VOV4.Êđê - Hruê mbruê, dhar bruă Mặt trận čar Dak Lak mkŏ mjing leh Klei bi kƀĭn tal 2 čiăng bi tŭ ư kơ anăn phung mgơ̆ng ruah ngă pô bi ala Quốc hôị gưl 15 lehanăn phung mgơ̆ng ruah ngă pô bi ala Hội đồng Nhân dân čar gưl 10, wưng thŭn 2021 – 2026. Ti anôk bi kƀĭn, hŏng ai tiê bi tŭ ư s’aĭ, phung bi ala tŭ ư s’aĭ hŏng anăn 12 čô ti alŭ wăl mgơ̆ng ruah ngă pô bi ala Quốc hội gưl 15 lehanăn 138 čô  mgơ̆ng ruah ngă pô bi ala hội đồng nhân dân čar Dak Lak hlăm wưng păn bruă ti anăp.

Mơ̆ng boh tŭ klei bi kƀĭn tal anei srăng ba m’ĭt kơ anôk bruă mặt trận čar mă klei blŭ lehanăn klei đăo knang mơ̆ng mnuih ƀuôn sang ti krĭng anôk dôk, mơ̆ng hruê 21/3 truh kơ hruê 13/4 hŏng dŭm êpul êya, anôk bruă pô mgơ̆ng ruah ngă pô bi ala Quốc hội gưl 15 lehanăn pô bi ala HĐND čar, wưng thŭn 2021- 2026 hluê si klei kčah mtrŭn. Wưng thŭn 2021-2026, Dak Lak srăng mâo 9 čô bi ala Quốc hội. Hlăm anăn, 5 čô bi ala mơ̆ng alŭ wăl, 4 čô bi ala mâo gưl dlông ba mgơ̆ng. Ênoh phung bi ala HĐND mâo 75 čô./.

H’Nêč pô mblang