih jing hdră mtrŭn mơ̆ng knŭk kna. Hluê ngă klei gĭt gai mơ̆ng Phŭn bruă kahan ksiêm, êpul bruă djŏ tuôm kahan ksiêm čar Dak Lak hlăk tiŏ nao lu êpul, mđĭ mmông hnơ̆ng mă bruă čiăng tŭ mă hră mơar mkăp hră kak asei kơ jih jang mnuih dưm chip điện tử rơ̆ng hnơ̆ng jăk leh anăn djŏ hdră kčah.

Anôk bruă ngă hră mơar knŭk kna čar Daklak jing leh sa hlăm 18 anôk dôk mkăp kak asei mâo chip điện tử, mă bruă mơ̆ng 7h aguah hlŏng truh kơ 9h mlam, hlăm grăp hrue mâo tŭ mă truh 600 pŏk hră mơar mơ̆ng phung ƀuôn sang nao ngă kak asei. Mmông lŏ dơ̆ng thiăm mă bruă truh 15h/hrue, hrô kơ 8h/hrue msĕ si êlâo dih, dưi đru leh kơ phung ƀuôn sang nao ngă kak. Y-Dhêč Kƀuôr, sa čô mnuih mơ̆ng ƀuôn Akŏ Dhông, ƀuôn hgŭm Tân Lợi, ƀuôn prŏng Ƀuôn Ama Thuôt nao ngă kak êjai krah yang hrue dơ̆ng lač:

“Diñu mă bruă jih ai tiê êdi, čiăng bi leh bruă tui si klei čiăng, pral mâo mkăp kak asei kơ phung ƀuôn sang. Hŏng klei ngă bruă mâo klei đua klam msĕ snăn hmei ƀuh mơak mơh, kyudah leh truh kơ anei mâo ngă hŏng klei khuăt pral. Hŏng mmông mă bruă msĕ snăn, kâo ƀuh klei bi mă bruă jing pral hĭn mkă hŏng êlâo dih”.

Kiều Văn Trầm, k’iăng khua adŭ bruă kahan ksiêm kiă kriê kơ hră mơar hlăm klei êđăp ênang yang ƀuôn, kahan ksiêm čar Daklak brei thâo, mbĭt hŏng klei mđĭ êbeh dua blư̆ lu hĭn hlăm grăp hrue, lehanăn mă nanao hlăm dăl 7 hrue/hrue kăm, dhar bruă kahan ksiêm lŏ tiŏ nao knuă druh thơ̆ng kơ bruă, phung thâo hlăm bruă truh hlăm nah gŭ đru kơ phung ƀuôn sang ngă kak asei. Siămdah, kyua anôk ala prŏng, mnuih hdĭp raih rưng, kdrăp mă bruă adôk kƀah snăn bruă ngă kak asei adôk tuôm hŏng lu klei dleh dlan. Ti anăp klei čiăng kơ bruă knuă msĕ snăn, kahan ksiêm čar Daklak mâo leh klei akâo lŏ mđĭ mmông ngă bruă truh 19h/hrue, lehanăn mkŏ mjing dŭm êpul hiu ngă brei kak asei truh hlăm krĭng taih kbưi:

“Čiăng kơ phung ƀuôn sang krĭng taih kbưi pral mâo ngă kak hŏng klei ênưih, hmei tiŏ nao leh knuă druh truh hlăm dŭm să, ƀuôn hgŭm ti dŭm kdriêk, wăl krah, ƀuôn prŏng. Jih jang mnuih ya alŭ wăl snăn nao kơ anôk hrui mă jih jang ênoh klei čiăng kơ bruă ngă kak giăm hĭn ngă hră mơar kơ anăn. Lehanăn ya mta klei tăm mâo hĕ klei soh čhuai snăn kahan ksiêm să, ƀuôn hgŭm lŏ bi klă brei, mđing mă bruă tal êlâo hlăm anôk lu mnuih, êjai hrue ngă ti anôk kbưi, mlam mă bruă hlăm anôk giăm. Mơ̆ng ară anei truh hrue 30/6 jih jang mnuih bi mlih ngă kak mrâo hĕ sơăi hlăm alŭ wăl pô”.

Tui si klei yap, kluôm čar Daklak mâo hlăm brô 1 êklăk 500 êbâo čô mnuih djăp klei găl dưi nao ngă kak. Truh ti wưng anei, kahan ksiêm čar mâo tŭ mă leh truh 70 êbâo hră mơar mơĭt truh kơ phŭn bruă kahan ksiêm mghaih msir bruă bi mlih ngă kak. Tui si hdră truh hrue 30/6 kahan ksiêm čar Daklak bi leh giăm 1 êklăk 200 êbâo pŏk kak asei, tui si ênoh čuăn ƀiă êdi bi mâo 70% mơ̆ng phŭn bruă kčah mtrŭn. Snăn, kah knar hlăm grăp hrue bi mâo tŭ mă truh 9 êbâo 600 pŏk hră mơar akâo ngă kak. Hŏng bruă đua klam prŏng hĭn êpul kahan ksiêm, lehanăn mnuih hlăm čar bi đăo knang kơ bruă ngă kak asei mrâo hlăm grăp hrue srăng lŏ mâo klei găl ênưih hĭn ngă bruă, lehanăn sĭt nik srăng bi leh djŏ hŏng wưng kčah mtrŭn.

Thượng tá Tô Anh Dũng, k’iăng khua kahan ksiêm kiă kriê bruă hră mơar kơ klei êđăp ênang yang ƀuôn, hlăm phŭn bruă kahan ksiêm brei thâo: Leh hdră bhiăn kak asei mâo Quốc hội bi mklă, Phŭn bruă kahan ksiêm mkŏ mjing bruă bi mlih, mkăp kdrăp mkra kak asei, lehanăn bruă kiă kriê kak asei. Jih jang bruă mkra kak asei mâo mkŏ, bi đru, lehanăn ngă bruă hŏng klei tŭ dưn, kơ bruă knŭk kna kiă kriê, năng djŏ hŏng bruă kahan ksiêm:

“Êlâo dih bruă ngă kak asei kơ jih jang mnuih, hlăm klei mă gru kngan hŏng kdrăp hơăi mang. Snăn ară anei hmei mâo leh klei mjuăt bi hriăm knuă druh ngă kak ti 63 boh čar, ƀuôn prŏng ti sang hră đại học Bách khoa lehanăn C06 mâo leh asăp mtrŭn truh kơ kahan ksiêm djăp alŭ wăl pioh diñu čih anăn phung knuă druh, lĭng kahan mâo hdră nao hriăm”.

Bruă mkra, mkăp lehanăn kiă kriê kak asei hđăp nao kơ bruă mkăp kak asei mrâo jing leh hdră êlan mơ̆ng knŭk kna. Phŭn bruă ngăn prăk mâo leh mơh hră mtrŭn kơ bruă bi hrŏ ênoh prăk tăk kơ mnuih nao ngă kak. Mơ̆ng anăn, jih jang mnuih Việt Nam djăp mơ̆ng 14 thŭn kơ dlông dưi nao ngă kak, mlih ngă kak mrâo, mlih mơ̆ng kak 9 mrô; 12 mrô jing mta kak mrâo mâo chip điện tử dưi bi hrŏ truh kơ mkrah ênoh prăk tăk mkă hŏng klei mtrŭn êlâo dih. Ară anei dhar bruă kahan ksiêm djăp alŭ wăl ngă bi pral bruă mkăp lehanăn kiă kriê kak asei kơ jih jang mnuih./.