Dŭm să, ƀuôn hgŭm dưi mtă brei mjêč pŏk ngă Hdră mtrŭn 36 mơ̆ng Knŭk kna; mkăp brei ngăn prăk, tŭ mă leh anăn msir mghaih pral hră mơar mkăp mrô krĭng pla mjing, mrô anôk đŭng hruh, amâo lui hră mơar dôk sui kyua klei ngă soh. Gia Lai ăt mtă brei pŏk ngă bruă bi mklă mrô krĭng pla mjing hŏng dŭm mta mnơ̆ng dhơ̆ng phŭn, mâo klei găl ba čhĭ kơ ala tač êngao; mđing tal êlâo kơ dŭm mta mnơ̆ng dhơ̆ng durian, čêñ hruê̆, kphê, tiu leh anăn dŭm mta mnơ̆ng dhơ̆ng phŭn mkăn.

Dŭm êpul djŏ tuôm mđĭ hdră ksiêm dlăng, pral hmao ƀuh leh anăn msir mgaih ktang klei ngă soh hŏng hră mơar, boh tŭ ksiêm dlăng mnơ̆ng dhơ̆ng lŏ hma leh anăn dŭm klei ngă soh hlăm hdră kriê dlăng, ba yua mrô krĭng pla mjing, mrô anôk đŭng hruh. Kluôm čar Gia Lai ară anei mâo 451 mrô krĭng pla mjing, hŏng ênhă jih jang êbeh 13.420 ha. Čar ăt mâo 53 mrô knăl anôk đŭng hruh ba čhĭ kơ ala tač êngao, kluôm hnơ̆ng mơ̆ng 2700 ton boh mtah/hruê.