VOV4.Êđê - Ƀri bi hdơr 90 thŭn Hruê mkŏ mjing bruă Đoàn êdam êra CS Hồ Chí Minh, hruê 24/3, bruă Đoàn čar Dak Lak lehanăn bruă Đoàn čar Dak Nông mkŏ mjing leh Hdră bi tuôm hŏng phung knuă druh mă bruă Đoàn mŏng dŭm ênuk gưl. Ti anôk bi tuôm, phung bi ala lŏ bi hdơr leh kơ knhuah gru kdrưh k’ăm mŏng Êpul bruă Êdam êra CS Hồ Chí Minh lehanăn bi mjĕ mjuk, bi kah mbha klei thâo, hdră ngă bruă jăk čiăng kơ hdră bruă Đoàn, hdră bruă êdam êra dưi ba wĭt lu boh tŭ dưn hĭn.

Dŭm thŭn giăm anei, Đoàn êdam êra CS Hồ Chí Minh čar Dak Lak jing êpul êya êdah kdlưn kluôm ala, ba akŏ hlăm hdră bruă Đoàn lehanăn bruă êda, êra krĭng Lăn dap kngư. Ƀri gưl anei, hŏng klei dưi brei mŏng Êpul bruă Đoàn êdam êra CSHCM gưl dlông, Anôk bruă Đoàn čar Dak Nông mkŏ mjing leh Knăm hưn mthâo klei bi mklă knuă druh păn ngă K’iăng khua bruă Đoàn čar Dak Nông gưl III, wưng thŭn 2017-2022. Hluê anăn, Trương Văn Bình, Khua anôk bruă hdră bruă êdam êra čar Dak Nông, K’iăng khua Êpul êdam êra čar, amai H’Hồng, Khua bruă Đoàn kdriêk Dak Glŏng dưi păn ngă K’iăng khua bruă Đoàn čar Dak Nông, wưng thŭn 2017-2022./.

H’Nêč pô mblang