VOV4.Êđê - Aguah mbruê 19-3, hlăm klei bi kƀĭn thŏng kơ bruă, HĐND čar Dak Lak gưl IX, wưng thŭn 2016-2021 ngă leh hdră lui bruă, ruah mbŏ K’iăng Khua HĐND čar, Khua hlăm Knơ̆ng bruă sang čư̆ êa čar Dak Lak gưl IX, wưng thŭn 2016-2021.

Hluê anăn, HĐND čar Dak Lak bi mklă klei brei mdei jing Khua hlăm Knơ̆ng bruă sang čư̆ êa čar gưl IX, wưng 2016-2021 hŏng Thiếu tướng Lê Văn Tuyến -  Khua kahan ksiêm hđăp čar kyua nao ngă bruă mkăn. Mbĭt anăn, ruah mbŏ Khua hlăm Knơ̆ng bruă sang čư̆ êa čar Dak Lak gưl IX, wưng thŭn 2016-2021 hŏng Đại tá Lê Vinh Quy, Khua Kahan ksiêm čar Dak Lak. Ăt hlăm klei bi kƀĭn anei, phung bi ala bi tŭ ư ruah Y Vinh Tơr - Khua mkăp hlăm bruă Đảng gưl dlông, Khua hlăm Anôk dlăng bruă Đảng čar, Khua bruă Đảng Ƀuôn Hồ ngă K’iăng Khua HĐND čar Dak lak gưl IX, wưng 2016-2021, hŏng 100% hră mplĕ tŭ ư.

H’Zawut pô mblang