VOV4.Êđê -  Tui hluê Mai Đình Phong, k’iăng khua adŭ bruă ksiêm dlăng - knơ̆ng bruă pui kmlă Dak Lak, hlăm dŭm hruê mdei kơ hruê knăm, kdrăp ksiêm dlăng thâo mĭn dưi hmao ƀuh hnơ̆ng yua pui kmlă ti sa knơ̆ng bruă hlăm anôk bruă tuh tia Hoà Phú, ƀuôn prŏng Ƀuôn Ama Thuôt đĭ êgao hnơ̆ng, knơ̆ng bruă pui mklă Dak Lak nao ksiêm dlăng lehanăn hmao ƀuh sa kdrăp ba yua prăk điện tử, yua pui kmlă soh hŏng klei bhiăn. Knơ̆ng bruă anei mâo leh klei hrui mă lehanăn đŭ prăk hŏng ênoh êbeh 70 êklăk prăk. Mbĭt hŏng bruă mâo klei luar hlăm klei yua pui kmlă, mrâo anei, sa knơ̆ng bruă kdlưn hĭn hlăm čar Dak Lak ăt mâo klei đŭ prăk hŏng ênoh truh kơ 285 êklăk prăk. Tĭng mơ̆ng kčưm thŭn truh kơ ară anei. Hlăm kluôm čar Dak Lak dưi hmao ƀuh 882 klei ngă soh hlăm bruă yua pui kmlă, hŏng ênoh prăk đŭ giăm 950 êklăk prăk. Mai Đình Phong brei thâo, dŭm klei ngă soh jing yua pui kmlă amâo djŏ hŏng hdră čiăng, amâo djŏ hnơ̆ng, tlĕ pui kmlă… srăng ba klei arưp kơ mnuih yua lehanăn klei êđăp ênang kơ kdrăp pui kmlă:

Băng: “Bi kơ bruă mnuih yua pui kmlă mâo klei čŏng mlih klei čiăng hlăm bruă yua pui kmlă, mlih hnơ̆ng yua pui kmlă, srăng mâo klei arưp luič klei êđăp ênang, klă klơ̆ng hlăm lŭ wăl mâo leh lu klei truh ngă djiê mnuih. Hlăm anăn ăt mâo klei mtă kơ phung ƀuôn sang yua pui kmlă hlăm klei yua anăn čiăng tui ngă msĕ hŏng klei mtă leh, tơdah mâo klei čiăng lŏ yua hnơ̆ng lu hĭn, srăng lŏ hưm mthâo hŏng knơ̆ng bruă pui kmlă, 2 tĭng srăng mâo klei bi trông lehanăn bi tŭ ư, čiăng rơ̆ng kơ klei êđăp ênang lehanăn mâo boh tŭ dưn djŏ hŏng klei bhiăn ala čar.”

H Zawut pô mblang