VOV4.Êđê- “Mnuih ala tač êngao dôk hdĭp djŏ klei bhiăn ti lăn čar Việt Nam mâo klei dưi êngiê hlăm klei đăo djŏ hŏng mta mtrŭn mơ̆ng hdră bhiăn klei đăo”. Anei jing klei bi klă mơ̆ng k’iăng khua phŭn bruă ksiêm dlăng bruă knuă hlăm ala čar, Khua Êpul hgŭm kiă kriê klei đăo mơ̆ng knŭk kna, Vũ Chiến Thắng ti anôk bi tuôm mnuih ala tač êngao mâo leh Êpul bruă kiă kriê klei đăo mơ̆ng knŭk kna mkŏ mjing aguah mbruê (27/4), ti Hà Nội. Nao ti anôk bi tuôm anăn, mâo phung khua kiă kriê, pô bi ala dŭm anôk bi kƀĭn mơ̆ng mnuih ala tač êngao, êpul bruă klei đăo, mbĭt hŏng phung bi ala dŭm phŭn dhar bruă, Êpul bruă klei đăo alŭ wăl. Ti anôk bi tuôm phung bi ala, mâo dlăng leh rup kơ klei hdĭp, klei đăo ti Việt Nam, hmư̆ klei hâo mdah kơ dŭm mta bruă mơ̆ng hdră bhiăn êngiê klei đăo, hdră bhiăn knŭk kna kơ klei mŭt kbiă, kơ klei hlue ngă dŭm bruă hlăm klei đăo... Mơ̆ng anăn kñăm čang hmăng mnuih ala tač êngao dôk hdĭp lehanăn bi kƀĭn klei đăo ti Việt Nam thâo săng hĭn kơ hdră bhiăn klei êngiê klei đăo, kơ klei dưi, lehanăn bruă êngiê hlăm klei đăo mơ̆ng mnuih ala tač êngao dôk hdĭp djŏ klei bhiăn ti Việt Nam./.

Pô mblang: Y-Khem Niê