VOV4.Êđê- Hruê mgi, 23/5, jih jang mnuih kluôm ala nao hlăm bruă kđi čar yuôm bhăn- ruah khua phung bi ala Quốc hội gưl XV leh anăn phung bi ala HĐND dŭm gưl, wưng thŭn 2021-2026.  Mbĭt hŏng kluôm ala, bruă kđi čar čar Dak Lak hlăk gĭr ktưn hluê ngă dŭm bruă knhal tuič, čiăng kơ klei ruah khua mkŏ mjing jăk êđăp ênang, rơ̆ng djŏ hdră bhiăn, êngiê leh anăn klă sĭt jing knăm mơak jih jang yang ƀuôn.

Jing sa hlăm dŭm alŭ wăl phŭn mơ̆ng ƀuôn prŏng Ƀuôn Ama Thuôt, ƀuôn hgŭm Thành Công mâo 13 anôk mplĕ hră hŏng êbeh 5 êbâo čô mnuih ƀuôn sang. Dŭm anôk bruă nah gŭ, mnơ̆ng dhơ̆ng mprăp, anăn mnuih ƀuôn sang lehanăn anăn phung mgơ̆ng ruah dưi mƀlir leh, mâo dŭm êpul mkŏ mjing klei ruah khua dăp klă, kreh knhâo, mprăp ênŭm ênŭm kơ Hruê m’ak mơ̆ng jih jang mnuih ƀuôn sang. Kñăm rơ̆ng kjăp klei êđăp ênang, Anôk gĭt gai hdră ruah khua ƀuôn hgŭm Thành Công ăt kah mbha êpul bruă, mnuih mđĭ hdră hiu suang dlăng čiăng pral hmao ƀuh, msir mghaih dŭm boh klei amâo jăk huĭ dah mâo. Phan Hữu Trí, Khua bruă Đảng, Khua anôk bruă Hội đồng nhân dân, Khua anôk gĭt gai klei ruah khua ƀuôn hgŭm Thành Công, ƀuôn prŏng Ƀuôn Ama Thuôt, čar Dak Lak brei thâo:

“Hmei gĭt gai Anôk bruă ruah khua brei ksiêm dlăng nanao bruă klam djŏ tuôm kơ klei ruah khua. Tal 2, rơ̆ng kjăp klei klă nik, djŏ hdră bhiăn anăn mnuih ƀuôn sang. Mbĭt anăn brei răng mgang kjăp anăn phung mgơ̆ng ruah, leh mâo anăn phung mgơ̆ng ruah brei êpul djŏ tuôm nao mƀlir mbĭt anăn hmei kah mbha nanao êpul mnuih mă bruă hlăm grăp mlam mâo wăt êpul kahan ksiêm, êpul kahan alŭ, ƀuôn, êpul hiu suang dlăng ti alŭ wăl, hmei jao bruă klam brei nao ksiêm dlăng ti dŭm krĭng mplĕ hră. Truh ară anei, anăn phung mgơ̆ng ruah mâo răng mgang kjăp.

Mnuih ƀuôn sang Dak Lak mđing dlăng kơ anăn phung mgơ̆ng asei phung bi ala  HĐND dŭm gưl, wưng thŭn 2021-2026

Ti gưl ƀuôn prŏng, Anôk gĭt gai klei ruah khua, Dhar bruă ruah khua lehanăn Dhar bruă mặt trận buôn prŏng Ƀuôn Ama Thuôt, mkŏ mjing leh dŭm êpul, hluê ngă hdră ksiêm dlăng, ktuê dlăng bruă ruah khua ti dŭm să, ƀuôn hgŭm, rŏng kjăp dŭm mta phŭn, hdră ngă bruă hluê djŏ si hdră kčah mtrŭn. Nguyễn Khắc Long, K’iăng khua Êpul hgŭm ruah khua ƀuôn prŏng brei thâo, truh ară anei, lu mnuih ƀuôn sang mâo mă leh hră bi mklă mnuih ƀuôn sang lehanăn mâo leh klei hưn mthâo kơ Pô bi ala Quốc hội gưl XV, bi ala Hội đồng nhân dân dŭm gưl wưng thŭn 2021 – 2026, anăn phung mgơ̆ng ruah dưi ba m’ĭt truh kơ grăp gŏ sang čiăng kơ jih jang mnuih ƀuôn sang dưi ksiêm dlăng, ruah phung bi ala mâo klei năng. Hŏng phung bi ala jing sinh viên tơdah wĭt kơ alŭ wăl ăt dưi rơ̆ng kjăp klei dưi mơ̆ng mnuih ƀuôn sang mŏng pô.

“ Anăn mnuih ƀuôn sang ară anei hmei ăt ksiêm dlăng truh kơ jih hruê 21/5. Kyua ară anei dôk hlăm wưng bluh mâo klei ruă Covid 19 anăn dŭm Sang hră Đại học, Cao đẳng brei phung hđeh sinh viên hriăm trực tuyến dưi wĭt kơ sang, kyua anăn phung sinh viên dôk hriăm ti anôk mkăn srăng wĭt kơ sang amâo dah sinh viên Đại học Tây Nguyên srăng wĭt kơ ƀuôn mơh, amâo dôk tinei ôh kyua anăn brei lŏ ksiêm dlăng jih anăn jih jang mnuih čiăng pral lŏ thiăm mbŏ.

Hlue si Y Ƀiêr Niê, K’iăng khua bruă Đảng čar, Khua anôk bruă HĐND čar, Khua êpul bi ala Quốc hội čar, Khua dhar bruă ruah khua čar Dak Lak, kluôm čar mâo 1.794 êpul ruah khua hŏng 1.802 anôk mplĕ hră. Djăp hdră mprăp leh kơ klei ruah khua ti čar Dak Lak dưi hluê ngă ênŭm leh, djŏ hŏng klei mtă mŏng Êpul hgŭm ruah khua ala čar kčah mtrŭn. Boh nik, ti anăp klei mâo dleh dưi ksiêm dlăng mŏng klei ruă tưp lehanăn bruă răng mgang klei êđăp ênang ti alŭ wăl, Êpul bruă răng mgang klei êđăp ênang ala ƀuôn lehanăn bruă mdrao mgŭn ba mdah leh hdră kñăm rŏng kjăp klei êđăp ênang hlăm kluôm čar hlăm wưng mkŏ mjing klei ruah khua. Êpul kahan ksiêm dưi ba nao ngă bruă lu hĭn kñăm hiu suang dlăng, mă phung ngă soh, kƀĭn tui ksiêm lehanăn phat mkra phung ngă soh jhat mâo mnuih ƀuôn sang, yang ƀuôn dôk mđing. Anôk bruă mdrao mgŭn mprăp čih mkra dŭm hdră kčah ngă bruă, klei ruah khua tơ bluh mâo klei ruă Covid 19 dleh dưi ksiêm dlăng. Y Ƀiêr Niê mñă klă:

“Dưi lač ară anei hdră mprăp kơ gưl ruah khua ti Dak Lak ăt msĕ mơh hdră mprăp kơ bruă anei dưi hluê ngă djŏ hdră kčah lehanăn hluê si klei đăo tĭng ară anei djăp mta bruă mâo wăt bruă răng mgang klei êđăp ênang, bruă mdrao mgŭn dưi rŏng kjăp. Kâo čang hmăng mŏng ară anei truh kơ hruê ruah khua djăp mta bruă srăng jăk čiăng kơ jih jang drei srăng mâo gưl ruah khua ti alŭ wăl čar Dak Lak tŭ jing jăk siam, đru mguôp hlăm klei tŭ jing mŏng kluôm ala čar.

 Anăn phung bi ala Quốc hội gưl XV leh anăn phung bi ala HĐND dŭm gưl, wưng thŭn 2021-2026

Hruê ruah khua giăm truh leh. Hruê anei, hruê 22/5, 7 kđông kahan răng mgang knông lăn lehanăn Tiểu đoàn mjuăt bi hriăm knhăk, hlăm Knơ̆ng gĭt gai lĭng kahan răng mgang knông lăn čar Dak Lak hluê ngă leh hdră ruah pô bi ala Quốc hội gưl XV lehanăn HĐND dŭm gưl wưng thŭn 2021 – 2026.

Hŏng klei nao hgŭm sĭt êmĭt mŏng anôk bruă kđi čar dŏng mŏng gưl čar truh kơ alŭ wăl mbĭt hŏng klei čang hmăng, klei gĭr mŏng jih jang mnuih ƀuôn sang, klei ruah pô bi ala Quốc hội gưl XV lehanăn pô bi ala HĐND dŭm gưl wưng thŭn 2021 – 2026 čar Dak Lak dôk mđing truh kơ klei tŭ jing, êđăp ênang,

Hŏng klei nao hgŭm sĭt êmĭt mŏng anôk bruă kđi čar mŏng gưl čar truh kơ nah gŭ mbĭt hŏng klei čang hmăng, klei gĭr mŏng phung bi ala, hdră ruah pô bi ala Quốc hội gưl XV lehanăn pô bi ala HĐND dŭm gưl wưng thŭn 2021 – 2026 čar Dak Lak dôk mđing truh kơ klei tŭ jing, êđăp ênang, tŭ dưn, klă sĭt jing hruê m’ak kơ jih jang mnuih ƀuôn sang./.

Pô mblang: Y-Khem Niê