Čiăng dưi mâo klei hdĭp trei mđao msĕ si hruê anei, ung mô̆ ayŏng Đường leh anăn amai Nẫm ti alŭ 4, să Trà Tân, čar Lâm Đồng găn leh dŭm hruê mlan knap mñai, suăi êmăn duah ƀơ̆ng. Klei năng mpŭ ti ung mô̆ ayŏng Đường leh anăn amai Nẫm, anăn jing ai tiê gĭr ktưn, klei sa ai leh anăn gĭr krơ̆ng kjăp pưk hma ngă bruă čiăng tlaih ƀun leh anăn kpưn đĭ bi hơĭt klei hdĭp.

Mơ̆ng dŭm sào lăn tal êlâo mơ̆ng amĭ ama dua nah brei, dua ung mô̆ gĭr bi mlih mnơ̆ng pla čiăng mđĭ hnư hrui wĭt. Mơ̆ng pla mdiê, tiu, kphê, truh kơ pla kñŭl, ksu, ktơr,… ƀuh ya mnơ̆ng pla mâo ênoh jing ayŏng amai ba pla, mkra mđĭ lăn, mđĭ hnơ̆ng mâo boh mnga, lŏ mjing hnư hrui wĭt kơ gŏ sang.

Êngao kơ pla mjing, ayŏng amai lŏ rông êpul ŭn, êmô, bê,… Tơdah mâo mnơ̆ng ƀơ̆ng, mnơ̆ng pioh, ayŏng amai lŏ blei thiăm lăn čiăng pŏk mlar bruă pla mjing. Ară anei gŏ sang ayŏng amai mâo 6 ha kñŭl hlăk mboh, 1 ha lŏ mdiê, 2 ha lăn pla mnơ̆ng ƀiă hruê msĕ si ktơr, hbei ƀlang, êtak… ba wĭt hnư hrui wĭt hĭt giăm êtuh êklăk prăk grăp thŭn.

Amai Võ Thị Nẫm brei thâo, ƀuh ênoh kphê giăm anei lŏ dơ̆ng đĭ, gŏ sang ñu pla pluă leh ana kphê hlăm đang kñŭl lehanăn srăng lŏ pla thiăm tiu tơdah ênoh ênil găl ênưih.

Êlâo dih pla tiu, kphê ăt mâo hnư hrui wĭt lu mơh, ƀiădah ana tiu amâo mâo klei kjăp msĕ hŏng ana kphê hŏng ana kñŭl, kyuanăn dua ung mô̆ bi mklă bi mlih ba pla kñŭl jih. Lehanăn ară anei hlăk mboh leh. Dua ung mô̆ ăt tĭng mkă leh kơh lŏ dơ̆ng ba pla êbeh 1 ha kphê hlăm đang kñŭl. Tơdah găl ênưih snăn êdei anei srăng rŭ hĕ kñŭl ba pla pluă ana tiu hlăm ana kphê.

Čiăng mkra mjing mâo boh tŭ dưn, ung mô̆ ayŏng gĭr nao hgŭm hlăm dŭm adŭ mjuăt bi hriăm, ba yua dŭm hdră mnêč mrâo mrang mbĭt anăn jing tui ksiêm leh anăn thâo săng kơ anôk ba čhĭ dŭm mta mnơ̆ng lŏ hma ară anei čiăng mâo hdră bi mlih mnơ̆ng pla djŏ guôp, ba wĭt boh tŭ bruă duh mkra lu.

Ayŏng Võ Văn Đường yăl dliê, ung mô̆ ñu êlâo dih ăt pla tiu, kphê ƀiădah leh wưng tiu, kphê trŭn ênoh, snăn mrâo bi rai tiu, kphê mlih ba pla ktơr, kñŭl, kyua hlăk anăn kñŭl mâo ênoh.

Ară anei hluê si klei ktrâo lač mơ̆ng knuă druh bruă lŏ hma hluê ngă gru hmô pla mjing kñŭl doh, ƀiă ba yua hbâo hoá học, lu ba yua hbâo brŭ, djah djâo,… ƀuh ăt tŭ dưn mơh. Lač kluôm, hruê anei hluê ngă klei kreh knhâo ti anôk bruă mtô bi hriăm bruă lŏ hma ktrâo lač kơ pô ngă ƀuh tŭ hĭn.

Čiăng mđĭ lar boh tŭ dưn bruă pla mjing, ung mô̆ ayŏng amâo mâo brei lăn mdei ôh, bruă pưk hma jih thŭn mlan, leh hrui êmiêt mdiê, kñŭl truh kơ ktơr, hbei ƀlang. Ayŏng Đường lŏ brei thâo, yan hbei ƀlang mrâo êgao mâo ênoh êbeh 60 êbâo prăk/kg, gŏ sang ayŏng amai mâo hnư hrui wĭt hơĭt kjăp.

ăt hmăng hmưi Knŭk kna mđing dlăng, knơ̆ng bruă lŏ hma mtô bi hriăm dŭm mjeh mnơ̆ng pla djŏ guôp, mâo boh mnga lehanăn dưi kdơ̆ng hŏng klei kƀah êa, čhĭ mâo ênoh hơĭt ba wĭt boh tŭ bruă duh mkra lu hĭn.

Amâo djŏ knŏng ngă bruă duh mkra jăk, gŏ sang ayŏng amai lŏ bi hmô ba anăp hlăm dŭm bruă ngă, hdră bruă ti alŭ, să, msĕ si: nao hgŭm mkŏ mkra krĭng ƀuôn sang mrâo, mkŏ mkra gŏ sang dhar kreh, thâo bi mguôp, bi đru, bi đru mnuih ƀuôn sang čiăng hrăm mbĭt đĭ kyar.Trao kơ ai tiê gĭr ktưn găn klei dleh kpưn đĭ mơ̆ng ung mô̆ ayŏng Đường leh anăn amai Nẫm, Lâm Văn Nhu, Khua alŭ 4, să Trà Tân, čar Lâm Đồng brei thâo:

Hlăm alŭ 4 mâo gŏ sang Võ Văn Đường jing gŏ sang ƀĭng ngă lŏ hma thâo mbruă, tal êlâo, gŏ sang ăt dleh dlan êdi, ƀiădah truh kơ ară anei bruă duh mkra gŏ sang đĭ kyar hơĭt  kjăp, kyua pla kñŭl, ksu, ktơr, mdiê,… Anak ñu mâo sa čô nao ngă bruă kahan, sa čô nao ngă bruă lĭng kahan. Jih dua ung mô̆ gĭr ktĭr mă bruă knuă, sang mâo 5/6 ha kñŭl, bruă duh mkra hơĭt  kjăp.

Ung mô̆ ayŏng Đường leh anăn amai Nẫm jing mnuih ƀuôn sang ngă lŏ hma kreh kriăng, gĭr ktưn, tŭ klei dleh dlan ti krĭng lăn pô, kyua anăn amâo djŏ knŏng tlaih ƀun ƀiădah lŏ kpưn đĭ jing gŏ sang mdrŏng sah, mâo lu mnuih ƀuôn sang hlăm alŭ jih ai tiê bi mni, dlăng jing gru mngač čiăng tui hriăm leh anăn hluê ngă.