VOV4.Êđê - Hruê 19/5, êpul bruă Đội čar Dak Lak hrăm mbĭt hŏng anôk bruă dhar kreh phung hđeh êlăk čar mkŏ mjing knăm ba yua war mnga hđeh êlăk Dak Lak hŏng êa ksĭ plao êa ksĭ ala čar.

Bruă mkŏ mkra anei dưi dưm ti sang bruă dhar kreh hđeh êlăk čar Dak Lak. Mâo lu rup bi hmô gơ̆ng bi knăl ti plao êa ksĭ Trường Sa. Hlăm grăp gơ̆ng anăn mâo klei mblang anăn gơ̆ng, vĩ độ, kinh độ.

Leh sa mlan mkŏ mkra hŏng prăk duh bi liê mơ̆ng hdră êlan bruă ngă điêt, dưi bi leh klei mkŏ mkra anei hŏng ênoh prăk 170 êklăk prăk. war mnga anei ngă mâo klei siam kơ anôk bruă dhar kreh phung hđeh êlăk čar, lehanăn jing klei bi hmô kơ bruă mtô mjuăt kơ phung hđeh êlăk, đru kơ phung hđeh thâo săng kơ boh klei hlăm êa ksĭ, plao ksĭ lehanăn klei dưi kiă kriê ala čar, mđĭ klei thâo khăp kơ ala čar, bruă klam mơ̆ng ênuk hđeh hlăm bruă mkŏ mra lehanăn răng mgang ala čar.