VOV4.Êđê - Bruă klam kđi čar mŏng Binh đoàn 15 mâo Knŭk kna, Phŭn bruă lĭng kahan jao, anăn jing: Mđĭ kyar bruă duh mkra mguôp hŏng bruă bi kjăp klei êđăp ênang ala čar, mkŏ mkra krĭng ƀuôn sang – ala ƀuôn ti alŭ wăl Lăn dap kngư. Leh êbeh 35 thŭn ngă bruă, dŭm êpul êya, anôk bruă duh mkra hlăm Binh đoàn mâo leh klei bi hgŭm kjăp hŏng 270 alŭ, ƀuôn mơ̆ng 33 boh să, ƀuôn hgŭm, wăl krah hlăm 4 čar: Gia Lai, Kon Tum, Bình Định, Quảng Bình. Mbĭt hŏng bruă duh mkra pla mjing, mnia mblei tŭ dưn, dŭm êpul êya mđing dlăng nanao klei hdĭp kơ mnuih mă bruă.

Ti să knông lăn Ia Đal, kdriêk Ia H’Drai, čar Kon Tum jing sa anôk bŏ hŏng klei dleh dlan, mâo lu mnuih djuê ƀiă dôk hdĭp mda tinei. Hŏng bruă klam mđĭ kyar bruă duh mkra - ala ƀuôn mbĭt hŏng bruă răng mgang klei êđăp ênang, Binh đoàn 15 (hlăm phŭn bruă lĭng kahan) rŭ mdơ̆ng leh knơ̆ng bruă 776. Dưi mkŏ mjing 12 êpul mnuih mă bruă, hlăm anăn lu jing mnuih ƀuôn djuê ƀiă. Ayŏng Quách Công Quản jing sa čô hlăm dŭm čô êlâo hĭn jing mnuih mă bruă ti knơ̆ng bruă 716, mâo prăk ƀơk hlăm grăp mlan hơĭt kjăp hlăm ƀrô 6 êklăk prăk lač: “Mơ̆ng hruê hmei mă bruă truh kơ ară anei mâo leh 7 thŭn, bruă mă hlăm klei mĭn hơĭt kjăp. Bi klă srăng mă bruă sui thŭn mbĭt hŏng knơ̆ng bruă, dưi mâo dŭm klei mtô mơ̆ng dŭm ayŏng amai nah dlông. Klei mă bruă nao mbĭt hŏng bruă duh mkra, kyuanăn klei hdĭp mâo leh mơh klei hơĭt”

Hŏng 35 thŭn tui ngă bruă klam mkŏ mkra bruă duh mkra lehanăn răng mgang klei êđăp ênang ti knông lăn, Binh đoàn 15 dưi rŭ mjing 44.000 ha ana boh kroh alŭ wăl knông lăn krĭng dưr Lăn Dap Kngư, Lào lehanăn Campuchia. Thŭn leh êgao, ênoh prăk ba wĭt êbeh kơ 2000 êklai prăk, mkŏ mjing bruă mă lehanăn prăk mlan kơ 17.000 čô mnuih mă bruă (hlăm anăn mâo giăm 8.000 čô mnuih mă bruă jing mnuih djuê ƀiă). Dŭm knơ̆ng bruă mbĭt hŏng anăn mâo leh klei nao bi mguôp hŏng 270 alŭ, ƀuôn. Mkŏ mjing klei bi mguôp kơ 4.600 boh gŏ sang djuê lar hŏng dŭm gŏ sang mnuih djuê ƀiă.

Êngao kơ năn, Binh đoàn dưi rŭ mdơ̆ng lu bruă rŭ mkra msĕ si: sang hră mơar, sang êa drao, anôk mdrao mgŭn hlăm să, duh bi liê čiăng lŏ bi mrâo dŭm êtuh km êlan klei pui kmlă lehanăn êlan klông. Dŭm klei rŭ mdơ̆ng anei dưi đru kơ mnuih ƀuôn sang lăm lui klei ư̆ êpa lehanăn bi hrŏ klei ƀun ƀin, mkŏ mkra krĭng ƀuôn sang mrâo, mđĭ lar bruă mtô mjuăt lehanăn bruă mdrao mgŭn hlăm alŭ wăl. Đại tá Trần Quang Song, khua kiă kriê bruă kđi čar ti Binh đoàn 15 jing sa čô mnuih hrăm mbĭt hŏng mnuih djuê ƀiă Lăn Dap Kngư, snăn mâo dŭm klei hdơr mĭn kluôm ênŭm: “Hrăm mbĭt hŏng mnuih ƀuôn sang ti Binh đoàn 15 êdah êdi jing klei sĭt suôr: hrăm mbĭt hlăm klei hdĭp, hlăm êpul êya bruă mkŏ mkra, mơ̆ng ênuk hđeh êlăk truh kơ mduôn khua lehanăn djiê, mâo wăt klei bi mđing uêñ hdơ̆ng pô hlăm klei đăo knang, klei hơ̆k mơak. Hmăng hmưi Binh đoàn srăng lŏ mđĭ hĭn dŭm knhuah gru yuôm bhăn anei, lehanăn lŏ ngă bi leh dŭm bruă klam mâo leh.”

Hlăm dŭm thŭn leh êgao, mâo dŭm klei mlih amâo jăk kơ dŭm mnơ̆ng       dhơ̆ng bruă lŏ hma, prăk ba wĭt mơ̆ng ksu lehanăn kphê mâo klei hrŏ kjham, ƀiădah Binh đoàn 15 ăt rơ̆ng kjăp klei hdĭp kơ dŭm čô knuă druh lĭng kahan lehanăn mnuih mă bruă, jing boh kdrŭt kơ mnuih mă bruă srăng lŏ bi mguôp hŏng Binh đoàn 15 lehanăn mâo klei hơĭt dưi rŭ mdơ̆ng ƀuôn sang. Binh đoàn 15 dưi tui ngă mâo boh tŭ dưn dŭm hră êlan klei hdĭp hlăm yang ƀuôn msĕ si: “Êpul lĭng kahan hrăm mbĭt mkŏ mkra krĭng ƀuôn sang mrâo”, “lĭng kahan hrăm mbĭt kyua phung ƀun ƀin”. Êdah klă jing, mâo giăm 300 boh sang bi đru, klei bi mguôp lehanăn êbeh 260 km êlan klông, 120 km mnuôr êa dưi mâo klei lŏ wĭt mkra, mkra mrâo. Dŭm êtuh tôn braih dưi ba truh kơ dŭm gŏ sang knap mñai hlăm yan giăm wiă.

Mrâo anei, ƀri wưng nao hlăm knăm bi hdơr 35 thŭn hruê mkŏ mkra Binh đoàn 15, Thượng tướng Trần Đơn, khua bruă Đảng gưl dlông, k’iăng khua phŭn bruă lĭng kahan čih yap leh dŭm klei gĭr, klei thâo mơ̆ng dŭm čô knuă druh, lĭng kahan lehanăn dŭm čô mă bruă ti Binh đoàn, lehanăn lŏ iêu mthưr kơ anôk bruă anei srăng lŏ ngă jăk hĭn dŭm bruă klam bi mguôp hŏng mnuih mă bruă, boh nik jing mnuih mă bruă jing mnuih djuê ƀiă “Binh đoàn 15 čiăng mâo klei lŏ čuê hdră êlan bi mguôp plah wah čar- kdriêk, knơ̆ng bruă hŏng kdriêk lehanăn să, êpul mkŏ mkra hŏng ƀuôn sang, gŏ sang mnuih djuê lar hŏng gŏ sang mnuih djuê ƀiă. Bi mguôp hŏng dŭm gưl bruă Đảng nah gŭ, bruă sang čư̆ êa, mnuih ƀuôn sang hlăm alŭ wăl. Boh nĭk mprăp hlăm klei mkŏ mkra klei bi kƀĭn kluôm Đảng dŭm gưl čiăng đĭng truh klei kƀin kluôm mơ̆ng Đảng tal XIII. Ksiêm duah dŭm klei jing hlăm alŭ wăl, mơ̆ng anăn dưi mkŏ mkra hdră êlan hlăm klei bi kƀĭn kluôm lehanăn hdră êlan mkŏ mkra mnia blei djŏ hĭn.”

Hlăm klei bi kƀĭn kluôm pô bi ala tal VIII, wưng thŭn 2020-2025, êpul bruă Đảng ti Binh đoàn 15 bi mklă hlăm dŭm hruê mmông ti anăp srăng mkŏ mkra dŭm hdră êlan mnia blei bi mguôp, lŏ mkŏ mkra bruă mă mâo lu mnơ̆ng dhơ̆ng, mđĭ hnơ̆ng mnơ̆ng dhơ̆ng čiăng dưi truh hŏng klei čiăng mnuih blei yua lehanăn pŏk lar anôk mnia mblei. Klei kñăm dưi mâo ênoh mnơ̆ng mkŏ mkra truh kơ 9.800 êklai prăk. ênoh prăk ba wĭt truh kơ 8.700 êklai prăk.