VOV4.Êđê- Msĕ si Sang mđung asăp blŭ Việt Nam hâo hưn, leh 12 thŭn dôk čang guôn, mnuih ƀuôn sang krĭng knơ̆ng kdơ̆ng êa Akŏ Krông Pač mphŭn dưi mbĕ nao truh kơ anôk dôk mrâo. Bruă sang čư̆ êa alŭ wăl dôk tuh êyuh ai tiê ngă bruă čiăng bi h’ĭt klei hdĭp kơ mnuih ƀuôn sang.

Gŏ sang aduôn Ma Thị Sinh, alŭ 9, să Čư̆ San, kdriêk M’Drak jing sa hlăm  dŭm gŏ sang tal êlâo ti krĭng ênao knơ̆ng kdơ̆ng êa akŏ Krông Pač nao ti wăl anôk dôk mrâo mrô 1, să Čư̆ ELang, kdriêk Ea Kar. Leh êbeh 1 hruê kăm, gŏ sang ñu hlăk mâo bruă sang čư̆ êa alŭ wăl đru kơ mnuih hruê ai mă bruă čiăng bi leh sang kmeh hŏng kyâo, mtih hŏng ƀrĭk. Sang dưi rŭ mdơ̆ng ti wăl lăn prŏng, giăm wăl krah să, mâo êlan bê tông, kdrăp êa doh truh ti pưk sang. 3 čô anak ñu dôk hriăm adŭ sa leh anăn hđeh điêt ăt mphŭn nao hriăm hlăm sang hră mrâo, knŏng kbưi hŏng sang ka truh 5 êtuh mét. Klei hdĭp mrâo klă gơ̆ng mâo klei găl ênưih:

“Phung hlăm să mđing dlăng êdi, đru kơ gŏ sang kâo rŭ mdơ̆ng pưk sang, pŭ mnơ̆ng dhơ̆ng. să mđing dlăng snăn jăk leh. Sang kâo mâo 5 sao lŏ, 5 sao hma, klă sĭt mgi dih pô dơ̆ng  ngă bruă yơh.”

Să Čư̆ Êlang dôk kƀĭn đru kơ mnuih ƀuôn sang nao ti anôk dôk mrâo hơĭt klei hdĭp mda

Trần Văn Thanh,  Khua Knơ̆ng bruă sang čư̆ êa să Čư̆ Elang, kdriêk Ea Kar brei thâo, yap truh knhal jih mlan 3, mâo leh êbeh 20 gŏ êsei mnuih ƀuôn sang nao ti anôk dôk mrâo mrô 1 hlăm să. Kyua mâo klei thâo hlăm bruă đru kơ mnuih ƀuôn sang nao kơ anôk dôk mrâo, anăn dŭm êpul ti să bi hgŭm jăk, mbha bruă klă mngač. Să rơ̆ng jih jang dŭm gŏ êsei hriê ti anôk dôk mrâo dưi đru jih hnơ̆ng čiăng hnưm hơ̆it klei hdĭp. Hŏng dŭm gŏ êsei hriê leh ti wăl anôk dôk mrâo, să rơ̆ng grăp gŏ êsei mâo 1 sao lăn dôk, 5 sao lŏ leh anăn 5 sao hma, hluê si hdră mơ̆ng čar kčah mtrŭn. Bruă mkra mjing găl ênưih kơ mnuih ƀuôn sang kyua ênao êa Ea Rơt, sa kdrêč hlăm bruă Knơ̆ng kdơ̆ng êa akŏ Krông Pač ti djiêu wăl anôk anôk mrâo, mkăp êa krih hơ̆it kjăp. Hlăk êjai anăn, sang hră mơ̆ng hđeh điêt truh gưl 2 ti djiêu wăl anôk dôk mrâo. Anei jing dŭm klei găl ênưih čiăng kơ mnuih ƀuôn sanh hơĭt klei hdĭp mda:

         “Să bi mklă anei jing bruă klam kđi čar yuôm bhăn êdi. Msĕ si hdră kčah tal êlâo snăn alŭ wăl ăt dăp leh êpul, mnuih čiăng đru kơ mnuih ƀuôn sang lŏ hriê rơ̆ng klei hdĭp, kơ klei êđăp ênang, leh anăn bruă duh mkra pla mjing.”

 Wăl anôk dôk mrâo dap leh anăn ngă djŏ klei čiăng êdi hlăm klei hdĭp mnuih ƀuôn sang

      Hluê si hdră kčah, êbeh 700 gŏ êsei hŏng giăm 4000 čô mnuih ti 3 alŭ 9, 10 leh anăn 11, să Čư̆ San, kdriêk M’Drak srăng dưi mbĕ đuê̆ kơ anôk dôk mrâo ti să Čư̆   ÊLang leh anăn wăl anôk dôk mrâo mrô 2 ti să Čư̆ Bông, kdriêk Ea Kar čiăng pioh kơ bruă knơ̆ng kdơ̆ng êa 4.400 êklai prăk Akŏ Krông Pač. Tal êlâo, ka đei mâo klei tŭ ư mơ̆ng mnuih ƀuôn sang, anăn knŏng mâo 44 gŏ êsei mnuih ƀuôn sang čih anăn mbĕ đuê̆. Truh ară anei, hŏng klei mđĭ ai mơ̆ng dŭm gưl bruă sang čư̆ êa leh anăn hŏng boh sĭt dŭm gŏ êsei mnuih ƀuôn sang dưi mbĕ đuê̆ rơ̆ng klei hdĭ jăk hĭn ti anôk dôk hđăp, ênoh gŏ êsei mnuih ƀuôn sang čih anăn đĭ leh giăm 2 êtuh gŏ êsei. Nguyễn Đức Thảo,  K’iăng khua knơ̆ng bruă sang čư̆ êa kdriêk Mdrak brei thâo, kdriêk hlăk lŏ dơ̆ng iêu jak mnuih nao đru kơ mnuih ƀuôn sang mbĕ đuê̆, mđĭ ai čiăng mjing klei sa ai, hŏng klei gĭr hnưm bi leh bruă klam anôk dôk mrâo krĭng ênao Knơ̆ng kdơ̆ng êa Akŏ Krông Pač.

          “Hlăm wưng kơ anăp kdriêk srăng lŏ dơ̆ng mđĭ pral hnơ̆ng ngă bruă tla hnô, ruh mgaih anôk ala, iêu  jak mnuih ƀuôn sang nao ti anôk dôk mrâo. Mơ̆ng bruă mbĕ đuê̆ snăn jih jang gŏ êsei bi tŭ ư čiăng nao kơ anôk dôk mrâo mơ̆ng čar, kdriêk dăp leh”./.

Pô mblang: H’Zawut Ƀuôn Yă