VOV4.Êđê- Hruê 17/3, ti Hà Nội, Bruă Đảng kahan gưl dlông – Phŭn bruă lĭng kahan bi tuôm hŏng phung mda asei êdah kdlưn kluôm êpul kahan thŭn 2020. Đại tướng Ngô Xuân Lịch, K’iăng khua Bruă Đảng kahan gưl dlông – Khua phŭn bruă lĭng kahan nao lehanăn gĭt gai Knăm bi tuôm. Thŭn 2020, hdră bruă êdam êra dưi pŏk ngă hlăm kluôm anôk bruă lĭng kahan hŏng dŭm bruă, lu jơr lehanăn lu mta mrâo. Phung êdam êra anôk bruă lĭng kahan gĭr msir mghaih klei dleh dlan, gĭr bi ktưn, ba anăp hluê ngă tŭ jing bruă klam kđi čar mơ̆ng dŭm êpul êya, anôk bruă. Thŭn 2020, gưl dlông mâo bi mni leh giăm 2 êbâo cô êdam êra êdah kdlưn djăp gưl, bruă Đảng kahan gưl dlông mơ̆ng Phŭn bruă lĭng kahan ăt bi mni kơ 313 čô êdam êra êdah kdlưn; Êpul bruă lĭng kahan ruah leh 10 čô êdam êra êdah kdlưn lehanăn 18 čô mda asei mâo klei čang hmăng. Ti anôk bi tuôm, Đại tướng Ngô Xuân Lịch jao leh klei bi mklă mđĭ grat êlâo wưng kčah lehanăn brei mŭt klăm ngă bruă kahan knhăk hŏng 4 čô mâo anăn knăl phung mda asei êdah kdlưn hlăm kluôm anôk bruă lĭng kahan thŭn 2020./.

Pô mblang: H’Nêč Êñuôl