VOV4.Êđê- Tlam hruê 8/4, Quốc Hội gưl XIV bi ruê̆ leh klei bi kƀĭn tal 11. Blŭ hlăm klei bi ruê̆ anăn, khua Quốc Hội Vương Đình Huệ bi êdah klă: Leh 12 hruê hŏng klei bi kƀĭn mjêč, klă mngač lehanăn mâo bruă klam, klei bi kƀĭn tal 11, Quốc Hội gưl XIV dưl bi leh jih dŭm boh phŭn hdră êlan dưi bi dah leh, lehanăn mâo klei tŭ jing jăk siam. Quốc Hội mâo leh klei bi mklin kluôm ênŭm dŭm bruă ngă hlăm wưng thŭn 2016-2021 mơ̆ng dŭm anôk bruă hlăm knŭk kna, ksiêm dlăng, bi mklă dŭm bruă knuă kơ mnuih mă bruă lehanăn dŭm boh phŭn yuôm bhăn mkăn. Quốc Hội mâo leh lu mmông čiăng bi trông, ksiêm dlăng dŭm klei hưn thâo mơ̆ng bruă knuă Quốc Hội, khua lăn čar, knŭk kna, dŭm anôk bruă hlăm Quốc Hội, sang phat kđi yang ƀuôn gưl dlông, anôk bruă ksiêm dlăng kđi klei yang ƀuôn gưl dlông, anôk bruă mkă tĭng ngăn prăk ala čar.

Ăt hlăm tlam hruê 8/4, Quốc hôị bi mklă leh klei akâo čiăng mơ̆ng Khua lăn čar kơ anăn K’iăng khua lăn čar lehanăn phung khua hlăm Êpul hgŭm bruă lĭng kahan lehanăn răng mgang klei êđăp ênang ala čar hluê hdră mplĕ hră hgăm, hlăm anăn, Khua knŭk kna Phạm Minh Chính păn ngă K’iăng khua kiă kriê Êpul hgŭm bruă lĭng kahan lehanăn răng mgang klei êđăp ênang ala čar. Khua Quốc hội Vương Đình Huệ, Khua phŭn bruă lĭng kahan Phan Văn Giang, Khua phŭn bruă hŏng tač êngao Bùi Thanh Sơn păn ngă Khua kiă kriê hlăm Êpul hgŭm bruă lĭng kahan lehanăn răng mgang klei êđăp ênang ala čar. Quốc hội ăt bi mklă hŏng hdră mplĕ hră hgăm ruah Đỗ Văn Chiến (Khua hlăm Anôk bruă Đảng gưl dlông, Khua bruă Đảng Êpul Mặt trận čar kwar gưl dlông Việt Nam) lehanăn Aduôn Võ Thị Ánh Xuân (Khua hlăm Anôk bruă Đảng gưl dlông, K’iăng khua lăn čar) păn ngă K’iăng khua kiă kriê Êpul hgŭm bruă ruah khua ala čar, mbĭt hŏng lu bruă klam păn ngă Khua hlăm Êpul hgŭm bruă ruah khua ala čar. Leh kơnăn, Quốc hội bi mklă leh Hdră mtrŭn kơ bruă bi mklă knuă druh păn ngă K’iăng khua lehanăn phung khua hlăm Êpul hgŭm ruah khua ala čar./.

Pô mblang: Y-Khem Niê