VOV4.Êđê- Hlăm mlan êdam êra thŭn anei, phung êdam êra čar Dak Lak hluê ngă leh 710 hdră bruă, kdrêč bruă hluê hŏng lu hdră bruă tŭ yuôm. Anei jing mrô dưi hưn mdah ti Knăm ksiêm wĭt Mlan êdam êra thŭn 2021 mâo bruă Đoàn čar Dak Lak mkŏ mjing tlam hruê 15/4. Hdră bruă êdah kdlưn msĕ si mkŏ mjing 346 gưl mtô mblang kơ hdră ngă bruă răng mgang wăl hdĭp mda, gang mkhư̆ klei truh amâo jăk mơ̆ng djah djâo ksu, mdrơ̆ng hŏng klei bi mlih yan adiê, jak ieue êbeh 20.700 čô đoàn viên êdam êra nao hgŭm.

Dŭm gưl bruă Đoàn mkra leh êbeh 25 km êlan krĭng ƀuôn sang, hluê ngă êbeh 20 km hdră bruă guh mngač êlan klông krĭng ƀuôn sang, mkŏ mjing 10 gưl ba myơr êrah, mŏng anăn hrui mâo giăm 3 êbâo mrô êrah doh. Dŭm hdră đru kơ êdam êra mphŭn čô̆ kơ bruă, mđĭ kyar bruă duh mkra dưi mđing pŏk ngă hŏng lu hdră msĕ si: Mkŏ mjing hdră nao tui ksiêm dŭm gru hmô, mkăp klei hâo hưn kơ hdră mphŭn čô̆ kơ bruă, ktrâo lač, đru kčĕ kơ phung êdam êra mkŏ mkra hdră bruă lehanăn dưi mă čan prăk duh kơ bruă mphŭn čô̆ kơ bruă./.

                                                    Pô mblang: H’Nêč Êñuôl