VOV4.Êđê- Leh wưng bluh mâo truh 5.300 anôk mkra bruă pui kmlă êran hŏng pil yang hruê dưm ti čuôr sang, dŭm mlan giăm anei, lu bruă anei ti čar Dak Lak brei bi hrŏ ba yua pui kmlă hlăm yang hruê grăp hruê. Bruă mdei ba yua pui kmlă hlăm wưng mđiă ktang hĭn srăng hmaĭ kơ klei tŭ duh bi liê mơ̆ng bruă anei, hluê si klei hlăk mblang mơ̆ng bruă pui kmlă, klei anei kñăm rơ̆ng klei êđăp ênang kơ bruă anei, đăm yua lu đei êgao hnơ̆ng ôh.

Ti krah adiê mđiă ktang hlăm yan bhang ti lăn Dap kngư, kdrăp pui kmlă hŏng pil yang hruê ti dlông čuôr sang mơ̆ng knơ̆ng bruă Quang Luận ti să Pơ̆ng Drang, kdriêk Krông Ƀuk, čar Dak Lak ba lu leh boh tŭ dưn jăk siam, đru kơ bruă srăng gang mđiă ktang, lehanăn mkra mjing pui kmlă mprăp kơ bruă čhĭ mnia mnơ̆ng dhơ̆ng mkra mjing pưk sang, hbâo kơ ana kyâo mtâo, leh năn mâo prăk mnga hlăm klei čhĭ pui kmlă kơ knŭk kna. Khua anôk bruă Nguyễn Thùy Trang brei thâo, anei jing bruă duh bi liê mâo boh tŭ dưn, khădah giăm anei mâo klei hrŏ bruă bi êran pui kmlă grăp hruê.

Mâo leh 5 thŭn êgao hmei dưm kdrăp pui kmlă hŏng pil yang hruê anei êran hŏng hnơ̆ng 500 Kwp, mâo prăk mnga ba wĭt hlăm grăp mlan hlăm ƀrô 100-120 êklăk prăk. Tơdah amâo mâo klei jhat, anei srăng jing bruă duh bi liê mâo boh tŭ dưn. Hlăm kŏ thŭn anei, Knơ̆ng bruă pui kmlă mâo hdră mtrŭn srăng bi khăt hrŏ bruă mkra mjing pui kmlă, mâo hruê bi khăt hrŏ truh 15% hnơ̆ng mkra pui kmlă, ăt hmei tui hlue ngă djŏ msĕ sơnăn. Msĕ si tơdah 9 mmông khăt pui srăng mâo mnuih mă bruă srăng nao khăt, truh 2 mmông tlam diñu srăng hriê ti nei čiăng đru kơ knơ̆ng bruă hrŏ kơ klei liê.”

Kdrăp pui kmlă êran hŏng pil yang hruê mơ̆ng Knơ̆ng bruă Quang Luận- kdriêk Krông Ƀuk, čar Dak Lak

Mâo klei khăt mhrŏ hnơ̆ng mkra mjing pui kmlă ti yang hruê dơ̆ng hlăm 2 mlan leh êgao, Vũ Khắc Lợi, pô bi ala kơ sa knơ̆ng bruă mkra mjing mnơ̆ng dhơ̆ng mơ̆ng boh kroh bruă lŏ hma pioh čhĭ kơ ala tač ti anôk bruă duh mkra wăl krah Buôn Hồ, čar Dak Lak brei thâo: čiăng ba yua kdrăp mkra mjing pui kmlă hŏng pil yang hruê ti dlông čuôr sang hŏng hnơ̆ng giăm 1 MWp, knơ̆ng bruă srăng ngă dŭm hdră êlan čiăng mkiêt pui kmlă, klei êđăp ênang djŏ tui si klei mtô mơ̆ng knơ̆ng bruă pui kmlă knŭk kna, lehanăn ăt bi lar bruă mkra mjing hlăm knơ̆ng bruă:

“Mâo lu hruê mmông bi hrŏ klei yua pui kmlă truh 7%, 11% amâo dah 15 % ăt hmei srăng ngă djŏ tui si klei mtrŭn leh, kơ bruă yua pui kmlă hlăm knơ̆ng bruă, phung hmei srăng mdjiê hĕ jih dŭm boh maĭ amâo năng yua, amâo dah bi hrŏ hnơ̆ng mă bruă kơ dŭm kdrăp bi êăt čiăng bi hrŏ klei yua pui kmlă, lehanăn knŏng čiăng ênŭm kơ klei bi êăt mnơ̆ng dhơ̆ng. Ară anei knơ̆ng bruă dôk rŭ mdơ̆ng thiăm sa anôk mă bruă čiăng bi mđĭ hnơ̆ng mkra mjing mnơ̆ng dhơ̆ng đĭ 2 blư̆ hŏng anôk mă bruă êlâo”

Anôk bruă mnia blei mđĭ hnơ̆ng mkra mjing boh kroh čiăng ba yua jih hnơ̆ng pui kmlă êran hŏng pil yang hruê dưm ti čuôr sang

Tui hlue Hà Văn Chương, k’iăng khua knơ̆ng bruă pui kmlă čar Dak Lak, ti kluôm čar Dak Lak mâo 5.339 anôk mâo kdrăp mkra mjing pui kmlă hŏng pil yang hruê ti dlông čuôr sang, hŏng hnơ̆ng pui kmlă jih jang 650.000 KWp. Truh kơ mmông anei, mâo êbeh 400 anôk mâo hdră khăt mhrŏ klei mkra mjing pui kmlă, kyua hnơ̆ng yua ƀiă lehanăn hnơ̆ng mkra mjing lu. Anei jing dŭm anôk mâo kdrăp bi êran pui kmlă hŏng hnơ̆ng pui kmlă kơ dlông 100KWp, mâo anôk mđĭ mtrŭn piu mklă hjăn, êlâo kơ ba mduê hŏng pui kmlă ala čar, dŭm anôk bi êran pui kmlă mâo hnơ̆ng mkra điêt lehanăn mduê kơ pui kmlă ba yua grăp hruê mâo mâo klei khăt hrŏ ôh. Mblang kơ bruă mkra jing pui mklă hŏng kdrăp pil yang hruê (khăt mhrŏ êjai yang hruê dơ̆ng- mmông mđiă ktang hĭn hlăm hruê, Hà Văn Lương lač klă:

Mâo hnơ̆ng mđiă mơ̆ng yang hruê hlăm ƀrô 20-25%, kdrăp pui mlă hŏng pil yang hruê srăng êran hŏng klei êđăp ênang, tơdah ktang hĭn kơnăn kdrăp pui mlă hŏng pil yang hruê srăng êran hŏng klei dleh dlan, kyua hnơ̆ng điă mlih nanao tui hlue yan adiê, hruê - mlam mmăt lehanăn dŭm hruê mâo lu knam. Kyuanăn bruă khăt mhrŏ pui kmlă jing bruă yuôm čiăng mâo klei jăk êjai kdrăp pui kmlă hŏng pil yang hruê dôk êran.”

Ăt tui hlue klei mblang mơ̆ng Hà Văn Chuơng, hŏng dŭm kdrăp pui mlă hŏng pil yang hruê mkŏ dưm ti dlông čuôr sang hlăm dŭm sang maĭ, anôk rông mnơ̆ng dhơ̆ng, khădah mâo klei khăt mhrŏ hnơ̆ng bi êran pui kmlă ƀiădah ăt mâo boh tŭ dưn jăk, kyua diñu thâo ba yua dŭm mta hnơ̆ng pui kmlă mâo leh. Bruă khăt hrŏ amâo mâo hmaĭ lu ôh kyua “Khăt” hnơ̆ng pui kmlă đĭ êjai yang hruê dơ̆ng. Hlăm dŭm anôk mâo kdrăp pui mlă hŏng pil yang hruê amâo mâo kdrăp pioh ba yua pui kmlă, srăng mâo klei hrŏ sa kdrêč kyua amâo mâo klei čhĭ pui kmlă. Kyuanăn pô duh bi liê srăng mâo klei tĭng mkă bruă yua pui kmlă bi djŏ kơ kdrăp pui mlă hŏng pil yang hruê mơ̆ng pô.

Pô mblang: Y-Khem Niê