VOV4.Êđê- Hruê 12/3 mrâo êgao, mnuih ƀuôn sang ti dŭm alŭ 9, 10 lehanăn 11 să Čư̆ San, kdriêk Mdrak, čar Dak Lak, anôk dôk hluê ngă bruă knơ̆ng kdơ̆ng êa 4.400 êklai prăk Akŏ Krông Pač, mphŭn nao mbĕ dôk kơ anôk mrâo. Anei jing klei mâo jih jang mnuih ƀuôn sang ti wăl ngă mkra mta bruă, anôk bruă sang čư̆ êa alŭ wăl dŭm gưl čar Dak Lak dôk čang hmăng dăl hlăm 12 thŭn êgao. Găn leh jih klei dleh dlan, gun kpăk, bruă anei phŭn tal êlâo dưi ruh mtlaih leh klei dleh dlan hĭn anăn jing msir mghaih anôk ala. Anei jing knhuang yuôm bhăn čiăng kơ bruă knơ̆ng kdơ̆ng êa dŭm êbâo êklai prăk pral dưi ngă leh, đru msir mghaih klei ksiêm tĭng kơ phŭn mkăp êa, êa krih mtah mda kơ ƀuôn sang lehanăn jing boh tŭ dưn yuôm bhăn mŏng dŭm bruă knơ̆ng kdơ̆ng êa mâo leh Knŭk kna, Quốc hội bi mklă pŏk ngă ti krĭng Lăn dap kngư.

Mrâo aguah ưm, jih gŏ sang 6 čô mnuih hlăm gŏ sang  Liêù Văn Sùng, alŭ 9, să Čư̆ San,  kdriêk Mdrak kgŭ pĭt leh, mphŭn êmiêt mnơ̆ng dhơ̆ng čiăng mprăp đuê̆ nao ti krĭng anôk dôk mrâo kbưi hŏng anăn êbeh 30 km, ti să Čư̆ Êlang, kdriêk Ea Kar. Leh êbeh 20 thŭn hdĭp mda ti nei, Sùng ăt dôk hnĭng kơ anôk anei ƀiădah ăt mơak đuê̆ nao ti anôk mkăn. Kyua wăl hdĭp mda mâo knŭk kna mkra mjing jăk hŏng 1000 m2 lăn dôk leh năn 1 ha lăn mkra mjing, giăm knơ̆ng kdơ̆ng êa, mnuôr mđoh êa truh ti anôk dôk, mâo lu êa. Ti anôk dôk mrâo lŏ giăm wăl krah să, pui kmlă, êlan klông, sang hră, anôk mdrao mgŭn duh bi liê klă klơ̆ng, ƀuăn srăng đru kơ gŏ sang Sùng sa klei hdĭp jăk siam hĭn.

“Pô bi mĭn êlâo êdei ăt đuĕ nao mơh, ƀrư̆ hnưm ƀrư̆ jăk hĭn čiăng mâo klei hdĭp mrâo. Bi anôk dôk hđăp snăn dleh dlan êdi, amâo čiăng ngă sa mta bruă ôh, adiê mđiă mâo ƀhŭl, adiê hjan kdlŭt, mkă hŏng wăl hdĭp mda mrâo snăn ênưih hdĭp hĭn.”

Dŭm êpul đru mnuih ƀuôn sang krĭng ênao akŏ Krông Pač ruh pưk sang

 Čiăng dưi đru kơ mnuih ƀuôn sang mbĕ đuê̆, jih dua kdriêk Mdrak leh anăn Ea  Kar ba nao leh êpul dŭm êtuh čô mnuih, mâo wăt kahan ƀuôn, knuă druh, đảng viên, phung êdam êra nao đru mnuih ƀuôn sang. Êdeh mdiăng mnơ̆ng dhơ̆ng, pưk sang đru mnuih ƀuôn sang, ai êwa hơ̆k mơak msĕ si knăm mơak. Nao đru mnuih ƀuôn sang ruh leh anăn mbĕ đuê̆ pưk sang, ayŏng Y Ten Niê, Khua bruă êdam êra wăl krah Mdrak, kdriêk Mdrak, brei thâo, phung êdam êra mbha leh bruă klam, čiăng rơ̆ng ai tiê leh anăn klei suaih pral kơ gưl đru kơ mnuih ƀuôn sang sui hruê.

“Bruă mbĕ đuê̆ mnuih ƀuôn sang hruê anei snăn pral, mjêč. Êpul êdam êra leh anăn dŭm anôk bruă bi hgŭm snăn gĭr jih ai tiê đru kơ mnuih ƀuôn sang hơĭt klei hdĭp mda. Mbha tui si êpul, hruê anei êpul anei leh anăn hruê êdei êpul mkăn lŏ dơ̆ng đru srăng rơ̆ng klei suaih pral kơ ayŏng anei leh anăn grăp mnĭt mmông srăng ngă bruă klam.”

Êdeh dŭ mdiăng mnơ̆ng dhơ̆ng, pưk sang đru mnuih ƀuôn sang amâo mă prăk

 Mbĭt hŏng anôk nao, ti anôk truh jing wăl hdĭp mda mrô 1, să Čư̆ Elang, kdriêk Ea Kar, dŭm êpul ăt srăng đru kơ mnuih ƀuôn sang rŭ mdơ̆ng pưk sang, hơĭt klei hdĭp mda. Trần Văn Thanh, Khua Knơ̆ng bruă sang čư̆ êa să Čư̆ Elang brei thâo, ti wăl anôk dôk mrâo mơ̆ng să mprăp leh čiăng kơ 230 gŏ êsei mnuih ƀuôn sang, 1.150 čô mnuih krĭng ênao akŏ Krông Pač hriê hdĭp mda. Ti nei, djăp mta klei msĕ si êa doh, êa pioh pla mjing, pui kmlă, êlan klông, sang hră, anôk mdrao mgŭn leh anăn lăn pla mjing dưi duh bi liê, mkra mjing jăk. Bruă sang čư̆ êa să ăt srăng gĭr jih ai tiê pô čiăng kơ mnuih ƀuôn sang pral ñŭ kma hŏng anôk dôk mrâo:

“Alŭ wăl ăt mkŏ mjing hdră, hdră kčah bi hgŭm hŏng dŭm adŭ bruă mơ̆ng kdriêk, hmei mprăp leh êpul leh anăn dŭm êpul gak răng čiăng drông mnuih ƀuôn sang. Rơ̆ng klei hdĭp hơĭt hnưm hĭn. Hmei srăng gĭr jih ai tiê pô čiăng mkŏ mjing pưk sang kơ mnuih buôn sang, si bĕ ngă  1-2 hruê hơĭt klei hdĭp mda. Phung anak čô nao sang hră snăn hmei ƀuăn rơ̆ng knŏng hlăm 2 hruê.”

Wăl anôk dôk mrâo dưi duh bi liê klă klơ̆ng hŏng djăp ênŭm anôk bruă nah gŭ

 Ngă bruă gĭt gai đru kơ mnuih ƀuôn sang mbĕ đuê̆ nao ti wăl anôk dôk mrâo, Nguyễn Đình Thìn, K’iăng Khua anôk bruă kriê dlăng hdră duh bi liê mkra êlan klông leh anăn bruă lŏ hma čar Dak Lak brei thâo, mâo êbeh 7 êtuh gŏ êsei mnuih ƀuôn sang krĭng ênao êa akŏ Krông Pač hlăm hdră mbĕ đuê̆ čiăng ngă bruă anăn. Leh 12 thŭn, truh ară anei ngă bruă mbĕ đuê̆ mnuih ƀuôn sang čiăng ruh mgaih anôk ala jing klei năng mơak. Khădah, bruă mbĕ đuê̆ jih jang ênoh gŏ êsei jing bruă prŏng, brei mâo klei gĭr ktưn prŏng mơ̆ng dŭm gưl bruă sang čư̆ êa mơ̆ng să truh ti čar, boh nik brei mâo klei thâo săng, tŭ ư mơ̆ng mnuih ƀuôn sang:

“Ăt lŏ dơ̆ng lač, ti nei brei mâo klei jih ai tiê mơ̆ng mnuih ƀuôn sang. Kơ êpul snăn hmei rơ̆ng tơdah mnuih ƀuôn sang jih ai tiê, bruă, mbĕ đuê̆ năng ai srăng bi leh êlâo 30-4, êmưt êdi jing 30/6. Khădah, kâo ăt bi mklă mnuih ƀuôn sang jing pô phŭn djăp mta. Mnuih ƀuôn sang tŭ ư, čŏng đru, phung nao êlâo đru phung nao êdei, phung riêng gah bi đru snăn bruă ngă srăng hnưm bi leh.”

          Snăn, leh 12 thŭn dôk čang guôn, mnuih ƀuôn sang krĭng ênao akŏ Krông Pač mphŭn dưi mbĕ đuê̆ truh ti wăl anôk dôk mrâo leh anăn ƀuăn srăng mâo sa klei hdĭp mrâo jăk siam hĭn. Bruă ngă tuôm kpăk đuôm, boh bik mâo wưng lĕ hlăm klei gun kpăk.  Hlăm mlan 9/2020, ăt adôk mâo klei bi tăng mgăl, dŭm tĭng djŏ tuôm ăt hdơ̆ng bi čhal kơ klei hluê ngă êmưt. Ƀiădah dưi găn leh jih jang klei, hŏng klei ngă bruă jih ai tiê mơ̆ng Phŭn bruă lŏ hma leh anăn mđĭ kyar krĭng ƀuôn sang leh anăn čar Dak Lak mbĭt hŏng bruă kđi čar hlăm gưl să, kdriêk leh anăn boh nik klei mlih mrâo klei thâo săng mơ̆ng mnuih ƀuôn sang, bruă knơ̆ng kdơ̆ng êa êbâo êklai prăl anei hlăk grăp knhuanh ruh mgaih klei dleh dlan. Tơdah găl ênưih, bruă anei srăng bi leh, leh anăn ba yua tui si hdră kčah mơ̆ng Knŭk kna, Quốc hôị mkra mlih hlăm thŭn 2021.

Pô mblang: H’Zawut Ƀuôn Yă