Êpul hgŭm ƀĭng ngă lŏ hma čar Dak Lak ară anei mâo 102 anôk bruă Êpul hŏng giăm 300 êbâo čô ƀĭng hgŭm. Leh mkŏ dăp anôk bruă knŭk kna, hluê ngă gru hmô bruă knŭk kna alŭ wăl dua gưl leh anăn bi mŭt alŭ, ƀuôn, êpul mnuih ƀuôn sang, mtă brei mlih mrô, mđĭ kyar bruă duh mkra êpul êya leh anăn mkŏ mkra krĭng ƀuôn sang mrâo ba mdah klei čiăng mlih mrâo ktang phĭt mta phŭn, hdră ngă bruă mơ̆ng êpul hluê hdră klă sĭt, tŭ dưn.

Ti anôk bi kƀĭn, phung bi ala kah mbha lu gru hmô, hdră ngă tŭ dưn leh anăn ba mdah hdră msir mlih mrâo bruă ngă mơ̆ng êpul hgŭm hluê hdră djŏ hŏng klei čiăng mơ̆ng phung hgŭm, mtrŭt mđĭ hdră mlih mrô leh anăn mđĭ kyar dŭm êpul, êpul hgŭm bruă mguôp hŏng bruă mkra mjing hluê hdră mđĭ boh tŭ yuôm. Vũ Thị Thúy Hòa, Khua Êpul hgŭm mnuih ngă lŏ hma să Êa Drăng kah mbha klei thâo mơ̆ng alŭ wăl:

"Čiăng hrăm mbĭt hŏng ƀĭng ngă lŏ hma snăn tal êlâo brei thâo săng ya klei diñu čiăng čiăng kơ pô đru djŏ leh anăn djŏ mta kñăm pô kčah leh. Leh anăn leh mkŏ dăp bi hơĭt gru hmô mrâo snăn lŏ dơ̆ng mtô bi hriăm klă klơ̆ng, djă ti kngan ktrâo ti bruă kơ grăp čô khua êpul čiăng pŏk ngă leh anăn bruă kriê dlăng jih jang hră mơar điện tử ăt dưi bi mguôp jih jang hlăm Google Form".

Mbĭt hŏng dŭm gru hmô tŭ dưn, lu phung bi ala ăt bi êdah dŭm klei dleh dlan hlăm bruă ngă mơ̆ng êpul êya leh mkŏ dăp anôk bruă knŭk kna, boh nik klei čiăng bi mlih mrô hŏng phung knuă druh nah gŭ. Châu Thị Hồng Thảo, Khua Êpul hgŭm mnuih ngă lŏ hma să Hòa Mỹ lač klei akâo mơ̆ng boh sĭt ti nah gŭ:

"Akâo kơ Êpul hgŭm ƀĭng ngă lŏ hma čar mjuăt bi hriăm kơ klei bi mlih mrô, pŏk ngă klă anăp dŭm boh adŭ AI djŏ tuôm hŏng grăp anôk bruă, êpul hgŭm ti nah gŭ, čiăng kơ jih jang mnuih ƀuôn sang ti alŭ wăl să thâo leh anăn dưn yua kdrăp AI, boh nik hlăm boh klei ară anei jing klei mplư hlăm êlan Internet jing sa boh klei răng êdi."

Phung bi ala bi tŭ ư brei ƀuh bruă mlih mrâo boh phŭn, mđĭ hnơ̆ng tŭ jăk hdră ngă bruă êpul hgŭm brei hnưm dưi bi klă hŏng dŭm hdră msir djŏ guôp hŏng klei găl boh sĭt mơ̆ng grăp alŭ wăl, grăp anôk bruă Êpul hgŭm. H'Giang Niê, Khua Êpul hgŭm mnuih ngă lŏ hma čar Dak Lak brei thâo, dŭm klei blŭ, klei hưn amâo djŏ knŏng kah mbha lu gru hmô, hdră ngă tŭ dưn ƀiădah lŏ ba mdah lu hdră msir klă klơ̆ng čiăng mđĭ hnơ̆ng tŭ jăk hdră ngă bruă mơ̆ng êpul hgŭm.

“Dŭm mta phŭn dưi bi trông bi tŭ ư brei pral dưi bi mklă jing dŭm hdră bruă, dŭm hdră kčah leh anăn dŭm hdră msir djŏ guôp hŏng klei găl boh sĭt mơ̆ng grăp anôk bruă, grăp êpul hgŭm. Kyua anăn, grăp gưl Êpul hgŭm ƀĭng ngă lŏ hma, grăp êpul hgŭm brei mđĭ lar bruă klam, ai tiê čŏng pô, mĭn mrâo, mlih mrâo hlăm hdră mkŏ mjing hluê ngă, mjing klei bi mlih klă klơ̆ng kơ hnơ̆ng tŭ jăk bruă ngă mơ̆ng êpul hgŭm. Hmei hmei srăng bi mklin djăp ênŭm jih jang klei blŭ, klei akâo čiăng ksiêm dlăng thiăm mbŏ, ba hlăm dŭm mta phŭn hdră bruă hlăm wưng kơ anăp.”