VOV4.Êđê - Čiăng dưi mâo mta kñăm 30% pô mgơ̆ng asei mniê srăng jing pô bi ala HĐND dŭm gưl, Êpul bruă mniê čar Dak Lak mkŏ mjing leh Klei bi kƀĭn mjuăt bi hriăm mđĭ klei thâo kơ phung mniê gưl tal êlâo mgơ̆ng ruah ngă pô bi ala HĐND dŭm gưl wưng thŭn 2021-2026. Phung bi ala nao ti anôk bi kƀĭn dưi mjuăt bi hriăm dŭm klei thâo kơ bruă klam, klei dưi mơ̆ng HĐND lehanăn pô bi ala HDND, dŭm bruă duh mkra – ala ƀuôn, dhar kreh mơ̆ng čar wưng thŭn 2016-2021, tă hdră êlan kơ wưng thŭn 2021-2026.

Ktrâo lač kơ hdră mtrŭt mjhar klei ruah khua, hdră hưn mdah klei ngă bruă mơ̆ng pô bi ala HĐND. Hluê si Êpul hgŭm bruă mniê čar Dak Lak, čiăng mprăp kơ hdră ruah pô bi ala Quốc hội gưl XV lehanăn bi ala HĐND dŭm gưl čar Dak Lak wưng thŭn 2021-2026, čar srăng mkŏ mjing 4 adŭ mjuăt bi hriăm ti kdriêk Krông Ana, Ea Hleo lehanăn ƀuôn prŏng Ƀuôn Ama Thuôt, kơ êbeh 300 čô mniê gưl tal êlâo nao mgơ̆ng asei ruah pô bi ala HĐND dŭm gưl./.

H Nêč pô mblang