VOV4.Êđê- Tlam hruê 4/5, dhar bruă mặt trận čar Dak Lak mkŏ mjing leh klei bi kƀĭn čiăng bi trông kơ hdră êlan bi mtuôm hŏng phung mplĕ hră ruah pô bi ala Quốc Hội gưl 15, pô bi ala HĐND čar gưl 10, wưng thŭn 2021-2026, tui ngă bruă mtrŭt mjhar bruă ruah khua. Tui hluê boh tŭ dưn klei bi êdah hră anăn phung mgơ̆ng asei ngă pô bi ala Quốc Hội gưl 15 lehanăn HĐND čar Dak Lak gưl 10 wưng thŭn 2021-2026, čar Dak Lak mâo 15 čô mgơ̆ng asei ngă pô bi ala Quốc Hội gưl 15 (hlăm anăn mâo 4 čô dưi bi êdah mơ̆ng gưl dlông) mâo klei bi mbha lehanăn nao mtrŭt mjhar bruă ruah khua hlăm 3 anôk ruah khua. 125 čô mgơ̆ng asei ngă pô bi ala HĐND čar gưl 10, wưng thŭn 2021-2026 dưi bi mbha lehanăn nao mtrŭt mjhar bruă ruah khua hlăm 20 anôk ruah khua. Dŭm klei kƀĭn trông bi tuôm hŏng phung mplĕ hră ruah khua hŏng dŭm čô mgơ̆ng asei ngă pô bi ala Quốc Hội gưl 15 lehanăn HĐND dŭm gưl ti čar Dak Lak wưng thŭn 2021-2026 dưi mkŏ mjing mơ̆ng hruê 5/5 truh kơ hruê 12/5/2021. Bruă mkŏ mjing dŭm klei bi tuôm hŏng phung mplĕ hră lehanăn mtrŭt mjhar bruă ruah khua čiăng djŏ hŏng hdră êlan mdrơ̆ng lehanăn gang mkhư̆ klei ruă tưp Covid-19.

Pô mblang: Y-Khem Niê