VOV4.Êđê - Hruê mbruê 14-2, ti să Ia Rvê, kdriêk Ea Sup, bruă êdam êra čar Dak Lak, bruă êdam êra čar Lâm Đồng leh anăn bruă êdam êra kdriêk Ea Sup mkŏ mjing hdră Mlan 3 knông lăn thŭn 2021 hŏng lu hdră bruă klă sĭt. Hdră mkŏ mjing hŏng lu bruă ngă yuôm bhăn msĕ si: nao dlăng ti gơ̆ng knông lăn 41, myơr brui mngưi ti Knưng bi hdơr kơ phung êngiă asei Kđông kahan răng mgang knông lăn Ea Hleo, mkŏ mjing knăm bi mŭt 40 čô êdam êra mrâo ti gơ̆ng knông lăn.

Ksiêm mkă klei suaih pral, mbha êa drao amâo mă prăk kơ 3 êtuh čô mnuih ƀuôn sang leh anăn mđup brei 8 êtuh hla čhiăm gru ala čar kơ dŭm gŏ sang hdĭp giăm knông lăn. Mphŭn rŭ mdơ̆ng Wăl hlăp lêñ kơ phung hđeh, ba jao hdră kuič mngač êlan krĭng ƀuôn sang, mphŭn ba yua hdră adŭ hriăm kơ sang hră hđeh điêt leh anăn mphŭn rŭ mdơ̆ng sang klei khăp kơ gŏ sang dleh dlan. Ayŏng Y Lê Pas Tơr,  K’iăng Khua dlăng bruă êdam êra čar Dak Lak brei thâo, anei jing bruă ngă kñăm mđĭ ktang dŭm hdră bruă êdam êra ƀri mlan êdam êra, mơ̆ng năn mđĭ lar ai tiê ba anăp, čŏng ngă mơ̆ng phung êdam êra hlăm bruă mđing dlăng, kriê dlăng kơ klei hdĭp mnuih ƀuôn sang, phung êdam êra ti dŭm alŭ wăl dleh dlan.

H’Zawut pô mblang