Knŏng adôk êbeh 1 hruê kăm, Knăm mơak durian Dak Lak 2026 srăng klă sĭt mphŭn pŏk hŏng 17 bruă ngă hnơ̆ng prŏng. Dak Lak mđing bi mklă Klei êdah kdlưn Guinness hŏng êpul êdeh mdiăng durian taih hĭn dlông rŏng lăn, mjing klei kruăk knăl hâo hưn, hưn mdah anăn knăl durian Dak Lak kơ dlông rŏng lăn. Klei mĭn mkŏ mjing Klei êdah kdlưn Guinness dlông rŏng lăn mphŭn mơ̆ng klei čiăng mđĭ hnơ̆ng mâo mơ̆ng durian Dak Lak hlăm anôk ba čhĭ dlông rŏng lăn.

Bruă bi mklă klei êdah kdlưn Guinness dlông rŏng lăn amâo djŏ knŏng kruăk knăl sa klei mrâo ôh ƀiădah lŏ mjing klei bi knăl hâo hưn, iêo jak klei mđing dlăng mơ̆ng klei mrâo leh anăn ala čar tač êngao, mơ̆ng anăn hưn mdah rup durian ăt msĕ mơh krĭng lăn Dak Lak. Đào Mỹ, K’iăng Khua Knơ̆ng bruă sang čư̆ êa čar Dak Lak, Khua Anôk bruă mkŏ mjing Knăm mơak durian Dak Lak 2026 brei thâo, hlăm boh klei bruă durian dôk tlă anăp hŏng lu klei lông dlăng, knăm mơak jing klei dhar kreh, jing  klei găl hưn mdah anăn knăl, mđĭ ênoh yuôm leh anăn kơhưm durian Dak Lak hlăm anôk ba čhĭ lu ala čar.