VOV4.Êđê - Hlăm dŭm klei bi tuôm plah wah phung bi ala kơ mnuih ƀuôn sang hŏng phung mgơ̆ng asei phung bi ala HĐND dŭm gưl ti Dak Lak mrâo anei, lu phung mgơ̆ng asei hưn mdah hdră ngă bruă hŏng jih ai tiê. Boh nik, phung mgơ̆ng asei jing phung mniê mnuih djuê ƀiă khă gơ̆ tal êlâo mgơ̆ng asei phung bi ala ƀiădah mkŏ mjing leh hdră ngă bruă klă klơ̆ng, boh sĭt, mâo phung bi ala nao ai.

Mjưh ruê̆ hdră bi tuôm hŏng mnuih ƀuôn sang mtrŭt mjhar hdră ruah khua, amai Vi Thị Kiều Chi, mnuih djuê ana Tày, mgơ̆ng ruah ngă pô bi ala HĐND čar Dak Lak wưng thŭn 2021 – 2026 tŭ mă leh lu klei blŭ đru mguôp mơ̆ng mnuih ƀuôn sang čiăng bi leh mta phŭn hlăm hdră ngă bruă mơ̆ng pô. Jing pô mgơ̆ng ruah nao hlăm hdră ruah khua ti êpul êya ruah khua mrô sa, ƀuôn prŏng Ƀuôn Ama Thuôt, amai Vi Thị Kiều Chi lač, kâo čih mkra leh hdră ngă bruă mguôp hŏng bruă răng mgang klei dưi lehanăn klei tŭ mơ̆ng phung đoàn viên, êdam êra lehanăn phung hđeh êlăk. Hlăm anăn mđing kơ bruă kriê dlăng phung hđeh êlăk, êdam êra ngiêk ti krĭng taih kbưi, krĭng dleh dlan lehanăn krĭng mnuih djuê ƀiă. Hluê si amai Vi Thị Kiều Chi, gưl tal êlâo nao mgơ̆ng ruah ƀiădah amai đăo knang hlăm hdră ngă bruă mơ̆ng pô mâo čih mkra leh mbĭt anăn dưi hlak mblang ti anăp mnuih ƀuôn sang, klă sĭt hŏng alŭ wăl: Hlăm hdră ngă bruă mơ̆ng pô snăn kâo pô ăt jing pô bi ala kơ êpul bruă Đoàn čih mkra leh hdră ngă bruă siă suôr hŏng bruă hluê ngă dŭm klei dưi, bruă klam lehanăn răng mgang klei tŭ dưi djŏ hdră bhiăn kơ phung đoàn viên, êdam êra ngiêk, hđeh êlăk. Êngao anăn, kâo ăt jing sa cô mniê lehanăn thâo săng klă bruă klam mơ̆ng phung mniê kyua anăn kâo kƀĭn kơ dŭm bruă djŏ tuôm kơ bruă răng mgang lehanăn kriê dlăng phung mniê lehanăn phung hdeh ti alŭ wăl hlăm wưng ti anăp.

Bi hŏng amai H’Jai HMŏk, mnuih djuê ana Êđê, gưl tal êlâo nao mgơ̆ng ruah ngă pô bi ala HĐND să Dray Bhăng, kdriêk Čư̆ Kuiñ, amai čih mkra leh hdră ngă bruă kƀĭn kơ hdră mtrŭt mjhar, iêu mƀĭn phung amai adei mniê mnuih djuê ƀiă hluê đăo. Amai H’Jai brei thâo, ti alŭ wăl să, 92% ênoh amai adei jing mnuih djuê ƀiă lehanăn hluê đăo. Êpul hgŭm bruă mniê să pŏk ngă leh lu mta bruă đru kơ phung amai adei mđĭ kyar bruă duh mkra, đru mđĭ hnư hrui wĭt, kyua anăn mâo jak iêu leh lu phung amai adei nao mŭt hgŭm hlăm êpul bruă, đru hlăm hdră mđĭ kyar bruă duh mkra yang ƀuôn, bi hrŏ ênoh gŏ êsei ƀun kluôm hlăm yang ƀuôn dôk êbeh 5%. Tơdah djŏ ruah ngă pô bi ala HĐND să wưng păn bruă ti anăp, hŏng mta kñăm mđĭ hnơ̆ng thâo lehanăn mđĭ dŭm mta bruă bi lông ktưn ti alŭ wăl mâo êpul phŭn jing phung amai adei mniê, amai H’Jai srăng čih mkra dŭm hdră ngă bruă djŏ guôp čiăng jak iêu phung mniê nao hgŭm hlăm bruă, đru kơ phung mniê mđĭ kyar bruă duh mkra lehanăn mkŏ mkra gŏ sang yâo m’ak, mtăp mđơr. Lu mnuih ƀuôn sang ti alŭ wăl hdĭp hjăn păn amâo čiăng nao hgŭm hlăm yang ƀuôn, kyua anăn hlăm dŭm hdră ngă bruă ti anăp kâo srăng ngă jăk hdră mtrŭt mjhar. Gưl tal êlâo srăng ba mdah hdră êlan, mta phŭn ngă bruă jak iêu diñu nao hgŭm mbĭt, čiăng kơ diñu ƀuh klă hdră ngă bruă anăn mơ̆ng anăn hluê ngă bi sĭt snăn jih diñu srăng ƀuh yang ƀuôn lehanăn mnuih hluê đăo srăng mâo klei bi hgŭm lehanăn srăng ƀuh klă hdră ngă bruă mơ̆ng pô.

Mgơ̆ng ruah ti alŭ wăl mâo lu djuê ana hdĭp mda, kƀĭn lu jing mnuih djuê ƀiă mơ̆ng krĭng kwar Dưr hriê mŭt dôk, amai Hoàng Thị Hụê, mnuih djuê ana Nùng, mgơ̆ng ruah ngă pô bi ala HĐND să Êa Tam, kdriêk Krông H’Nang, čar Dak Lak mđing dlăng êdi kơ bruă kriê pioh knhuah dhar kreh djuê ana mguôp hŏng hdră mđĭ kyar bruă duh mkra ti alŭ wăl. Hlăm hdră ngă bruă mơ̆ng pô, mbĭt hŏng klei đua klam mơ̆ng gưl bruă Đảng, bruă sang čư̆ êa alŭ wăl mtrŭt mjhar mnuih ƀuôn sang, êpul hgŭm mkŏ mkra krĭng ƀuôn sang mrâo, hŏng k’hưm jing Khua êpul bruă mniê să, Amâi Hoàng Thị Huệ kƀĭn ba bruă bi mtăp mđơr êkai mniê, mkŏ mjing gru hmô 5 h’aĭ, 3 doh, đru kơ phung mniê bi mlih mnơ̆ng pla, mnơ̆ng rông lehanăn kriê pioh knhuah dhar kreh djuê ana kwar Dưr hlăm hdră mtrŭt mjhar klei ruah khua. Amai Hoàng Thị Huệ bi mklă: Tơdah mnuih ƀuôn sang đăo knang ruah hmei mŭt hlăm HĐND să, hlăm wưng ti anăp kâo srăng gĭt mđĭ lar dŭm dŭm klei thâo, bruă dưi ngă hlăm wưng êgao mbĭt anăn lŏ dơ̆ng hluê ngă kjăp Hdră mtrŭn mơ̆ng gưl dlông ăt msĕ mơh hdră ngă bruă mơ̆ng gưl dlông čiăng pŏk ngă truh kơ mnuih ƀuôn sang.

Wưng thŭn 2021 - 2026, čar Dak Lak srăng ruah 75 čô bi ala HĐND dŭm gưl, 514 čô bi ala HĐND gưl kdriêk lehanăn 4.667 bi ala HĐND gưl să. Hlăm anăn, kñăm rơ̆ng kjăp Hdră mtrŭn mrô 1187 mơ̆ng Dhar bruă gĭt gai Quốc hội, jing brei mâo ƀiă êdi 35% phung mgơ̆ng ruah jing mniê, gĭr bi mâo hlăm brô 30% phung mniê djŏ ruah. Truh ară anei, jih jang êpul êya ruah khua ngă leh hdră bi tuôm hŏng mnuih ƀuôn sang, mtrŭt mjhar hdră ruah khua djŏ si klei kčah mtrŭn. Anăn lehanăn klei kčah čŭn phung mgơ̆ng ruah dưi mƀlir ti krĭng ruah khua čiăng kơ mnuih ƀuôn sang dưi ksiêm dlăng klă nik hĭn.

Hŏng dŭm hdră ngă bruă klă sĭt mâo phung mgơ̆ng ruah ba mdah ti anôk bi tuôm hŏng mnuih ƀuôn sang hluê hdră mtrŭt mjhar klei ruah khua mrâo êgao, srăng đru kơ mnuih ƀuôn sang thâo săng klă hĭn kơ hdră kčah ngă bruă mơ̆ng phung mgơ̆ng ruah tơdah djŏ ruah ngă pô bi ala HĐND wưng păn bruă ti anăp, mơ̆ng anăn srăng mjing tur knơ̆ng ruah phung bi ala klă sĭt mâo klei thâo, knhuah hdĭp jăk hlăm hdră ruah khua mkŏ mjing hlăm hruê 23/5 kơ anăp./.