VOV4.Êđê- Hŏng bruă mđĭ ktang dŭm klei bi lông mbruă kreh knhâo hdră mnêč kơ hđeh sang hră, hlăm dŭm thŭn êgao, hdră ksiêm duah klei kreh knhâo gưl 2 ti Dak Lak mâo lu klei mđing dlăng mơ̆ng phung nai leh anăn hđeh sang hră. Mơ̆ng năn, đru phung hđeh mâo lu klei găl dưi tŭ mă ksiêm duah klei kreh knhâo hŏng hdră jăk leh anăn sĭt, mơ̆ng năn mâo lu klei mĭn mbruă, hdră ngă bruă yuôm bhăn klă sĭt.

Hŏng akŏ Hdră ksiêm hriăm, mkra mjing kpŭng doh djă pioh boh kroh, Nguyễn Thị Tường Vi lehanăn Phan Thị Hằng, hđeh hriăm hră adŭ 9A1, Sang hră gưl dua Tô Hiệu să Êa Bông jing êpul ksiêm duah tal 2 ti kdriêk Krông Ana, čar Dak Lak mâo mă Klei pah mni Klei bi lông kreh knhâo, kdrăp mrâo gưl ala čar brei kơ phung hđeh gưl dua, mâo Phŭn bruă Sang hră m’ar mtô bi hriăm mkŏ mjing thŭn 2021. Boh tŭ hdră ksiêm hriăm anei jing mta gel mâo phŭn agha hdră mkra mjing doh, dưi mkra mơ̆ng tôk boh kphê lehanăn hla kluă, mta mnơ̆ng mâo lu ti alŭ wăl. 2 čô mkra mjing anei hơ̆k m’ak êdi kyua hdră ksiêm hriăm mơ̆ng pô đru msir mghaih leh mđrăm mbĭt 3 mta bruă mơ̆ng klei dôk mđing mâo sĭt ară anei, anăn jing klei êđăp ênang mŏng mta mnơ̆ng, đru kriê pioh mnơ̆ng dhơ̆ng bruă lŏ hma – boh kroh hŏng hnơ̆ng lu êdi ti alŭ wăl lehanăn đru msir mghaih klei čhŏ djhan mŏng bruă mkra mjing kphê, ti čar mâo hnơ̆ng kphê lu êdi hlăm kluôm ala čar. Adei Phan Thị Hằng lač snei:

Kphê jing mta mnơ̆ng pla sui thŭn mâo lu êdi. Ƀiădah hlăm hdră mkra mjing, arăng kreh ba yua hdră mkra mjing msah snăn mta êbhơr mâo lu jing mta Pectin srăng ngă čhŏ djhan kơ wăl hdĭp mda. Kyua anăn, hmei čiăng ba yua mta êbhơr lui anăn mkra kpŭng êpih doh čiăng kriê pioh boh kroh, rơ̆ng dưi pioh boh kroh jăk lehanăn ăt rơ̆ng amâo ngă čhŏ djhan wăl hdĭp mda.

Adei Nguyễn Thị Tường Vi brei thâo:

Kpŭng kriê pioh hmei mkra mdê hŏng kpŭng kriê pioh mkăn anăn jing klei êđăp ênang lehanăn doh êdi. Hlăm hdră ksiêm hriăm snăn hmei ƀuh kpŭng kriê pioh anei dưi ngă kơ boh kroh mtah siam sui hĭn, bi hrŏ klei jhat, mmao ngă lehanăn dưi kriê pioh boh kroh sui.

Nguyễn Thị Tường Vi leh anăn  Phan Thị Hằng, hđeh sang hră adŭ 9A, sang hră gưl 2 Tô Hiệu ( Krông Ana, Dak Lak) mâo mă klei pah mni hlăm Klei bi lông kreh knhâo kơ hđeh sang hră gưl 2,3 ala čar

Ăt mđing truh kơ boh klei mjêč ti alŭ wăl, sa hdră ksiêm hriăm kreh knhâo mơ̆ng phung hđeh hriăm hră ti Dak Lak mâo mă leh klei pah mni gưl čar lehanăn klei pah mni mrô 3 gưl ala čar hlăm klei bi lông mĭn mrâo ti phung hđeh êlăk thŭn 2020, anăn jing “Gru hmô hmao ƀuh klei bi rai dliê lehanăn pui ƀơ̆ng dliê mơ̆ng kbưi”. Hlăm hdră ksiêm duah anei, Đỗ Lê Minh Quân lehanăn Trần Đại Lợi, hđeh hriăm hră adŭ 9 Sang hră gưl dua Phan Bội Châu, ƀuôn prŏng Buôn Ma Thuột ba yua leh kdrăp ksiêm dlăng mbĭt hŏng mta cảm biến čiăng thâo kral klei bi mlih mơ̆ng hnơ̆ng adiê, hnơ̆ng h’uh êwa angĭn lehanăn klei ngañ kbiă hriê mơ̆ng maĭ uă kyâo ti dŭm wăl dliê. Yua sóng tần số vô tuyến (RF) čiăng hrui mă lehanăn ba klei hưn mthâo truh kơ anôk ksiêm dlăng hlăm brô 1,5 km. Tinei, mnuih ksiêm dlăng srăng thâo săng klă kơ hnơ̆ng adiê, hnơ̆ng h’uh êwa angĭn lehanăn klei ngañ. Mơ̆ng anăn, dưi thâo dŭm klei ngañ êgao hnơ̆ng, msĕ si ênai uă kyâo amâo dah hnơ̆ng adiê đĭ hlơr ktang đei kyua klei pui ƀơ̆ng dliê ngă. Kdrăp anei điêt, khuăt, ênưih ba yua, ênoh bi liê ƀiă, dưi đru kơ êpul ksiêm dlăng dliê kmrơ̆ng pral hmao ƀuh lehanăn msir mghaih klei pui ƀơ̆ng dliê amâo dah mâo phung tlĕ uă druôm kyâo. Đỗ Lê Minh Quân lač snei:

Ti ƀuôn prŏng di adei amâo mâo klei găl nao hlăm dliê kmrơ̆ng lu ôh, ƀiădah adei ƀuh klă bruă klam mơ̆ng dliê jing yuôm bhăn êdi hluê hŏng dŭm klei bhiăn ti sang hră, ti adŭ hriăm. Leh mkŏ dưm kdrăp anei tŭ jing, di adei nao leh hlăm dliê ksiêm dlăng hŏng kdrăp anei čiăng lŏ mkra kdrăp anei gơ̆ jăk hĭn. Kdrăp anei mâo ênoh hlăm brô 2,3 êklăk prăk. Adei čang hmăng srăng dưi mkra ênai hưn răng čiăng pral dưi hmao ƀuh. Lehanăn dưi ƀuh klă nik hluê hŏng kdrăp đĭng blŭ lehanăn lu kdrăp mkăn hluê hŏng 1 tài khoản.

Đỗ Lê Minh Quân  leh anăn Trần Đại Lợi, adŭ 9, Sang hră gưl 2 Phan Bội Châu ( Ƀuôn Ama Thuôt, Dak Lak) hlak mblang kơ gru hmô thâo ƀuh klei bi rai dliê leh anăn pui ƀơ̆ng dliê mơ̆ng kbưi.

Dŭm thŭn giăm anei, klei bi lông tui duah klei mĭn mrâo kdrăp kreh knhâo ƀrư̆ hruê ƀrư̆ jak iêu lu phung hđeh ti Dak Lak nao hgŭm, hŏng êbeh 100 mta mnơ̆ng, hdră ngă bruă mâo klei dưi ba yua klă sĭt, jĕ giăm hŏng klei hdĭp. Dŭm hdră, mta mnơ̆ng amâo djŏ mdei ti klei bi lông ôh, ƀiădah dưi tŭ yap klei dưi dưn yua klei mĭn lehanăn ba yua hlăm klei sĭt. Msĕ si hdră “Kbăng êa kơ krĭng êngăp êa lehanăn êa čhŏ djhan”, hlăk dôk ba yua tŭ dưn ti krĭng kreh êngăp êa mơ̆ng čar Dak Lak lehanăn dŭm čar krĭng kwar Krah; Hdră mkra mjing kdrăp ksiêm dlăng lehanăn kriê dlăng phung hđeh ti Sang hră mơ̆ng Êpul phung hđeh hriăm hră gưl sa, gưl 2 lehanăn gưl 3 Victory, ƀuôn prŏng Ƀuôn Ama Thuôt, hlăk dôk ngă leh čiăng ba yua hlăm Sang hră. Đỗ Tường Hiệp, K’iăng khua knơ̆ng bruă Sang hră m’ar mtô bi hriăm čar Dak Lak ksiêm dlăng, dŭm mta mnơ̆ng, hdră ngă bruă mơ̆ng phung hđeh brei ƀuh, phung hđeh dưi bi êdah leh klei ksiêm duah êlam, amâo djŏ knŏng bi êdah klei thâo, mâo klei mĭn mrâo, klei thâo săng kơ boh klei ƀiădah lŏ jing klei bi mklă, thâo kơ klei mâo sĭt, klei čang hmăng msir mghaih dŭm boh klei mâo hlăm klei hdĭp.

Klei bi lông kdrăp kreh knhâo jing sa hdră yuôm bhăn hlăm sang hră. Hŏng bruă mlih mrâo hdră mtô bi hriăm ară anei snăn bruă pŏk ngă hdră ksiêm duah kơ bruă kreh knhâo hĭn mơh yuôm bhăn hlăm sang hră. Dŭm boh sang hră bi mđĭ hdră mjuăt bi hriăm STEM, hdră hiu čhưn, ksiêm dlăng hlăm anăn êdah hĭn jing kơ klei mĭn mrâo hlăm sang hră.

Hluê hŏng dŭm klei bi lông tui duah klei mĭn mrâo hlăm bruă ksiêm duah kdrăp kreh knhâo kơ phung hđeh, hdră ksiêm duah klei kreh knhâo dưi bi lar leh hlăm lu boh sang hră ti čar Dak Lak. Mơ̆ng anăn mtrŭt phung hđeh ksiêm duah, ba yua klei thâo hlăm bruă kreh knhâo yua hlăm klei hdĭp. Mbĭt anăn, hdră anei ăt đru mguôp bi mlih hdră mtô bi hriăm hluê hdră mđĭ bi lar klei thâo, knhuah hdĭp mơ̆ng mnuih hriăm hlăm Anôk bruă mtô bi hriăm ti alŭ wăl./.

Pô mblang: Y-Khem Niê