VOV4.Êđê -  Hlăm dŭm hruê leh êgao, ti alŭ wăl čar Dak Lak mâo lu klei mngăt êa ngă kơ 5 čô hđeh sang hră djiê. Klei mngăt êa mrâo hĭn ti tlam hruê 17/5, ti ênao êa hlăm alŭ Ea Lang, să čư̆ Pui, kdriêk Krông Bông ngă kơ sa čô hđeh djiê. Hđeh djiê anei jing Lương Thị Như Ngọc, 9 thŭn dôk ti alŭ Ea Lang, să čư̆ Pui, kdriêk Krông Bông, čar Dak Lak, hđeh anei dôk hriăm adŭ 3 ti sang hră gưl sa čư̆ Pui II, să čư̆ puikdriêk Krông Bông, čar Dak Lak. Klei mgăt êa anei hlăm ƀrô 3 mmông tlam hruê 17/5, êjai hđeh anei lehanăn phung găp nao hlăp lêñ ti ênao êa. Êjai hlăp lêñ têč hnêč lĕ hlăm ênao êa lehanăn truh kơ mngăt êa. Êlâo kơ năn, hruê 13/5, dŭm čô hđeh jing H’Hằng Kmăn lehanăn H’Nan Mlô, kkiêng thŭn 2008, jing hđeh sang hră adŭ 7A ti sang hră gưl 2 Trần Quốc Toản să Ea R’bin, jih dua čô dôk ti să Ea R’bin, nao mnei ti êa Krông Knô lehanăn truh kơ klei mngăt êa. Bi kơ hruê 16/5, ti ênao êa Đrao, să Čư̆ Dliê Mnông. Kdriêk Čư̆ Mgar ăt mâo sa klei mngăt êa truh klei djiê kơ 2 čô hđeh jing amai adei hlăm sa gŏ sang jing adei Phan Thị Thanh L. 13 thŭn lehanăn Phan Thanh N. 11 thŭn, dôk ti alŭ 1, să Cư Dliê Mnông. Mâo lu klei mngă êa djiê hđeh jing klei hưn mdah kơ phung amĭ ama, gŏ sang lehanăn yang ƀuôn hlăm bruă kriê dlăng phung hđeh êlăk hlăm wưng yan mdei prŏng dơ̆ng truh.