VOV4.Êđê- Dak Lak dôk mŭt hlăm wưng mđiă hlơr, thu krô êdi hlăm yan bhang thŭn 2020 – 2021. Kyua anăn, anôk bruă pui kmlă pral pŏk ngă lu hdră msir rŏng mkăp djăp pui kmlă, nanao đrông, êđăp ênang, h’ĭt kjăp mkăp kơ hdră ba yua aguah tlam, ngă bruă duh mkra pla mjing kơ mnuih ƀuôn sang lehanăn anôk bruă duh mkra. Čiăng rŏng mkăp djăp pui kmlă hlăm yan bhang, Anôk bruă mđĭ leh hdră mkrŏ mkra mrâo, mlih kdrăp yua pui kmlă, msir mghaih dŭm anôk êlan klei pui amâo jăk; tĭng dlăng, ksiêm yap klă klơ̆ng dŭm kdrăp yua mkăp pui kmlă, boh nik ti dŭm krĭng yua pui čiăng krih êa kơ mnơ̆ng pla mŏng anăn mâo hdră mkăp pui kmlă djŏ guôp hŏng klei čiăng lehanăn klei dôk mâo sĭt, ksiêm dlăng nanao kdrăp pui kmlă, anôk mđĭ trŭn pui kmlă. Hŏng dŭm êpul êya hlăm anôk bruă, srăng mđĭ hdră ksiêm dlăng klei mkăp pui kmlă ti alŭ wăl čiăng mâo hdră mkăp pui djŏ guôp lehanăn mprăp dŭm maĭ mđĭ trŭn pui kmlă kñăm rŏng mkăp pui êđăp ênang, nanao đrông kơ phung ba yua pui kluôm krĭng wăl./.

Pô mblang: H’Nêč Êñuôl