Anei jing sa hlăm dŭm bruă phŭn mơ̆ng knăm mơak boh durian Dak Lak thŭn 2026, mâo giăm 400 anôk čhĭ mnia mơ̆ng êbeh 140 anôk bruă duh mkra hlăm ala čar, 20 anôk bruă duh mkra mơ̆ng ala tač êngao.

Ti anôk rang mdah, klei mđing truh kơ dŭm mta mnơ̆ng dhơ̆ng hluê hdră mđĭ kyar bruă lŏ hma mtah lehanăn h'ĭt kjăp, ăt jing hdră tă mơ̆ng bruă boh durian Dak Lak. Lu anôk bruă ba leh dŭm hdră msir mrâo mrang, ba yua kdrăp sinh học kñăm đru kơ ƀĭng ngă lŏ hma pla mjing êđăp ênang mơ̆ng hdră kriê dlăng. Nguyễn Thanh Điền, bi ala kơ sa anôk bruă mkăp hdră sinh học hlăm bruă lŏ hma, brei thâo anôk bruă nao hlăm knăm anei hŏng klei čang hmăng kah mbha dŭm klei mrâo mrang hlăm bruă kriê dlăng klei hluăt ƀơ̆ng mnơ̆ng ngă ti ana boh durian.

"Hŏng klei rang mdah, mnuih ƀuôn sang dưi thâo săng klă hĭn kơ dŭm hdră msir hmei ba, boh nik jing dŭm hdră msir sinh học hlăm bruă kriê dlăng klei hluăt ƀơ̆ng mnơ̆ng ngă. Mơ̆ng anăn, đru kơ mnuih ƀuôn sang hơĭt ai tiê pla mjing, mđĭ hnơ̆ng tŭ jăk mnơ̆ng dhơ̆ng leh anăn đru mkŏ mjing bruă lŏ hma Việt Nam đĭ kyar hơĭt kjăp".

Klei nao hgŭm mơ̆ng 20 anôk bruă duh mkra ala tač êngao ăt mjing thiăm sa hdră bi hgŭm kơ hdră bruă. Mơ̆ng dŭm anôk rang mdah, ƀĭng hgŭm ala tač êngao mâo klei găl ksiêm dlăng klă klơ̆ng mnơ̆ng dhơ̆ng, bi anôk bruă duh mkra Việt Nam mâo klei găl dưi nao hgŭm hŏng dŭm klei čiăng klă klơ̆ng mơ̆ng dŭm wăl anôk mnia mblei. Mbĭt hŏng durian, dŭm mta mnơ̆ng OCOP leh anăn mnơ̆ng jăk alŭ wăl ăt dưi hưn mthâo ti hdră bruă, mjing klei găl čiăng kơ phung mkra mjing hưn mthâo anăn knăl leh anăn pŏk mlar wăl anôk mnia mblei.

Nguyễn Thị Thu An, Khua knơ̆ng bruă tuh tia mnia mblei čar Dak Lak, brei thâo hluê hŏng dŭm hdră bi hgŭm klă anăp, alŭ wăl čang hmăng ênoh yuôm boh mnga bruă lŏ hma amâo djŏ knŏng dôk ti hnơ̆ng ba čhĭ, ƀiădah dưi mđĭ hŏng hnơ̆ng tŭ jăk, anăn knăl, hdră mkra mjing leh anăn klei dưi mkăp djŏ hŏng klei čiăng mơ̆ng grăp wăl anôk mnia mblei. Anei jing hdră êlan nao čiăng kơ durian mbĭt hŏng dŭm mta mnơ̆ng OCOP mơ̆ng Dak Lak ƀrư̆ ƀrư̆ nao hgŭm êlam hĭn hlăm hdră ênoh yuôm hlăm ala čar leh anăn ala tač êngao.

"Êlâo hĭn jing brei dưi hưn mthâo boh durian Daklak truh hŏng mnuih blei yua, dưi mkŏ hŏng phung hrui blei leh anăn bi lar klei hâo hưn čar mjing nanao klei găl kơ dŭm anôk bruă duh mkra mnia mblei, ăt msĕ mơh mkŏ, ksiêm hriăm êlam hĭn kơ hnơ̆ng tŭ jăk leh anăn anôk mnia mblei čiăng dưi ba mnơ̆ng dhơ̆ng boh durian anei phiơr kbưi hĭn.".