VOV4.Êđê- Leh êbeh 1 hrue mă bruă mjêč, aguah mbrue (9/3), ti anôk bruă gưl dlông Đảng, klei bi kƀĭn tal dua êpul kiă kriê gưl dlông gưl 13 ngă klei bi ruĕ. Blŭ bi ruĕ klei bi kƀĭn gưl dlông 2, Khua gĭt gai Đảng, khua lăn čar Nguyễn Phú Trọng mñă jih jang phung nao kƀĭn bi mâo bruă đua klam prŏng, dưn yua klei êngiê, bi trông hŏng klei klă, đru mguôp lu klei blŭ yuôm bhăn hlăm hră mdah, lehanăn dŭm boh phŭn klei bi kƀĭn. Êpul gĭt gai gưl dlông mâo leh klei bi tŭ ư prŏng bi klă hdră mtrŭn. Kơ klei hưn mdah ênoh mnuih hlăm khua prŏng mơ̆ng dŭm anôk bruă knŭk kna, Khua gĭt gai Đảng khua lăn čar lač: Hŏng klei bi klă, bi sa hnơ̆ng hdră êlan dăp mnuih mâo klei bi kƀĭn prŏng Đảng 13 bi klă leh dlăng hŏng klei klă kơ klei bi kƀĭn. Tui si ênoh phung khua prŏng ară anei čiăng bi mâo hnơ̆ng kjăp kơ bruă mkŏ mjing êpul khua kiă kriê hlăm knŭk kna mâo klei bi mguôp tal êlâo hĭn mprăp kơ gưl ti anăp hŏng klei klă mngač, lŏ dơ̆ng čuê, lehanăn mđĭ bi lar. Êpul khua gĭt gai gưl dlông bi trông hŏng klei klă mngač, hŏng klei kjăp, ruah hdră djŏ hĭn hlăm hdră dưi ngă lehanăn mâo klei dưi prŏng./.

Pô mblang:  Y-Khem Niê