VOV4.Êđê-  Aguah hruê 8/4, Khua anôk bruă sang čư̆ êa čar Dak Lak Phạm Ngọc Nghị gĭt gai leh Klei bi kƀĭn kñăm ksiêm dlăng, msir mghaih dŭm klei djŏ tuôm kơ bruă hluê ngă hdră duh bi liê hlăm dŭm bruă ti alŭ wăl. Ti anôk bi kƀĭn, phung duh bi liê, bi ala dŭm knơ̆ng, dhar bruă hưn mdah leh klei dleh dlan, gun kpăk hlăm bruă msir mghaih dŭm mta klei djŏ tuôm kơ bruă hluê ngă hdră duh bi liê kơ dŭm hdră bruă ti alŭ wăl čar, mâo: Hdră čuăl mkă Wăl anôk lăn mnga êa m’ak, tač hlăp čhưn lehanăn tač hlăp golf Ênao Êa Ñaih, klei ba mdah Hdră bruă Logistics krĭng Lăn dap kngư mơ̆ng Anôk bruă Hâo hưn êlan kbưi Viettel. Blŭ hrăm klah čŭn ti anôk bi kƀĭn, Khua anôk bruă sang čư̆ êa čar Dak Lak Phạm Ngọc Nghị ksiêm mđing leh kơ dŭm klei dleh dlan, gun kpăk hŏng phung mă bruă duh bi liê.

Mbĭt anăn, jao kơ dŭm knơ̆ng dhar bruă, alŭ wăl bi hgŭm hŏng êpul êya djŏ tuôm ksiêm dlăng hdră čuăl mkă, bi leh klei hưn mthâo, đru kčĕ kơ dŭm mta hră m’ar djŏ si klei kčah mtrŭn, hnưm ba mdah kơ Anôk bruă sang čư̆ êa čar ksiêm dlăng, ruh mtlaih klei gun kpăk kñăm rŏng dŭm hdră bryă dưi pŏk ngă tŭ dưn, đru mđĭ kyar bruă duh mkra – ala ƀuôn mơ̆ng čar./.

                                                    Pô mblang: H’Nêč Êñuôl