VOV4.Êđê - Klei hưn mơ̆ng Anôk bruă kahan ksiêm kdriêk Krông Pač, čar Dak Lak, Anôk bruă kahan ksiêm kdriêk hlăk mkŏ mjing bruă ksiêm dlăng čiăng bi mklă mta phŭn ngă dlưh mtih anôk dưm ƀrĭk ti alŭ wăl să Êa Yiêng ngă 3 čô hđeh djiê êka. Hđeh djiê anei mâo bi mklă jing ĕ Gia Nhi, 8 mlan; dua čô hđeh êka jing Du Mi 7 thŭn lehanăn Du Hi 5 thŭn, jih tlâo čô hđeh anei dôk ti să Êa Yiêng, kdriêk Krông Pač, čar Dak Lak s’aĭ. Găp djuê phung hđeh mâo klei truh brei thâo, klei anei maoa hlăk 3h30, tlam hruê 18/5, hlăk Mi, Hi lehanăn Nhi nao ti krĭng arăng dưm ƀrĭk hlăp lêñ lehanăn amâo myun ƀrĭk dlưh hlŏng găn phung hđeh anei. Mmông mâo klei truh, lu mnuih dôk mă bruă ti anei. Ƀuh mtih ƀrĭk găm Mi, Hi lehanăn Nhi, mnuih mă bruă pral nao ba phung hđeh anei dŏng mdrao ti Sang êa drao prŏng krĭng lăn dap kngư, ƀiădah kyua êka kjham, ĕ Nhi hlŏng djiê, bi Mi lehanăn Hi ăt dôk dŏng mdrao ti sang êa drao. Kahan ksiêm kdriêk Krông Pač nao leh ti anôk mâo klei truh čiăng ksiêm bi mklă boh klei lehanăn mta phŭn klei truh anei./.

H Nêč pô mblang